1 Tetuh ranpibawi lupi Eliashib tuh a uno ranpibawi hae ryte thokuh hae zah Tuu Koikua kha a raethui hae; tuh-e tuh thyaasah hae zah a thuakaw hae kha a bing hae; te Azah Innhangpaw te Hananel Innhangpaw kyacia a raethui hae. 2 Eliashib nynh a raethui koute Jeriko khuaccaaw hae nynh a raethui hae. Minmin koute Imri ccapaw Zakkur nynh a raethui.

3 Hassenaah ccapaw hae nynh Ngasaw Koikua kha a raethui hae; a thingccaw hae, a thuakaw hae, a thuakaw toh hae te a thuakaw ccong hae kha a bing hae. 4 Te minmin koute Hakkoz ccapaw athuapaw Uriah a ccapaw Meremoth nynh a raethui. Tuh-e hae koute Meshezabel ccapaw athuapaw Berekhiah ccapaw Meshullam nynh a raethui. Minmin koute Baana ccapaw Zadok nynh a raethui. 5 Te minmin koute Tekoa ccungccaw hae nynh a raethui hae; thuasalama mih bawi hae nynh mih Bawipaw rya kha lungngingte lah khyh hae.

6 Paseah ccapaw Joiada te Besodeiah ccapaw Meshullam nynh Koikua Rynpaw kha a raethui hae; a thingccaw hae, a thuakaw hae, a thuakaw toh hae te a thuakaw ccong hae kha a bing. 7 Minmin koute Gibeon khuapaw Melatiah te Meronoth khuapaw Jadon, Vaw Khuraw lang ram a uktu uknaw lungkhu a um hae paw Gibeon ccungccaw hae te Mizpah ccungccaw hae nynh a raethui hae. 8 Minmin koute Harhaiah ccapaw suilaeethyapaw Uzziel cikuhpaw nynh a raethui. Aning koute mynkhuhpaw a raethyapaw Hananiah nynh a raethui; minmin nynh Jerusalem kha Khualungrua Akopaw kyacia a raethui hae. 9 Minmin koute Jerusalem pee angankuh a uktu Refaiah, Hur ccapaw nynh a raethui. 10 Minmin koute Harumaf ccapaw Jedaiah nynh amaw inn te arawsekunaw kha a raethui; Jedaiah koute Hashabneiah ccapaw Hattush nynh a raethui. 11 Harim ccapaw Malkhijah te Pahath-moab ccapaw Hasshub nynh ccangpaw hmin te Sanlou Ruanaw Innhangpaw kha a raethui hae. 12 Aning koute Hallohesh ccapaw Shallum, Jerusalem pee angankuh a uktu te a ccanung hae nynh a raethui hae.

13 Hanun te Zanoah khuaccaaw hae nynh Accya Koikua kha a raethui hae; minmin nynh tuh-e tuh raethui hae zah a thuakaw hae, a thuakaw toh hae te a thuakaw ccong hae kha a bing hae, te khualungrua dong thong kheit kha Athupaw Koikua kyacia a raethui hae.

14 Rekhab ccapaw Malkhijah, Beth-hakkherem pee a uktu nynh Athupaw Koikua kha a raethui; aning nynh tuh-e tuh raethui zah a thuakaw hae, a thuakaw toh hae te a thuakaw ccong hae kha a bing.

15 Kolhozeh ccapaw Shallum, Mizpah pee a uktu nynh Tuidy Sakoih kha a raethui; aning nynh tuh-e tuh raethui zah a dawpah koute a thuakaw hae, a thuakaw toh hae te a thuakaw ccong hae kha a bing hae; aning nynh siapharan khokhu pe umpaw Shelah Tuili khualungrua kha David Khuapi kyate a cceihbungpaw nawkui hae kyacia a rae. 16 Aning koute Azbuk ccapaw Nehemiah, Beth-zur pee angankuh a uktu nynh David shawku te arawsekunaw kyate tho zah raethuipaw tuili te rhawkaw hae inn kyacia a raethui. 17 Aning koute Levi phin hae nynh a raethui hae: Bani ccapaw Rehum nynh raethui zah, aning koute Keilah pee angankuh a uktu Hashabiah nynh amaw pee hanlan a raethui. 18 Aning koute a unopaw nynh a raethui: Aning tuh Henadad ccapaw Bavvai, Keilah pee angankuh uktu nynh thua; 19 aning koute Jeshua ccapaw Ezer, Mizpah uktu nynh khua Apaki kya umpaw rhawtuk-zunghe nungnaw kalan akaethungpaw te arawsekunaw ccangpaw hmin kha a raethui. 20 Aning koute Zabbai ccapaw Baruk nynh ccangpaw hmin kha khua Apaki kyate ranpibawi lupi Eliashib inn thuakaw kyacia a raethui. 21 Aning koute Hakkoz ccapaw Uriah a ccapaw Meremoth nynh ccangpaw hmin kha Eliashib inn thuakaw kyate Eliashib inn athangnaw kyacia a raethui. 22 Aning koute Jerusalem pepan umpaw ranpibawi hae nynh a raethui hae. 23 Minmin koute Benjamin te Hasshub nynh mih inn te arawsekunaw kha a raethui hae. Minmin koute Ananiah ccapaw athuapaw Maaseiah a ccapaw Azariah nynh amaw inn pe kha a raethui. 24 Aning koute Henadad ccapaw Binnui nynh ccangpaw hmin kha Azariah inn kyate khua akouleihnaw Apaki kyacia a raethui. 25 Uzai ccapaw Palal nynh khua Apaki te arawsekunaw kha thuasah, rhawviatu hae umnaw pe umpaw siapharan inn palung lang e innhangpaw kha thuasah a raethui. Aning koute Parosh ccapaw Pedaiah te 26 Ofel kya um hae paw beikinn ryalahtu hae nynh nithua lang e Tui Koikua te arawsekunaw hmin kyate innhangpaw kyacia a raethui. 27 Aning koute Tekoa khuaccaaw hae nynh myarya lepaw innhangpaw te arawsekunaw ccangpaw hmin kha Ofel lungrua kyacia a raethui hae.

28 Ranpibawi hae nynh Marang Sakoih palung lang, mimaw inn raveihte arawsekunaw kha a raethui hae. 29 Minmin koute Immer ccapaw Zadok nynh amaw inn te arawsekunaw kha a raethui. Aning koute Shekaniah ccapaw Shemaiah, Nithua Sakoih a ngawtu nynh a raethui. 30 Aning koute Shelemiah ccapaw Hananiah te Zalaf ccapaw lu taruhnaw Hanun nynh ccangpaw hmin kha a raethui hae. Minmin koute Berekhiah ccapaw Meshullam nynh amaw a umnaw inn te arawsekunaw kha a raethui. 31 Aning koute suilaeetu Malkhijah nynh beikinn ryalahtu hae inn te kungkutu hae inn kyacia thuasah, Bawi Sakoih te arawsekunaw, lungrua apaki kya umpaw palung khaan kyacia thuasah a raethui. 32 Lungrua apaki kya umpaw palung khaan te Tuu Koikua laku kha suilaeetu hae te kungku hae nynh a raethui hae.