9
Kuihccu Chihpaw A Dansah
(Mar 2.1-12; Luk 5.17-26)
1 Jesu tuh kohlung lungkhu lang a tee koute rili khuraw lang po zua zah amaw khua lang a thua.
2 Iphae vawlan phang ihpaw a kuihccu chihpaw kha Jesu kalan oun puih hae. Jesu nynh mih zynnaw kha a muih tuh, a kuihccu chihpaw kha, “Ka ccapaw, na thawsia nan sah, na seinaw tuh ngaethya athua vae,” a cipya.
3 Tetuh kawbya sazae hae abang nynh, “E paw hynh Pachia saryate bya a ho,” cite a hoku hae.
4 Jesu nynh mih tuanaw kha nyh zah, “Pawccemou nae thinlung kya ahoy leipaw kha na tua oh?
5 ‘Na seinaw tuh ngaethya athua vae’ cipyapaw tou azoihua? Tuhkhyhze, ‘Thokuh lah cceih,’ cipyapaw tou azoihua?
6 Thuasalama Ccungccaw Ccapaw tuh laephi vawlan seinaw kha ngaethyanaw kaw a hoi cipaw na ny nawlan oh,” ci zah, kuihccu chihpaw kha, “Thokuh, na iphae kha lawkuh lah na inn lang cceih ccavae,” a cipya.
7 Tuh-e paw tuh thokuh zah a inn lang a cceih vae.
8 Ccungccaw zapi nynh tuh-e tuh he a muih hae te, mih ngaeangthua zah tuhcihawpaw kawhoinaw kha ccungccaw hae a pyatupaw Pachia kha the a hoysah hae.
Jesu nynh Matthai A Ko
(Mar 2.13-17; Luk 5.27-32)
9 Tuin kyate Jesu tuh po a ccia lyakhe ngunto khoinaw zung kya a dahungpaw Matthai a ci hae paw lu kheit kha muih zah, “Kamaw yn zui,” a cipya. Te aning nynh thokuh zah Jesu kha a zui.
10 Jesu tuh inn kya ae lan ccaboi kya a haung lyakhe ngunto khoi hae paw patae te misei hae tuh oun thua hae zah Jesu te a zuitu hae ryte a dahungkheih hae.Ref 9.10-11: Luk 15.1-2
11 Tuh-e tuh Farasi hae nynh he a muih hae tuh, a zuitu hae kha, “Pawccemou nae sazaepaw hynh ngunto khoi hae paw te misei hae ryte a aekheih hae?” a cipya hae.
12 Jesu nynh tuh-e bya kha he a thae tuh minmin kha, “A dan hae paw nynh sibawi peki khyh hae, thuasalama a ccih hae paw nynh a peki hae.
13 La cceih oh lah, ‘Kae tuh silawkunaw ka ry khyh, ngaethyaumsahnaw nynh ka ry,’ acikuhpaw kha na nythya nawlan oh la ccangkuh oh. Pawccecize kae tuh miding hae ko khylan kae thua khyh, misei hae ko khylan nynh kae thua,” a cipya hae.Ref 9.13: Mat 12.7; Hos 6.6
Looh-ae Sungnaw Kong Byakhianaw
(Mar 2.18-22; Luk 5.33-39)
14 Te Johan zuitu hae nynh Jesu kalan oun thua hae zah, “Kaening te Farasi hae tuh atu te atu looh-ae kae sung zah, pawccemou nang na zuitu hae ze looh-ae a sung khyh hae?” a cipya hae.
15 Jesu nynh minmin kha, “Zudy ccangvaepaw tuh zudy poi oun too hae paw kya a umbua lungkhu tuh tuh-e ccungccaw hae tuh mih ngaethah cih zawtou? Thuasalama zudy ccangvaepaw kha minmin kyate lawpya ccyh yn thua cih; tetuh minmin tuh looh-ae oun sung vae cih hae.
16 Humhung nynh mah arynpaw boeining kha athawpaw boeibia te bia boi khyh, tuhte a bia lanze bianawpaw nynh arynpaw boeining kha po lah zah houh aseiikuh paleih vae.
17 Humhung nynh mah athawpaw misutui kha arynpaw misutui-saphuabawng lungkhu lang ruin boi khyh, tuhte a ruin lanze misutui-saphuabawng tuh apaw cih zah misutui tuh azu cih, te misutui-saphuabawng mah aroh cih; thuasalama athawpaw misutui tuh athawpaw misutui-saphuabawng lungkhu lang nynh a ruin hae, tuhteze tuh parouh akhyn hae,” a cipya hae.
Jesu Boeirae A Haenung
(Mar 5.21-43; Luk 8.40-56)
18 Tuh-e bya tuh Jesu nynh a hopya cciamang lya hae khe, sinakok piccan lu kheit nynh yn thua zah Jesu malang bakhung zah, “Ka ccanung tuh atumaw khe nynh a chi, thuasalama nang nynh yn cceih lah a tungvaw khe na kuih na khang ze aning tuh a hiin cih,” a cipya.
19 Jesu nynh thokuh zah tuh-e paw tuh a zui, a zuitu hae mah a zuikuh bua hae.
20 Tuh lyatuin kum haw lae ning cia chiilua ccinaw a hoipaw nopinung lu kheit tuh Jesu nulang yn thua zah a boeirae kha a hae.
21 Pawccecize a boei sankaw ka hae ze phe ka dan cih cite a lungkaw te a tuaku.
22 Thuasalama Jesu nynh maeleihkuh zah tuh-e nung kha he a muih tuh, “Ka ccanung, na thawsia nan sah, na zynnaw nynh ae dansah vae,” a cipya. Tuin ccyh kyate nopinung tuh a dan vae.
23 Jesu tuh uktupaw inn lang he a thua te, tyngdaw khua hae paw te a sia a rua hae paw ccungccaw hae kha muih zah,
24 “Toiku tua hin oh, pawccecize imuanung tuh chih khyh, a ihpaw nynh thua,” cite a hopya hae. Te minmin nynh a nuinse hae.
25 Thuasalama ccungccaw hae he a pou hae te, Jesu nynh tee zah tuh-e nung kha a kuih te tho zah imuanung tuh po a tho vae.
26 Tuh-e thongpang tuh tuh-e ram lungkhu balyn po azeihkuh.
Mitmoh Lu ning Ngawmuih hae
27 Tuin kyate Jesu tuh pou zah a ccia lyakhe mitmoh hae paw lu ning nynh zui hae zah, “David Ccapaw, kaening hynh ngaethya beih oun umsah!” cite a sia hae.
28 Jesu tuh innthung lang he a thua te, mitmoh hae tuh amaw kalan oun thua hae; Jesu nynh minmin kha, “E hynh a cyih kho cih cite nae zyn oh tou?” a cipya hae. Minmin nynh, “Kae zyn, Bawipaw,” a ci hae.
29 Tetuh Jesu nynh mih mit kha hae zah, “Nae zynnaw thyhte nae tungvaw cyihkuh sah,” a cipya hae.
30 Te mih mit hae tuh oun aw vae; Jesu nynh, “E hynh humhung mah la nysah nan oh,” cite tynkaring lan bya a tawsya hae.
31 Thuasalama minmin nynh he a pou hae te, amaw konglang thongpang kha tuh-e ram balyn kya a zeihsaku hae.
Byaho Kho leipaw Byaho
32 Minmin he a pou hae te, raerangsaro bahkuhpaw byaho kho leipaw lu kheit kha Jesu kalan oun thuakhae hae.
33 Raerangsaro kha he a deepah koute, byaho kho leipaw tuh bya yn ho vae; te ccungccaw zapi tuh mih ngaeangthua zah, “E tahawpaw hynh Israel ram kya muihkuh boi khyh,” a ci hae.
34 Thuasalama Farasi hae nynh, “Raerangsaro hae uktupaw liate nynh raerangsaro hae kha a dee hae,” cite a ho hae.Ref 9.34: Mat 10.25, 12.24; Mar 3.22; Luk 11.15
Ryalahtu Azya
35 Jesu tuh khuapi hae te khua taraw hae balyn kalan khua po ccong zah, mih sinakok hae kyakhe a ccangpya hae, peenaw thehoypaw kha hopah hae zah mih ccinaw miakaw te ccihawnaw miakaw kha a dansah hae.Ref 9.35: Mat 4.23; Mar 1.39; Luk 4.44
36 Jesu nynh ccungccaw zapi kha he a muih hae tuh, ngaethya a umsah hae, pawccecize minmin tuh tuurintu a um leipaw tuu hae hawte lungriathaete um hae zah bawmtu hoi khyh hae.Ref 9.36: Nam 27.17; 1Si 22.17; 2Sh 18.16; Eze 34.5; Mar 6.34
37 Tukeiccuze a zuitu hae kha, “Loohrue lanpaw tuh myarya alung, thuasalama ryalahtu hae tuh azya.Ref 9.37-38: Luk 10.2
38 Tukeiccuze loohrue lanpaw a hoitu Bawipaw nynh a loohruenaw kalan ryalahtu hae yn saw nawlan sawsang oh,” a cipya hae.