4
Jesu Tuhounaw
(Mar 1.12-13; Luk 4.1-13)
1 Te Satan nynh a tuhou ccaw cite Muisaw nynh Jesu kha ramkaw lang a cciakhae.Ref 4.1: Heb 2.18, 4.15
2 Jesu tuh nin sung pali te zi sung pali looh-ae sung zah myarya a vuelaw.
3 Te tuhoutu tuh a kalan yn thua zah, “Pachia Ccapaw na thua ze hynh-e lung hae hynh sanlou lang tang lan kawpyatua,” a cipya.
4 Thuasalama Jesu nynh, “Ccathyaa kya,
‘Ccungccaw tuh
sanlou kyalya te hiin khyh,
thuasalama Pachia munglae kyate
yn toikuhpaw bya miakaw
te nynh a hiin,’ cite azeikuh,” a cipya.Ref 4.4: Deu 8.3
5 Te Satan nynh Jesu kha athyaapaw khuapi lungkhu lang cciakhae zah beikinn ahang huanaw ccukaly kya a umsah.
6 Te Jesu kha, “Nang tuh Pachia Ccapaw na thua ze toiku tua; pawccecize Ccathyaa kya,
‘Nang te asekuh lante Pachia nynh
a vaawccungccaw hae kha
kaw a pya cih hae zah,
lung kya na ccu na thuhku khyh nawlan
minmin nynh mih kuih te
ae hoeilang cih hae,’ cite azeikuh,” a cipya.Ref 4.6: Sam 91.11-12
7 Jesu nynh, “Ccathyaa kya, ‘Bawipaw na Pachia kha syntawtua nan,’ cite bua azeikuh,” a cipya.Ref 4.7: Deu 6.16
8 Tukoute Satan nynh myarya hangpaw mua langkhe kaekhae zah laephi peenaw hae te phu-e lesaenaw balyn kha muihsah zah,
9 “Bakhungte nae beik zetuh hynh-e hae balyn hynh marya kae pya cih,” a cipya.
10 Tetuh Jesu nynh, “Satan, cceih ccavae! Pawccecize Ccathyaa kya,
‘Bawipaw na Pachia kha
beik lah amaw kyalya kha
ryalawpah,’ cite azeikuh,” a cipya.Ref 4.10: Deu 6.13
11 Te Satan nynh Jesu kha a cciataw; te vaaw hae nynh oun thuanua hae zah amaw kha a do-oih hae.
Galilee kya Jesu Ryalaw Thonaw
(Mar 1.14-15; Luk 4.14-15)
12 Johan kha thong a saw hae cipaw Jesu nynh he a thae tuh Galilee pee lang a cceih.Ref 4.12: Mat 14.3; Mar 6.17; Luk 3.19-20
13 Te Nazareth khua kha cciataw zah Zebulun phin te Naftali phin hae ram kya rili kin umpaw Kapernaum khua khe a um.Ref 4.13: Joh 2.12
14 Tuh-e acyikupaw tuh profeh Isaiah nynh a hopaw kha accingnawpaw nynh thua. A hopaw tuh:
15 “Zebulun ram te Naftali ram,
rili kin e laanpi pe,
Jordan vaw khuraw,
Zenta hae umnaw Galilee ram:Ref 4.15-16: Isa 9.1-2
16 Mohnaw kya umpaw
ccungccaw hae nynh
awnaw alepaw kha
a muih vae hae,
chinaw mynlyh ram lungkhu
a um hae paw kya
awnaw yn langkuh vae,” a ci.
17 Tuin ccyh kyate Jesu nynh, “Ngaesikuh oh, pawccecize vaawlang peenaw tuh anae vae,” cite phungho lan a tho takaw vae.Ref 4.17: Mat 3.2
Masaty Jesu Zuitu hae Konaw
(Mar 1.16-20; Luk 5.1-11)
18 Te Jesu nynh Galilee Rili kin kya a ccia lyakhe Peter a ci hae paw Simon te a neitaw Andru, ngasaw kyngtu hae uno lu ning, rili lungkhu mia a vua hae paw kha a muih.
19 Te Jesu nynh minmin kha, “Kae hynh yn zui oh lah ccungccaw kyngtu lang kae rae cih oh,” a cipya hae.
20 Vaekheihmawte mih mia kha cciataw hae zah amaw kha a zui hae.
21 Tuin kyate cceih zah ccangpaw uno lu ning, Zebedi ccapaw hae James te a neitaw Johan tuh mih paaw Zebedi ryte kohlung kya mih mia a thuekuh hae paw kha muih zah a ko hae.
22 Vaekheihmawte kohlung te mih paaw kha cciataw hae zah Jesu kha a zui hae.
Ccangpya, Phungho, Dansah
(Luk. 6.17-19)
23 Jesu tuh Galilee pee balyn khe khua po ccong zah mih sinakok hae kya ccangpah hae zah peenaw thehoypaw bya kha a hopya hae, ccungccaw hae kya-e ccinaw aphuinphuin te ccihawnaw aphuinphuin kha a dansah.Ref 4.23: Mat 9.35; Mar 1.39
24 Tukeiccuze a minthaannaw tuh Siria pee balyn po a pazaekuh; ccihawnaw te ccinaw aphuinphuin a teing hae paw, raerangsaro bahkuh hae paw, a dung hae paw te mih kuihccuchih hae paw kha amaw kalan oun cciakhae hae zah minmin kha marya a dansah hae.
25 Te Galilee pee kyate, Dekapolis pee kyate, Jerusalem kyate, Judea pee kyate, Jordan vaw khuraw langte oun thua hae paw ccungccaw zapi myarya lung hae paw nynh amaw kha a zui hae.