25
Liaccaw Lu Haw Tousenaw
“Vaawlang peenaw tuh zudy ccangvaepaw kha cciadue lan mih maeekhua kha ccyngkuh hae zah a cceih hae paw liaccaw lu haw te nynh aloku.Ref 25.1: Luk 12.35 Minmin kyaze lu pangaw tuh haw hae zah lu pangaw tuh a ngaee hae. A ngaee hae paw nynh mih maeekhua kha ccyngkuh hae zah zine ccyngku bia khyh hae. Thuasalama a haw hae paw nynh mih maeekhua ryte abawng kya zine kha a ccyngku bia hae. Zudy ccangvaepaw tuh khaw yn ro keiccuze minmin balyn tuh mih ngawthua zah a ihtheih hae. Ziraccyng khe, ‘Dotua oh! Zudy ccangvaepaw yn thua vae; amaw kha cciadue khylan oun toikuh ccavae oh,’ cite roi accae. Tetuh tuh-e liaccaw hae balyn tuh tho hae zah mih maeekhua kha a paccynku hae. A ngaee hae paw nynh a haw hae paw kha, ‘Nae zine abang kha oun pyabua oh, pawccecize kae maeekhua tuh achih vae cih,’ a cipya hae. Thuasalama a haw hae paw nynh, ‘Tuhte thua khyh! Kae hanlan te nae hanlan zaw lan khyh, a zua hae paw kalan la cceih oh lah la rekuh oh,’ a cipya hae. 10 Te minmin nynh zine reku lan a ccia lya hae khe, zudy ccangvaepaw tuh yn thua vae; paccynkute um hae paw tuh amaw ryte zudy poi kalan tee hae zah thuakaw kha phe a khaw vae hae. 11 Tukoute ccangpaw liaccaw hae tuh mah oun thua hae zah, ‘Bawipaw, bawipaw, kaening mah oun hungpah bua!’ a ci hae.Ref 25.11-12: Luk 13.25 12 Thuasalama aning nynh, ‘Byaccaccing kae hopya oh, nanning kha kae nyh khyh oh,’ cite a khung hae. 13 Tukeiccuze nanning nynh Ccungccaw Ccapaw yn thuanaw lanpaw nin te ccyh kha na ny khyh oh keiccuze phang la ngaw oh.
Ryalahtu Lu Thum Tousenaw
(Luk 19.11-27)
14 “Vaawlang peenaw tuh ccungccaw lu kheit nynh asawnaw ram lang khuaccong lan noukuh zah a see hae kha ko hae zah a uccaw hae kha a rinsah hae paw hawte nynh athua. 15 Mih cyi khonaw ciate a pyasya hae, lu kheit kha talent ccangpangaw a pya, lu kheit kha ccangning a pya, lu kheit kha ccangkheit a pya; tukoute khuaccong lan a cceih. 16 Talent ccangpangaw a muepaw nynh cceih kangmaw zah kungku zah ccangpaw talent ccangpangaw amia a mue. 17 Tuhawte talent ccangning a muepaw nynh mah ccangpaw talent ccangning amia a mue. 18 Thuasalama talent ccangkheit a muepaw nynh cceih zah laephi kha thae zah a bawipaw phua kha zya a thuruh. 19 “Ccyh khaw aro koute tuh-e see hae mih bawipaw tuh yn thua zah minmin ryte ccazing a tua hae. 20 Phua talent ccangpangaw a muepaw nynh yn thua zah ccangpaw talent ccangpangaw kha yn ccyngbia zah, ‘Bawipaw, kae kha talent ccangpangaw nae pya; dotua, amia talent ccangpangaw ka mue chih,’ a cipya. 21 A bawipaw nynh tuh-e paw tuh, ‘Ahoy, a lungzipaw see hoypaw, uccaw beihtarawpaw kya na lungzi keiccuze uccaw patae a rintu lang kae nung cih, na bawipaw kya-e lungtuanaw lungkhu lang teebua,’ a cipya. 22 Talent ccangning a muepaw mah yn thua zah, ‘Bawipaw, kae kha talent ccangning nae pya; dotua, ccangpaw talent ccangning amia ka mue,’ a cipya. 23 A bawipaw nynh, ‘Ahoy, a lungzipaw see hoypaw, uccaw beihtarawpaw kya nang tuh na lungzi keiccuze uccaw patae a rintu lang kae nung cih; na bawipaw kya-e lungtuanaw lungkhu lang teebua,’ a cipya. 24 Te talent ccangkheit a muepaw nynh yn thua zah, ‘Bawipaw, nang tuh myarya a reipaw ccungccaw, na ccouku leinaw kya na ruekuhpaw te ccacii na vuaku leinaw kya na ruekuhpaw nynh na thua cipaw ka ny. 25 Tukeiccuze ka rih, te ka cceih zah na phua kha laephi kya ka thuruh; dotua, na uccaw tuh hein kya phang a um,’ a cipya. 26 A bawipaw nynh, ‘Seethya seeruhpaw te thawnawpaw! Ka ccouku leinaw kya ka ruekupaw te ccacii ka vua leinaw kya ka ruepaw kha na nyh tou? 27 Tukeiccuze nang nynh ka phua kha ban kya na nung lan accan, tuhteze tuh he kae thua te ka phua tuh ato ryte ka mue cih. 28 Tukeiccuze phua kha a kyate lah oh lah phua talent ccanghaw a hoipaw kha pya oh. 29 Pawccecize a hoipaw ccungccaw miakaw kha pyachih athua cih zah patae a hoi cih; thuasalama a hoi leipaw ccungccaw kya-e a hoi thypaw kha heize lawpya athua cih.Ref 25.29: Mat 13.12; Mar 4.25; Luk 8.18 30 Nanning nynh ccungkia leipaw see kha rawnaw te hawzynaw a umnaw atolang mohnaw lungkhu lang dae vua oh,’ a cipya hae.Ref 25.30: Mat 8.12, 22.13; Luk 13.28
Tuu te Miaa
31 “Ccungccaw Ccapaw tuh a vaaw hae balyn ryte a phu-enaw te he yn rung te, a phu-enaw bawitungkhung kya yn haung cih.Ref 25.31: Mat 16.27, 19.28 32 Te minphuin hae balyn kha a malang khe yn pum cih hae; tuurinpaw nynh a tuu hae kha miaa hae kyate a phia hawte aning nynh minmin kha yn phia cih hae. 33 Tuu hae kha a ranglang yn nung cih hae zah miaa hae kha a voilang yn nung cih hae. 34 Tukoute siapharan nynh a ranglang um hae paw kha, ‘Ka Paaw kya-e lungtua hae paw nanning, rang oh; laephi athonaw aleihpaw kyate nae hanlan paccynpaw peenaw rho hynh ccou oh. 35 Pawccecize ka vuelaw lya looh nae dang oh, ka tuihaw lya tui nae niasah oh, mikhia lang ka tang lya innccong nae ua oh; 36 Ka sasete ka um lya boeining nae pya oh, ka cci lya nae do-oih oh, thonginn ka um lya nae via oh,’ yn cipah cih hae. 37 Miding hae nynh, ‘Bawipaw, hohtuh lya mou na vuelawpaw kae muih zah looh kae dang; na tuihawpaw kae muih zah nia lanpaw kae pya? 38 Hohtuh lya mou mikhia lang na tangpaw kha kae muih zah kae inn kae thuasah; na sasete na um zah boeining kae pya? 39 Hohtuh lya mou na ccipaw te thonginn na umpaw kha kae muih zah kae via?’ cite oun khung cih hae. 40 Siapharan nynh, ‘Byaccaccing kae hopya oh, e ka uno hae kyaze adih huapaw lu kheit tungvaw na cyi oh paw miakaw tuh ka tungvaw na cyi oh paw nynh thua,’ a cipah cih hae. 41 Te a voilang um hae paw kha mah, ‘Thyalaw athua hae paw nanning, ka kyate cceih oh lah, Satan te a vaaw hae hanlan paccynpyapaw zungzae aruapaw maee lungkhu langkhe cceih oh. 42 Pawccecize ka vuelaw lya looh nae dang khyh oh, ka tuihaw lya nia lanpaw nae pya khyh oh. 43 Mikhia lang ka tang lya nae inn nae thuasah khyh oh; ka sasete ka um lya boeining nae pya khyh oh; ka cci lya te thonginn ka um lya nae via khyh oh,’ cite yn ci cih hae. 44 Tetuh minmin nynh, ‘Bawipaw, hohtuh lya mou na vuelawpaw, na tuihawpaw, mikhia lang na tangpaw, sasete na umpaw, na ccipaw, thonginn na umpaw kha kae muih zah do-oih leite kae um?’ cite oun khung cih hae. 45 Tetuh siapharan nynh, ‘Byaccaccing kae hopya oh, e hae lakuze adih huapaw lu kheit tungvaw na cyi khyh oh paw miakaw kha ka tungvaw na cyi khyh oh paw nynh thua,’ cite yn khung cih hae. 46 E hae tuh zungzae detahnaw lungkhu lang a cceih cih hae, thuasalama miding hae tuh zungzae hiinnaw lungkhu lang a cceih cih hae,” a ci.Ref 25.46: Dan 12.2