7
Ming hae Ccaee Nan
(Luk. 6.37-38, 41-42)
1 “Nanning tuh byapia na thua khyh nawlan oh ming hae kha bya la pia nan oh.
2 Pawccecize na pianaw oh paw byapianaw thyhte naemaw kha byapia na thua cih oh; na tounaw oh paw tounawpaw te naemaw kha toupya ru na thua cih oh.Ref 7.2: Mar 4.24
3 Namaw mit lungkhu umpaw thingthyh kha tuaku leite pawccemou na uno mit lungkhu umpaw athupaw taraw kha na dopya?
4 Namaw mit kya thingthyh phang a um pite, pawtemou na unopaw kha, ‘Na mit kya-e athupaw taraw kha kae la khoipah,’ na ci ngan?
5 Nang thyaruhpaw! Namaw mit lungkhu e thingthyh kha khoikuh ty; tukoute nynh na unopaw mit lungkhu e athupaw taraw kha khoipya khylan ccaerarih lan na muihthya cih.
6 “Athyaapaw uccaw kha ui hae pya nan oh; nae kya-e palee hae kha voh hae malang sawpah nan oh, tuhte na cyi oh ze mih ccu te a sydehan cih hae, te naemaw kha ae paleihnuakuh cih oh zah ae bou cih oh.
Ngia, Ccung, Khua
(Luk 11.9-13)
7 “Ngia oh lah ae pya cih oh; ccung oh lah na muih cih oh; khua oh lah thuakaw kha hungpya na thua cih oh.
8 Pawccecize a ngiapaw miakaw tuh a mue; a ccungpaw miakaw tuh a muih; thuakaw a khuapaw miakaw tuh hungpya athua cih.
9 Nanning lakuze nae ccaaw nynh sanlou ae ngiaku oh ze, lung na pya cih oh tou?
10 Ngasaw ae ngiaku oh ze, hupaw na pya cih oh tou?
11 Ccungccaw hoy leipaw mang na thua oh pite nae ccaaw hae kha lasung hoypaw pya lan na ny oh ze, vaawlang umpaw nae Paaw nynh amaw kalan a ngiakuh hae paw kha uccaw hoypaw tuh houh a pya cih hae!
Sui Upadi
12 “Nae tungvaw kya cyih hae sah cite na ry oh hawte ming hae tungvaw kya la cyih oh; pawccecize hynh-e tuh kawbya ccauh te profeh hae ccauh nynh a ho hae paw nynh thua.Ref 7.12: Luk 6.31
Abypaw Sakoih
(Luk 13.22-30)
13 “Abypaw sakoih kyate tee oh; pawccecize ronaw kalan ccianawpaw sakoih tuh ko zah laanpi tuh azoi; tuin kya a teepaw ccungccaw hae tuh patae acih hae.
14 Thuasalama hiinnaw kalan ccianawpaw sakoih tuh by zah laanpi tuh aru; tuh-e laanpi a muihkuhpaw tuh azya.
Thingku te Athae
(Luk 6.43-44)
15 “Tuu phua bongkute nae kalan oun thua hae paw lingthya profeh hae kha la raeringkuh oh; pawccecize minmin tuh alungkhu langte tuh arepaw suizaw hae nynh thua hae.
16 Minmin kha mih cyisahnaw khate nae nyh cih oh. Ccungccaw hae nynh misu thae kha taty ku kyate a lo hae tou? Thaeku thae kha hinpaw ku kyate a lo hae tou?
17 Tuh-e hawte thingku hoypaw nynh thingthae hoypaw kha a thae, thuasalama thingku hoy leipaw nynh tuh thingthae hoy leipaw kha nynh a thae.
18 Thingku hoypaw nynh thingthae hoy leipaw kha thae kho khyh, thingku hoy leipaw nynh mah thingthae hoypaw kha thae kho khyh.
19 Thingthae hoypaw a thae leipaw thingku miakaw tuh nge thua zah maee lungkhu lang phung athua.Ref 7.19: Mat 3.10; Luk 3.9
20 Tukeiccuze lingthya profeh hae kha mih cyisahnaw khate nae nyh cih oh.Ref 7.20: Mat 12.33
Bawipaw, Bawipaw
(Luk. 13.25-27)
21 “ ‘Bawipaw, Bawipaw’ cite yn kopaw miakaw nynh vaawlang peenaw lungkhu lang tee lan khyh hae, thuasalama vaawlang umpaw ka Paaw rynaw a raepaw nynh a tee cih.
22 Tuh-e nin kya ccungccaw patae nynh kae kha, ‘Bawipaw, Bawipaw, na min te profehbya kae ho khyh tou? Na min te raerangsaro kae dee khyh tou? Na min te ngaeangnaw patae kae rae khyh tou?’ cite yn hopah cih hae.
23 Te kae nynh minmin kha, ‘Nanning hynh papin kae nyh boi khyh oh, hoyleinaw a rae hae paw nanning, ka kyate cceih oh,’ ka ci cih hae.Ref 7.23: Sam 6.8
Inn Sak hae paw Lu Ning
(Luk 6.46-49)
24 “Tukeiccuze humhung zemah hynh-e ka bya hynh thae zah a zuipaw tuh lungpi vawlan a inn a sakkuhpaw mihawpaw te nynh a loku.
25 Khuaa yn rah zah tui yn le, khisan yn zaw zah tuh-e inn tuh a mung; thuasalama tuh-e inn tuh lungpi vawlan sakpaw athua keiccuze pu khyh.
26 E ka bya hynh thae zah a zui leipaw tuh laesia vawlan a inn a sakkuhpaw mingaeepaw te nynh a loku.
27 Khuaa yn rah zah tui yn le, te khisan yn zaw zah tuh-e inn tuh a mung, te tuh-e inn tuh phe a pu; khaleih roh lan a pu,” a ci.
28 Jesu nynh tuh-e bya hae balyn kha he a ho koute ccungccaw zapi hae tuh a ccangpyanaw kha mih ngaeangthua,Ref 7.28-29: Mar 1.22; Luk 4.32
29 pawccecize aning nynh kawbya sazae hae hawte thua leite kaw a hoipaw lu kheit hawte a ccangpya hae.