5
Mua Vaw Ccangpyanaw
(5.1—7.29)
1 Jesu nynh ccungccaw zapi kha he a muih hae te, mua lang kaethung zah a haung; a zuitu hae tuh amaw kalan oun thua hae.
2 Te a byaho kha tho zah minmin kha a ccangpya hae:
3 Thinlung zakawsangsakuh hae paw tuh lungtua hae paw nynh thua; pawccecize vaawlang peenaw tuh minmin kya-e nynh thua.
4 A rah a khui hae paw tuh lungtua hae paw nynh thua; pawccecize minmin tuh soihbia athua cih hae.Ref 5.4: Isa 61.2
5 Lungne hae paw tuh lungtua hae paw nynh thua; pawccecize minmin tuh laephi rho a ccou cih hae.Ref 5.5: Sam 37.11
6 Dingnaw kha vuelaw tuihaw hawte a ry hae paw tuh lungtua hae paw nynh thua; pawccecize mih rynaw kha ccingsah athua cih.Ref 5.6: Isa 55.1-2
7 Ngaethyaumsahnaw a hoi hae paw tuh lungtua hae paw nynh thua; pawccecize minmin tuh ngaethyaumsahnaw kha a mue cih hae.
8 Thinlung athyaa hae paw tuh lungtua hae paw nynh thua; pawccecize minmin tuh Pachia kha a muih cih hae.Ref 5.8: Sam 24.3-4
9 Daenaw raetu hae tuh lungtua hae paw nynh thua; pawccecize minmin tuh Pachia ccaaw hae cite ko athua cih hae.
10 Dingnaw keiccuze tuaasahnaw a ing hae paw tuh lungtua hae paw nynh thua; pawccecize vaawlang peenaw tuh minmin kya-e nynh thua.Ref 5.10: 1Pe 3.14
11 “Kae ka keiccuze nanning kha ae sarya oh, ae tuaa ae sah oh zah ahme lei lante ahoy leipaw hynbya aphuinphuin ae be oh ze, nanning tuh lungtua hae paw nynh na thua oh.Ref 5.11: 1Pe 4.14
12 Nae lungtua sah lah nae lungpaw sah, pawccecize vaawlang khua kya nae ryalaw mee tuh ale; pawccecize nanning maw e profeh hae kha mah minmin nynh tuhmaminte a tuaa a sah hae.Ref 5.12: 2Sh 36.16; Loc 7.52
Loi te Awnaw
(Mar 9.50; Luk 14.34-35)
13 “Nanning tuh laephi loi nynh na thua oh; thuasalama loi nynh a enaw kha a zo ze pawcihtemou esah thui kho athua ung cih? Pawpaw elang sanmah hoy vae lan khyh, dae vua lan zah syde lanpaw nynh hung athua vae.
14 “Nanning tuh laephi awnaw nynh na thua oh. Mua vawlan sakpaw khua tuh thuruh kho thua khyh.Ref 5.14: Joh 8.12, 9.5
15 Humhung nynh mah maeekhua kha aw zah ke khung boi khyh, maee awnawpaw vawlan khe nung zah inn lungkhu um hae paw balyn kha awnaw a pya hae.Ref 5.15: Mar 4.21; Luk 8.16, 11.33
16 Tuhawte nae awnaw kha ccungccaw hae malang khe awsah oh, tuhteze nynh ahoypaw nae ryalaw kha a muih cih hae zah vaawlang umpaw nae Paaw kha a phu-esah cih hae.Ref 5.16: 1Pe 2.12
Kawbya Ccingnaw
17 “Kawbya tuhkhyhze profeh hae bya ro lan nynh kae hynh yn thua cite tua nan oh; kae tuh ro lan kae thua khyh, ccingsah khylan nynh kae thua.
18 Pawccecize byaccaccing kae hopya oh, vaaw te lae a um lungkhu tuh kawbya abalynte accing makhia kawbya kya-e ccaw ccangkheit, ccapyh suapaw ccaw kha sanmah roh lan khyh.Ref 5.18: Luk 16.17
19 Tukeiccuze humhung zemah hynh-e kawbya hae kyaze adih huapaw ccangkheit kha lawe zah ming hae kha mah tuhcite a ccangpah hae paw tuh vaawlang peenaw kya adih huapaw lang a tang cih; thuasalama humhung zemah tuh-e tuh zui zah ming hae kha a ccangpah hae paw tuh vaawlang peenaw kya alepaw lang a tang cih.
20 Pawccecize kae hopya oh, nae dingnaw nynh kawbya sazae hae te Farasi hae dingnaw kha a lawe khyh lanze vaawlang peenaw kya papin na tee lan khyh oh.
Thinrianaw
21 “ ‘Ccungccaw na theih lan khyh, humhung zemah ccungccaw a theihpaw tuh byapianaw kalan thuakhae athua cih,’ cite langmawlya e ccungccaw hae a hopya hae paw kha na thae vae oh.Ref 5.21: Exo 20.13; Deu 5.17
22 Thuasalama kae hopya oh, humhung zemah a uno kha a thinrianuapawnote5.22 Abang Baebu kya tuh ‘akonglang um leite a thinrianuapaw’ cite a um. tuh byapianaw kalan thuakhae athua cih, te humhung zemah a uno kha, a saryapaw tuh byapianaw kalan thuakhae athua cih, te humhung zemah a uno kha ‘Nang tuh mingaee,’ a cih paw tuh hell maee lungkhu lang ccaw lan angaekuhpaw nynh thua.
23 Tukeiccuze silawhang kalan na lasung kha nae ccyng lyakhe na uno nynh na tungvaw a thinriapaw kha na nyku ze,
24 silawhang malang khe na lasung kha nungsyate la cceih lah, na uno te ccawkunaw na raety koute bua yn cceih lah na lasung kha pya.
25 Nang ae rawsetupaw ryte tazae zung lang na ccia lya oh khe, arangte ccawkuh oh, tuhkhyhze ae rawsetupaw nynh byapiatu kalan ae ah cih zah byapiatu nynh thong uktu kalan ae ah cih, te nang kha thong ae saw cih hae.
26 Byaccaccing kae hopya, na rung lanpaw nyathya phuapia kha na pya mawlaezung thonginn kyate na pou lan khyh.
Milae Zu Milae Vawpaw Seikhaenaw
27 “ ‘Milae zu milae vawpaw kya na sei lan khyh,’ cite a ho hae paw kha na thae vae oh.Ref 5.27: Exo 20.14; Deu 5.18
28 Thuasalama kae hopya oh, humhung zemah nopi lu kheit kha seikhae rynaw mit te a do lanze a thinlung kya tuh-e nung kha phe a seikhae vae.
29 Te na ranglang mit nynh ae seisah ze, poh khoi lah dae vua; pawccecize na pyn balynte hell lungkhu lang vua na thua lae tuh na pyn kya-e hae ccangkhakheit na shungpaw tuh na hanlan ahoyhua.Ref 5.29: Mat 18.9; Mar 9.47
30 Te na ranglang kuih nynh ae seisah ze thoh tya lah dae vua; pawccecize na pyn balynte hell lungkhu lang vua na thua lae tuh na pyn kya-e hae ccangkhakheit na shungpaw tuh na hanlan ahoyhua.Ref 5.30: Mat 18.8; Mar 9.43
Zu Myanaw
(Mat 19.9; Mar 10.11-12; Luk 16.18)
31 “ ‘Humhung zemah a zu kha a mya lanze tuh-e nung tuh myakunawpaw ccaw kha pya sah,’ cite a ho vae hae.Ref 5.31: Deu 24.1-4; Mat 19.7; Mar 10.4
32 Thuasalama kae hopya oh, humhung zemah ohhuakunaw keiccu thua leite a zu kha a mya ze tuh-e nung kha milae vawpaw kya a seisahpaw nynh thua; te humhung zemah a mya hae paw nopinung kha zu lang a umkhaepaw tuh milae zu a seikhaepaw nynh thua.Ref 5.32: Mat 19.9; Mar 10.11-12; Luk 16.18; 1Ko 7.10-11
Byakinkupaw
33 “Tukoute, ‘Ahme leite bya na kinkuh lan khyh, Bawipaw kya bya na kinkupaw kha na cyih ccaccing cih,’ cite langmawlya e ccungccaw hae nynh a hopya hae paw kha na thae vae oh.Ref 5.33: Lev 19.12; Nam 30.2; Deu 23.21
34 Thuasalama kae hopya oh, thyalawkute kharouh byakinkuh nan oh, vaawlang phyate mah byakinkuh nan oh, pawccecize vaawlang tuh Pachia kya-e bawitungkhung nynh thua.Ref 5.34: Jas 5.12; Isa 66.1; Mat 23.22
35 Laephi phyate mah byakinkuh nan oh, pawccecize laephi tuh a ccusy nynh thua; Jerusalem phyate mah byakinkuh nan oh, pawccecize Jerusalem tuh alesaepaw Siapharan kya-e khuapi nynh thua.Ref 5.35: Isa 66.1; Sam 48.2
36 Na lu phyate mah byakinkuh nan, pawccecize na sang ccangkheit sanmah na rawsah kho khyh zah na mansah kho khyh.
37 Thuasalama na hopaw tuh athua ze athua, athua khyh ze thua khyh na ci cih; pawccecize pawpaw bya zemah hynh-e hae laelan tuh ahoy leipaw kyate nynh yn thua.
Liarunaw
(Luk 6.27-36)
38 “ ‘Mit ccangkheit hanlan mit ccangkheit, te haw ccangkheit hanlan haw ccangkheit’ cite a ho hae paw kha na thae vae oh.Ref 5.38: Exo 21.24; Lev 24.20; Deu 19.21
39 Thuasalama kae hopya oh, hoyleinaw a raepaw kha liaru nan oh, lukhakheit nynh na ranglang byaki kha ae bia ze, na voilang byaki kha mah la tuapakuh.
40 Te lukhakheit nynh tazaeccoi ae ry zah na angki kha a lawku ze, na angkile kha mah la lawku bia sah.
41 Te lukhakheit nynh me kheit ccia lan ae riase ze amaw ryte me ning la cceih oh.
42 Lukhakheit nynh nang ae ngiaku ze la pya, te lukhakheit nynh nang ae koii ry ze la kang nan.
43 “ ‘Na innpaw kha na sungsah cih zah na rhawpaw kha na hua cih,’ cite a ho hae paw kha na thae vae oh.Ref 5.43: Lev 19.18
44 Thuasalama kae hopya oh, nae rhaw hae kha sungsah oh, nanning ae tuaa ae sah oh paw hanlan sawsangpah oh.
45 Tuhteze nynh vaawlang umpaw nae Paaw a ccaaw hae lang na tang cih oh; pawccecize ahoy leipaw te ahoypaw ccungccaw tungvaw a khuanin kha pawsah zah adingpaw te ading leipaw tungvaw khuaa a rawsah.
46 Pawccecize nanning ae sungsah oh paw kyalya kha na sungsah oh ze amee pawmou na mue cih oh? Ngunto khoi hae paw nynh heize tuhte cyih khyh hae tou?
47 Te na uno hae kyalya kha na beih hae ze ming hae laeze pawmou na cyihua? Zenta hae nynh heize tuhte cyih khyh hae tou?
48 Tukeiccuze vaawlang umpaw nae Paaw tuh accing hawte nanning mah la ccing oh.Ref 5.48: Lev 19.2; Deu 18.13