13
Ramccang hae A Phiakuh hae
1 Tuin nin khe ccungccaw hae a thaenaw hae khe Moses ccauh kha a ria hae; tuh-e ccauh lungkhu khe Ammon hae te Moab hae humhung mah Pachia ccungccaw hae a pumkuh hae paw kalan tee lan khyh hae cite azeikuhpaw kha a muih hae,Ref 13.1-2: Deu 23.3-5
2 pawccecize minmin nynh Israel hae kha sanlou te tui te cciadue leite, minmin kha thyalaw khylan Balaam kha a hohnua hae—tuhzemah ah Pachia nynh thyalawnaw kha hythuanaw lang a paleih.Ref 13.2: Nam 22.1-6
3 Ccungccaw hae nynh kawbya kha he a thae hae te, ramccang ciihan hae balyn kha Israel hae kyate a phia hae.
Nehemiah nynh A Raethui hae paw
4 E mawze, ah Pachia inn e akhaan hae do-oihtu lang a nung hae paw, Tobiah ryte anaekuh hae paw ranpibawi Eliashib nynh
5 ccathae silawnaw, mynkhuhpaw, angphe hae thuasah, kawbya thyhte Levi phin hae, hlawsahtu hae te sakoih ngawtu hae a pya hae paw ccathae, misutui, chitui pumhaw pumkheit thuasah, ranpibawi hae elang a hlu hae paw ahlu hae thuasah langmawlya a la nungnaw hae paw akhaan lepaw kha Tobiah hanlan a paccynpya.
6 E acyiku lya hynh kae tuh Jerusalem kya ka um khyh, pawccecize Babilon Siapharan Artazaksis nynh siapharan lang a tangnaw sung thum kum ningnaw kum kya siapharan kalan ka cceih. Sosoh koute siapharan kha akhue ka ngiakuh zah
7 Jerusalem lang ka ki. Te Eliashib nynh Tobiah hanlan Pachia inn voidu lungkhu kya akhaan paccynpah zah hoyleinaw kha a rae cipaw ka ny.
8 Ka thin myarya ria zah Tobiah innbyn kya-e uccaw balyn kha akhaan lungkhu te ka vua.
9 Te kaw ka pya hae zah akhaan hae kha ccikan hae zah, Pachia inn angphe hae kha ccathae silawnaw te mynkhuhpaw hae ryte ka kikhae hae.
10 Levi phin hae kha mih hanpaw pya khyh hae cipaw kha mah ka muih; tukeiccuze beikinn rya a lah hae paw Levi phin hae te hlawsahtu hae tuh mimaw loo raveih lang a cceih vae hae.Ref 13.10: Deu 12.19
11 Tukeiccuze bawi hae kha ka bo hae zah, “Pawccemou Pachia inn tuh vua athua?” ka cipya hae. Minmin kha ka pum hae zah mih umnaw hmin kya ka nung hae.
12 Te Judah hae balyn nynh looh, misutui te chitui pumhaw pumkheit kha sisuainn lang a thuakhae hae.Ref 13.12: Mal 3.10
13 Te sisuainn a uktu suaccytu hae lang ranpibawi Shelemaih, kawbya sazaepaw Zadok te Levi phin athuapaw Pedaiah kha ka khang hae, minmin a bawmtu hae lang Mattaniah ccapaw Zakkur a ccapaw Hanan kha ka khang, pawccecize minmin tuh mih lungzi cite tua athua hae; minmin nynh mih uno hae kalan uccaw neepaw rya kha a law hae.
14 Pou ka Pachia, e konglang te kae hynh beih yn ning nan, ka Pachia inn hanlan te a ryalaw hanlan ahoypaw rya ka lawpaw hynh beih yn ningpah nan.
Sabbath Nin kya Haeungsahnaw
15 Tuin ccyh lyaze ccungccaw hae nynh Judah ram kya sabbath nin khe misu mia hae zah ccathae patae kha lah hae zah lann tungvaw a phusah hae paw kha ka muih; misutui, misu thae, thaekute phupaw aphuinphuin kha sabbath nin kya Jerusalem lang a phu hae paw kha mah ka muih; looh a zua nin hae khe raeringnaw ka pya hae.Ref 13.15: Exo 20.8-10; Deu 5.12-14; Jer 17.21-22
16 Tuh-e khuapi kya um hae paw Tair ccungccaw hae nynh ngasaw te uccaw aphuinphuin kha oun cciakhae hae zah sabbath nin khe Judah ccungccaw hae kalan te Jerusalem khua kya a zua hae.
17 Tetuh Judah bawi hae kha ka bo hae zah, “Sabbath nin kha na thusah oh zah, e hoyleinaw na rae oh paw hynh pawtemou athua?
18 Nae minpaaw hae nynh hynhte a cyi hae keiccuze e ronaw balyn hynh aening tungvaw te e khuapi kya ah Pachia nynh thuasah khyh tou? Tuhzemah nanning nynh sabbath kha thusahte Israel tungvaw kya thinrianaw kha houh na thuakhae oh,” ka cipya hae.
19 Sabbath nin athua maw Jerusalem koikua hae kya he amoh takaw te, thuakaw hae kha khaw athua cih cite kaw ka pya hae zah sabbath nin athang mawlaezung thuakaw hae kha hung thua lan khyh cite kaw ka tho. Sabbath nin kya pawpaw uccaw mah khua lungkhu lang teekhae athua khyh nawlan, ka ryalahtu hae abang kha koikua hae kya ka nung hae.
20 Tetuh kungku hae te uccaw aphuinphuin a zuatu hae tuh Jerusalem khua atolang khe vae kheit vae ning a rya hae.
21 Thuasalama minmin kha raeringnaw ka pya hae zah, “Pawccemou khualungrua pe na rya oh? Hynhte bua na cyi oh ze, kae kyng cih oh,” ka cipya hae. Tuin ccyh te vae tuh sabbath nin kya oun thua vae khyh hae.
22 Sabbath nin kha thyaasah khylan Levi phin hae nynh mimaw te mimaw thyaasakute oun cceih hae zah koikua hae kha a ngaw nawlan hae kaw ka pya hae. Pou ka Pachia, e kong keiccuze kae hynh yn ning nan, atynpaw na sungsahnaw tuh ale thyhte kae hynh ngaethya beih yn umsah.
Minphuin Ccangpaw hae te Zuvaw Tangnaw
23 Tuin ccyh lyakhe Ashdod nopi hae, Ammon nopi hae te Moab nopi hae ryte zuvaw lang tang hae paw Judah hae kha mah ka muih hae;Ref 13.23-25: Exo 34.11-16; Deu 7.1-5
24 mih ccaaw hae angankuh tuh Ashdod bya kha ho hae zah Judah bya kha hothya khyh hae, ccangpaw minphuin hae bya aphuinphuin kha a ho hae.
25 Te minmin kha ka seisah hae zah thya ka law hae, minmin abang kha ka zia hae zah mih sang te ka sue hae; Pachia min te bya ka kinsakuh hae zah, “Nae ccanung hae kha mih ccapaw hae zu lang na pya lan khyh oh, mih ccanung hae kha nae ccapaw hae hanlan thuasah, naemaw hanlan thuasah zu lang na dy lan khyh oh.
26 Solomon Siapharan tuh tuhcihawpaw nopi hae keiccuze sei khyh tou? Minphuin patae hae laku kya aning tahawpaw siapharan um khyh, a Pachia nynh sungsah zah Israel hae balyn a uktu siapharan lang a khang; thuasalama ramccang nopi hae nynh aning kha heize seinaw a raesah hae.Ref 13.26: 2 Sam 12.24-25; 1Si 11.1-8
27 Kaening nynh nanning bya kha ngae lan zah ramccang nopi hae kha zu lang dykute myarya lepaw e hoyleinaw balyn hynh raete kae Pachia tungvaw kya lungzi leite kae um cih zawtou?” ka cipya hae.
28 Ranpibawi lupi Eliashib ccapaw Jehoiada a ccapaw lu kheit tuh Horon ccungccaw Sanballat paeepaw athua keiccuze ka kyate ka dee.Ref 13.28: Neh 4.1
29 Pou ka Pachia, minmin nynh ranpibawi thuanaw kha thuasah, ranpibawi hae byakinnaw te Levi phin hae byakinnaw kha thuasah a thusah hae keiccuze minmin kha syntaw hae.
30 Tuhcite Judah hae kha ramccang hae te asekuhpaw atyn-are kyate ka thyaasah hae zah, ranpibawi hae te Levi phin hae kha mimaw rya raveih kya ka nung hae;
31 accyh khyapaw kya silawnaw lanpaw thing ahlu te thaety hanlan kha ka pya hae. Pou ka Pachia, hoynaw ka ccou nawlan yn ning nan.