6
Pyanaw Kong Ccangpyanaw
1 “Ccungccaw hae nynh yn muih hae sah cite minmin malang ryachi bawmnaw na pya khyh nawlan oh la raeringkuh oh; tuhkhyhze tuh vaawlang umpaw nae Paaw kya-e amee na mue lan khyh oh.Ref 6.1: Mat 23.5
2 “Tukeiccuze ryachi bawmnaw na pya vae oh ze thyaruh hae nynh sinakok hae kya te laanpi hae kyakhe ccungccaw hae nynh thehoysahnaw kha ccou khylan a cyi hae hawte nae malang mungkae la tusah nan oh. Byaccaccing kae hopya oh, minmin tuh mih ryalaw mee kha phe a mue vae hae.
3 Thuasalama ryachi bawmnaw na pya vae oh ze nae ranglang kuih nynh a cyipaw kha nae voilang kuih la nysah nan oh.
4 Tuhteze nynh ryachi bawmnaw na pya oh paw kha hum nynh sanmah nyh lan khyh; te aphirute cyipaw a muihtupaw nae Paaw nynh amee kha ae pya cih oh.
Bawipaw Sawsangnaw
(Luk 11.2-4)
5 “Te saw na sang vae oh ze thyaruh hae hawte la cyih nan oh; pawccecize minmin tuh sinakok hae kya te laanpi hae atungkunaw kya ccungccaw hae nynh yn muih hae sah cite thadyn lante sawsang a ry hae. Byaccaccing kae hopya oh, minmin tuh mih ryalaw mee kha phe a mue vae hae.Ref 6.5: Luk 18.10-14
6 Thuasalama saw na sang vae oh ze nae khaan lungkhu lang tee oh lah nae thuakaw kha khaw oh lah, muih kho leipaw kya a umpaw nae Paaw kalan khe sawsang oh; te aphirute cyipaw a muihtupaw nae Paaw nynh amee kha ae pya cih oh.
7 “Thuasalama saw na sang vae oh ze Pachia beik lei hae paw nynh a cyi hae hawte accakaepaw bya patae la ho nan oh; pawccecize minmin nynh patae a ho hae liate oun thaepah hua cih cite a tuaku hae.
8 Tukeiccuze nanning tuh minmin hawte cyihbua nan oh; pawccecize nae Paaw nynh nanning elang aho-aboupaw kha na ngia maw oh ze phe a ny vae.
9 “Tukeiccuze hynhcite sawsang oh:
Vaawlang khua umpaw kaening Paaw,
na min sawtuanaw um sah.
10 Na peenaw thua ccavae sah.
Vaawlang khua kya
na rynaw rae athua hawte
laephi vawlan mah
raebua thua sah.
11 Nin takyh kae aepaw
looh atunin oun pya.
12 Ming hae nynh kae tungvaw
a sei hae paw kha
kae ngaethya hae hawte
kae seinaw kha
oun ngaethyabua.
13 Tuhounaw lungkhu lang
oun cciasah nan,
ahoy leipaw kyate
oun khumtua.note6.13 Abang Ccathyaa hae kya tuh, ‘Peenaw kaw te lesaenaw te phu-enaw kha na kya zungzae a um; Amen,’ cite biachihpaw a um.
14 Nanning nynh ccungccaw hae cyiseinaw kha na ngaethya oh ze vaawlang umpaw nae Paaw nynh mah ae ngaethya cih oh.Ref 6.14-15: Mar 11.25-26
15 Thuasalama ccungccaw hae cyiseinaw kha na ngaethya khyh oh ze, nae Paaw nynh nae cyiseinaw kha ae ngaethya lan khyh oh.
Looh-ae Sungnaw
16 “Looh-ae na sung oh ze, thyaruh hae hawte a ngaethahpaw maesue te la um nan oh; pawccecize minmin tuh looh-ae a sung hae paw kha ccungccaw hae nynh oun nyh hae sah cite mih maesue te a langsaku hae. Byaccaccing kae hopya oh, minmin tuh mih ryalaw mee kha phe mue vae hae.
17 Thuasalama nanning tuh looh-ae na sung vae oh ze nae lu kha chitui thuhkuh oh lah, nae maelahkuh oh.
18 Tuhteze tuh ming hae nynh looh-ae na sung oh paw kha ae nyh lan khyh oh; thuasalama muih kho leinaw kya a umpaw nae Paaw nynh ae nyh cih oh; te aphirute cyipaw a muihtupaw nae Paaw nynh amee kha ae pya cih oh.
Vaawlang kya Sisua
(Luk 12.33-34)
19 “Laehaw te chihhang nynh a ronaw hae te miruh hae nynh kiabia hae zah a runaw hae laephi vawlan nae sisua kha ccykuh nan oh.Ref 6.19: Jas 5.2-3
20 Laehaw te chihhang nynh a ro leinaw hae, miruh hae nynh mah a kiabia leinaw hae te a ru leinaw hae vaawlang khua khe nae sisua kha ccykuh oh.
21 Pawccecize nae sisua umnaw kya nae thinlung mah a umbua cih.
Pyn kya-e Awnaw
(Luk 11.33-36)
22 “Mit tuh pyn kya-e maeekhua nynh thua; tukeiccuze na mit tuh ahoy lanze na pyn balyn tuh awnaw te phe beih cih.
23 Thuasalama na mit ahoy khyh ze na pyn balyn tuh mohnaw te phe beih cih. Tukeiccuze nang na kya umpaw awnaw tuh mohnaw athua lanze tuh-e mohnaw tuh pawcih baban mou ale!
Bawi Lu Ning Ryalawpyanaw
(Luk 12.22-34)
24 “Hum ccungccaw nynh sanmah bawi lu ning ryalawpah kho khyh; pawccecize bawi lu kheit kha a hua cih zah lu kheit kha a sungsah cih; tuhkhyhze lu kheit kalan a pan cih zah lu kheit kha pawlangria lan khyh. Nanning nynh Pachia rya te phuasui rya parouhte na lah kho khyh oh.
25 “Tukeiccuze kae hopya oh, pawmou kae ae cih, pawmou kae neih cih cite nae hiinnaw hanlan nae lungvawsaw nan sah; paw boeining mou kae lawkuh cih cite nae pyn elang nae lungvawsaw nan sah. Hiinnaw tuh looh laeze sunghua khyh tou? Pyn tuh boeining laeze sunghua khyh tou?
26 Vaawlang e pavaw hae khuh dotua oh! Minmin tuh ccacii vuakuh khyh hae, looh mah rue khyh hae, byng kya mah ruinkuh khyh hae; tuhzemah vaawlang umpaw nae Paaw nynh minmin kha looh a dang hae. Nanning tuh minmin laeze patae na sunghua khyh oh tou?
27 Nanning lakuze hummou a lungvawsawnaw liate a hiinnaw ccyh kha dyntari san a saesakuh khopaw a um?
28 Tukeiccuze pawccemou boeining elang nae lungriathae? Ramkaw e lili haetapaw ku hae kha pawcihte nynh a lethung hae cipaw tuatua oh; minmin tuh ryalah khyh hae, laaw mah sukuh khyh hae.
29 Tuhzemah kae hopya oh, myarya a hoirumpaw Solomon nynh heize lili paw pawkheit tuhte apuithya lan ccaankuh kho khyh.Ref 6.29: 1Si 10.4-7; 2Sh 9.3-6
30 Tukeiccuze, pou zynnaw a zya hae paw nanning, atunin hiin zah awkhualan takuamaee lungkhu lang phung athuapaw ramkaw e lonua kha heize Pachia nynh tuhcite a ccaan lanze, nanning kha tuhlaeze houh ae ccaan lan khyh oh tou?
31 Tukeiccuze, ‘Pawmou kae ae cih? Pawmou kae neih cih? Paw boeining mou kae lawkuh cih?’ cite nae lungriathae nan sah.
32 Pawccecize hynh-e uccaw hae balyn tuh lawki hae nynh a ccung hae paw nynh thua; vaawlang umpaw nae Paaw nynh hynh-e uccaw hae balyn tuh nae hanlan aho cipaw phe a ny.
33 Pachia peenaw te a dingnaw kha masaty ccung oh, te hynh-e uccaw hae balyn kha pyachih na thua cih oh.
34 “Tukeiccuze awkhualan hanlan nae lungriathae nan sah, pawccecize awkhualan nynh amaw elang a lungriathaekuh cih. Atunin e lungriathaenaw tuh atunin hanlan phe azaw.