24
Athangnaw Kong Muihsahnaw
(Mar 13.1-2; Luk 21.5-6)
1 Jesu nynh beikinn kyate pou zah a ccia lyakhe a zuitu hae nynh a kalan oun cceih hae zah beikinn kya-e inn hae kha a muihsah hae.
2 Jesu nynh, “E hae balyn hynh na muih khyh oh tou? Byaccaccing kae hopya oh, hein kyahin lung ccangkheit vawlan ccangkheit a khangthykuh lei lan ciate khaleih tingsah bung athua cih,” a cipya hae.
3 Jesu tuh Oliv Mua vawlan a haung lyakhe zuitu hae nynh mih makhaete a kalan oun thua hae zah, “E uccaw hae hynh hohtuhmou yn cyihkuh cih? Nae thuanaw lanpaw te laephi she athangnaw lanpaw hynh muihsahnaw pawmou yn langkuh cih? Kaening hynh oun hopah bua,” a ci hae.
4 Jesu nynh, “Humhung nynh mah ae ling khyh nawlan oh la raeringkuh oh.
5 Pawccecize ccungccaw patae nynh ka min te oun thua cih hae zah, ‘Kae tuh Messiah nynh ka thua,’ oun ci cih hae zah ccungccaw patae kha oun ling cih hae.
6 Nanning nynh rhawtukkunaw kong te rhawtho lanpaw kong kha nae thae cih oh; tuhzemah nae thinphang nan sah; pawccecize hynh-e uccaw hae balyn tuh oun cyihkuh hahe cih, thuasalama athangnaw tuh thua loh khyh.
7 Pawccecize minphuin phuin kheit te phuin kheit, ram kheit te ram kheit oun rhawkuh cih hae; ram takyh kya ccakan yn ccih cih zah innry yn suekuh cih.
8 E hae balyn tuh neitangia accih takawpaw hawte nynh thua.
9 “Te ccungccaw hae nynh nanning kha vawrivawsaw nung khylan ae ap cih oh zah ae theih cih oh; ka min keiccuze minphuin hae balyn nynh ae hua cih oh.Ref 24.9: Mat 10.22
10 Te ccungccaw patae nynh mih zynnaw kha oun vua cih hae, lu kheit te lu kheit yn pheekuh cih hae zah lu kheit te lu kheit yn huakuh cih hae.
11 Lingthya profeh hae patae oun langkuh cih hae zah ccungccaw patae kha oun ling cih hae.
12 Hoyleinaw alung keiccuze ccungccaw patae kya-e sungsakunaw tuh yn zyabung cih.
13 Thuasalama athangnaw cia atynpaw tuh khum athua cih.Ref 24.13: Mat 10.22
14 E peenaw thehoypaw hynh minphuin hae balyn kalan ccaekia lang laephi pynpi kya oun ho cih hae; tukoute athangnaw tuh yn thua cih.
15 “Tukeiccuze profeh Daniel nynh a la ho hawte, luathua-ae-ui lan umpaw rohtupaw nynh athyaapaw hmin kya a thadynpaw kha he nae muih oh te (Ccathyaa a riapaw nynh thaethya sah),Ref 24.15: Dan 9.27, 11.31, 12.11
16 Judea ram kya um hae paw nynh mua lang ccue hae sah.
17 Inn tungvaw a umpaw nynh inn lungkhu e uccaw kha law lan rungbung nan vae sah.Ref 24.17-18: Luk 17.31
18 Loo kya a umpaw nynh a boeining lawku khylan ki nan vae sah.
19 Tuin ccyh kya tuh ccaaw a poipaw nopi hae te matei zupaw nosi a hoipaw nopi hae hanlan ngaethya lan kou um!
20 Nanning na ccue ccyh oh tuh khuaccih ccyh te sabbath nin athua khyh nawlan saw la sang oh.
21 Pawccecize laephi athotakaw te atu cia a la um boi leipaw, nyalang mah a um vae cih leipaw myarya ccihpaw teingnaw tuh yn thua cih.Ref 24.21: Dan 12.1; Bya 7.14
22 Tuh-e accyh tuh dynsah khyh lanze humhung mah lue lan khyh, thuasalama popaw ccungccaw hae hanlan tuh-e accyh tuh dynsah athua cih.
23 Lukhakheit nynh, ‘Dotua! Hein kya nynh Messiah tuh a um!’ tuhkhyhze ‘Khuin kya nynh a um!’ ae cipya oh ze la zyn nan oh.
24 Pawccecize lingthya messiah hae te lingthya profeh hae oun langkuh cih hae zah athua kho ze alepaw muihsahnaw te ngaeangnaw kha oun langsakuh cih hae; ou khate popaw ccungccaw hae kha heize oun ling cih hae.
25 Ngae oh, nanning kha kae hopya ty vae oh.
26 Tukeiccuze minmin nynh, ‘Dotua! Messiah tuh ramkaw nynh a um,’ ae cipya oh ze la cceih nan oh. ‘Dotua! Aning tuh akhaan lungkhu nynh a um,’ ae cipya oh ze la zyn nan oh.Ref 24.26-27: Luk 17.23-24
27 Pawccecize khozaw tuh nithua langte yn laekuh zah niccaw lang cia a aw hawte Ccungccaw Ccapaw tuh yn thua cih.
28 Michi rhua a umnaw miakaw kya lantaw hae oun pumkuh cih hae.Ref 24.28: Luk 17.37
Ccungccaw Ccapaw Thuanaw
(Mar 13.24-27; Luk 21.25-28)
29 “Tuin ccyh kya-e teingnaw koute
vaekheihmawte khuanin tuh
yn moh cih zah sawpaw mah
yn aw vae lan khyh,
te awsi hae tuh vaawlui kyate
oun ccah cih hae zah
vaawlang e thungnaw hae balyn tuh
oun hy vae cih hae.Ref 24.29: Isa 13.10, 34.4; Eze 32.7; Joel 2.10, 31, 3.15; Bya 6.12-13
30 Tetuh Ccungccaw Ccapaw kya-e muihsahnaw kha vaawlang kya yn langkuh cih; laephi vaw e minphuin hae balyn tuh oun rah oun khui cih hae, te Ccungccaw Ccapaw tuh thungnaw te alesaepaw phu-enaw ryte vaawlang e maeking kya yn rungpaw kha oun muih vae cih hae.Ref 24.30: Dan 7.13; Zek 12.10-14; Bya 1.7
31 Te myarya ccaepaw mungkae roi ryte a vaaw hae kha yn saw cih hae zah amaw nynh a po hae paw kha minmin nynh laephi ki kipali kyate, vaawlang athangnaw san kheit kyate san kheit kyacia oun pum cih hae.
Thaeku Ku Tousenaw
(Mar 13.28-31; Luk 21.29-33)
32 “Thaeku ku kya-e tousenaw phungpaw hynh atu ccangku tua oh; aran tuh notazyh lan yn cih zah anaw he yn toih tuh hawnin anae vae cipaw na ny oh.
33 Tuhawte nanning nynh e uccaw hae balyn hynh he nae muih vae oh ze Ccungccaw Ccapaw yn thuanaw lanpaw tuh anae vae, thuakaw kin cia yn naekuh vae cipaw la nyh ccavae oh.
34 Byaccaccing kae hopya oh, e uccaw hae balyn acyiku kou makhia atu she e ccungccaw hae hynh zo lan khyh hae.
35 Vaaw te laephi tuh azo cih, thuasalama ka bya tuh zo lan khyh.
Nin te Ccyh Ny Thua Khyh
(Mar 13.32-37; Luk 17.26-30; 34-36)
36 “Thuasalama tuh-e nin te ccyh tuh hum nynh sanmah nyh khyh, vaawlang umpaw vaaw hae nynh mah nyh khyh hae, Ccapaw nynh mah nyh khyh, Paaw rou nynh a nyh.
37 Noah she lya hawte nynh Ccungccaw Ccapaw yn thuanaw ccyh tuh yn cyihkuh cih.Ref 24.37: Gen 6.5-8
38 Pawccecize tuipayn a ynku maw, Noah nynh sanphalung lungkhu lang a tee nin cia, ccungccaw hae tuh aete, niate, zudykute, zudypyakute a um hae.
39 Tuipayn nynh a lou maw hae cia pawte nynh yn cyihkuh cih cipaw nyh khyh hae; tuhawte nynh Ccungccaw Ccapaw yn thua ccyh mah yn cyihkuh cih.Ref 24.39: Gen 7.6-24
40 Tuin ccyh kya tuh loo kya um hae paw lu ning kyaze lu kheit kha law athua cih zah lu kheit tuh cciataw athua cih.
41 Sungsuh hae paw nopi hae lu ning kyaze lu kheit kha law athua cih zah lu kheit tuh cciataw athua cih.
42 Tukeiccuze nae Bawipaw tuh hohtuh nin nynh yn thua cih cipaw kha na ny khyh oh keiccuze paccynkute la ngaw oh.
43 Thuasalama e hynh nyh oh; inn hoitupaw nynh miruh yn thua lanpaw accyh kha a ny ze, miruh nynh a inn kha a kiabia khyh nawlan phang a ngaw cih.Ref 24.43-44: Luk 12.39-40
44 Tukeiccuze nanning mah raeringkute um oh, pawccecize na tua khyh oh ccyh lyakhe Ccungccaw Ccapaw tuh yn thua cih.
See Phuin Ning
(Luk 12.41-48)
45 “Tuhte athua lanze inn hoitupaw nynh a inn kya-e ccungccaw hae kha a uktu lang te accyh azaw vae ze looh a pyatu lang a nungpaw a lungzipaw te a hawpaw see tuh hummou athua?
46 Tuhte rya a lawpaw kha a bawipaw nynh yn thua zah a muihpyapaw see tuh lungtuapaw nynh thua.
47 Byaccaccing kae hopya oh, a bawipaw nynh tuh-e see kha a uccaw balyn a do-oihtu lang a nung cih.
48 Thuasalama see hoy leipaw nynh, ‘Ka bawipaw yn thuanaw ccyh tuh aro ung cih,’ cite a lungkaw te tua zah,
49 a ban hae see hae kha a bua hae, te a neih hae paw ryte aete niate a um vae.
50 Tuh-e see nynh a tua khyh ccyh te a ny khyh ccyh lyakhe a bawipaw tuh mang yn thua cih.
51 A bawipaw nynh tuh-e see tuh palae tui lan a pae cih zah thyaruh hae ryte a nungkheih cih hae; tuin kya rawnaw te hawzynaw a um cih.