21
Jesu Jerusalem lang A Tee
(Mar 11.1-11; Luk 19.28-40; Joh 12.12-19)
1 Jesu te a zuitu hae nynh Jerusalem lang naekuh hae zah Oliv Mua leihpaw Bethfeih khua he a thua hae tuh Jesu nynh zuitu lu ning kha saw hae zah,
2 “Nae malang umpaw khua langkhe la cceih oh lah, a khii hae paw lann pinung te lann taraw kha ccahe na la muih cih oh; tuh-e lann hae kha oun supah oh lah ka kalan oun sue oh.
3 Lukhakheit nynh ae khia oh ze, ‘Bawipaw nynh a peki,’ nae cipah cih oh; tetuh tuh-e paw nynh palou ae sawpah vae cih oh,” a cipya hae.
4 Hynh-e tuh profeh nynh a la hosyapaw kha accing nawlan nynh thua; a hosyapaw tuh:
5 “Dotua, na siapharan tuh
na kalan yn cceih cciamang;
aning tuh a lungnepaw thua zah,
lann kha yn ccikuh,
lann taraw kha yn ccikuh, cite
Zion ccanung kha
hopah oh,” acikuh.Ref 21.5: Zek 9.9
6 Zuitu hae nynh cceih hae zah Jesu nynh kaw a pya hae hawte a cyi hae.
7 Lann pinung te lann taraw kha oun thuakhae hae zah lann hae tungvaw khe mih boei hae kha de hae zah tuh-e vawlan khe Jesu nynh a cciku.
8 Myarya lungpaw ccungccaw zapi nynh mih uccaw hae kha laanpi kya a phaepya hae; mingccang hae nynh thingku kya-e thingnge hae kha bae hae zah laanpi kya a phaepya hae.
9 Jesu malang a cceih hae paw te a nulang a zuikuh hae paw zapi hae nynh,
“David Ccapaw, Hosanna!
Bawipaw min te yn thuapaw tuh
hythuaccou sah!
Ahang huanaw kya
Hosanna thua sah!”
cite a sia hae.Ref 21.9: Sam 118.25, 26
10 Jesu nynh Jerusalem lang he a tee tuh, khualae balyn tuh ngaluin-ngaluin ccae zah, “E paw hynh hummou athua?” a ci hae.
11 Ccungccaw zapi nynh, “E paw tuh Galilee ram e Nazareth paw profeh Jesu nynh thua,” a ci hae.
Jesu nynh Beikinn A Ccikan
(Mar 11.15-19; Luk 19.45-48; Joh 2.13-17)
12 Jesu nynh Pachia beikinn lungkhu lang tee zah beikinn kya a zuatu hae te a retu hae balyn kha a dee hae; phuaru hae paw mih ccaboi te vahu zua hae paw kya-e dahungnaw hae kha dawleihpah hae zah,
13 “Ccathyaa kyaze,
‘Ka inn tuh sawsangnaw inn
ci athua cih,’ cite azeikuh;
thuasalama nanning nynh
miruh hae karung lang
na rae oh,” a cipya hae.Ref 21.13: Isa 56.7; Jer 7.11
14 Te mitzu hae te ccukhou hae nynh beikinn lang amaw kalan oun thua hae zah minmin kha a dansah hae.
15 Jesu nynh a raepaw ngaeangnaw hae te imua hae nynh beikinn kya, ‘David Ccapaw kya Hosanna thua sah,’ cite a sia hae paw kha, ranpibawi lepaw hae te kawbya sazae hae nynh he muih hae tuh mih thinria zah,
16 Jesu kha, “E imua hae nynh a ho hae paw tuh na thae tou?” a cipya hae. Jesu nynh, “Ou, ka thae;
‘Imua hae te matei zu hae paw
nosi hae munglae kyate
namaw thehoysahnaw kha
na paccyn vae,’
acikuhpaw kha na ria boi
khyh oh tou?” a cipya hae.Ref 21.16: Sam 8.2 (LXX)
17 Te minmin kha cciataw hae zah khualae te pou zah Bethani khua lang a cceih; te tuin kya a rya.
Thaeku Ku Thyalawnaw
(Mar 11.12-14; 20-26)
18 Awkhua khe khualae lang he a ki tuh a vuelaw vae.
19 Laanpi pe khe thaeku ku kha muih zah a ccianua, thuasalama a naw laelan paw sanmah muih khyh; tukeiccuze thaeku ku kha, “Papinmaw athae la thae boi nan vae!” a cipya. Te vaekheihmawte thaeku ku tuh karae arou.
20 Tuh-e tuh zuitu hae nynh a muih hae tuh mih ngaeangthua zah, “Thaeku ku hynh vaekheihmawte karae arou kangmaw rei!” a ci hae.
21 Jesu nynh minmin kha, “Byaccaccing kae hopya oh, lunghiinnaw hoi leite zynnaw na hoi oh ze, thaeku ku kya acyihkuhpaw kyalya thua leite, e mua hynh, ‘Nuekuh lah rili lungkhu lang phungkuh,’ na ci oh ze a phungkuh cih.Ref 21.21: Mat 17.20; 1Ko 13.2
22 Na zyn oh ze sawsang te na ngia oh paw miakaw kha na mue cih oh,” a cipya hae.
Jesu Kawhoinaw A Khia hae
(Mar 11.27-33; Luk 20.1-8)
23 Jesu nynh beikinn lungkhu lang tee zah a ccangpya lya hae khe, ranpibawi lepaw hae te piccan hae nynh a kalan oun cceih hae zah, “E uccaw hae hynh paw kawhoinaw te mou na cyi? E kawhoinaw hynh hum nynh mou ae pya?” cite a khia hae.
24 Jesu nynh khung hae zah, “Kae mah bya kaw kheit kae khia cih oh, aphi nae hopya oh ze, kae mah e uccaw hae hynh paw kawhoinaw te nynh ka cyi cipaw kae hopah ru cih oh:
25 Johan kya-e baptisma hynh paw kyate mou yn thua? Vaawlang tetou? Tuhkhyhze ccungccaw kyate tou?” cite a khia hae. Mimaw te mimaw bya eikuh hae zah, “Aening nynh, ‘Vaawlang kyate,’ ah ci oh ze, aning nynh, ‘Tuhteze pawccemou Johan kha na zyn khyh oh,’ oun ci cih.
26 ‘Ccungccaw hae kyate,’ ah ci oh ze, ccungccaw hae rawri lan a um; pawccecize ccungccaw balyn nynh Johan tuh profeh lu kheit hawte a tua hae paw nynh thua,” a ciku hae.
27 Tukeiccuze minmin nynh Jesu kha, “Kae nyh khyh,” cite a khung hae. Jesu nynh, “Kae mah paw kawhoinaw te nynh e uccaw hae hynh ka cyi cipaw kae hopah lan khyh oh.
Ccapaw Lu Ning Tousenaw
28 “Nanning pawte na tua oh? Ccungccapaw lu kheit nynh ccapaw lu ning a hoi; aning nynh atawccapaw kalan cceih zah, ‘Ka ccapaw, atunin misu khokhu lang la cceih lah rya la lah,’ a cipya.
29 A ccapaw nynh, ‘Ka cceih lan khyh,’ a ci; thuasalama khuekheih acih te ngaesikuh zah a cceih.
30 Te mih paaw nynh asoipaw kalan cceih zah, tuh-e hawte bua a hopya. Aning nynh, ‘Ka la cceih vae sah, apang,’ a cipya, thuasalama cceih khyh.
31 Tuh-e lu ning hae kyaze hum tuh mou a paaw rynaw a cyih?” cite a khia hae. Minmin nynh, “Atawccapaw,” a ci hae. Jesu nynh minmin kha, “Byaccaccing kae hopya oh, ngunto khoi hae paw te ohhuanung hae nynh Pachia peenaw lungkhu lang nae malang te ae teetaw vae cih oh.
32 Pawccecize Johan nynh dingnaw laanpi kha zuite nae kalan yn thua zah na zyn khyh oh; thuasalama ngunto khoi hae paw te ohhuanung hae nynh amaw kha a zyn hae; te nanning nynh tuh-e tuh mang na muih oh pite nae lung na paleihkuh khyh oh zah zyn mah na zyn khyh oh.Ref 21.32: Luk 3.12, 7.29-30
Ryalahtu hae Tousenaw
(Mar 12.1-12; Luk 20.9-19)
33 “Ccangpaw tousenaw phungpaw hynh ngaetua oh: loram a hoipaw lu kheit nynh misu khokhu kha rae zah hohung po a koih, te misu mianaw khu kha karouh zah buhang ccangkheit a sak, te khokhu kha a hohtu hae kalan hohsakuh hae zah ramccang lang a cceih.Ref 21.33: Isa 5.1-2
34 Misu thae lo yn zaw te, a mue lanpaw kha law khylan a see hae kha a hohtu hae kalan a saw hae.
35 Khokhu a hohtu hae nynh a see hae kha kyng hae zah lu kheit kha a bua hae, lu kheit kha a chia hae, lu kheit kha lung te a deih hae.
36 Aning nynh masaty e see hae laeze alunghua lante ccangpaw see hae kha bua a saw hae; minmin nynh tuh-e hae tuh langmaw hawte bua a cyi hae.
37 Nyathyakou tuh, ‘Minmin nynh ka ccapaw tuh saw a tua cih hae,’ ci zah a ccapaw kha minmin kalan a saw.
38 Thuasalama khokhu a hohtu hae nynh a ccapaw kha he a muih hae tuh, ‘E paw hynh rhoccoutu nynh thua, rang oh, amaw hynh theih oh sih lah a rho kha lawkuh oh sih’ cite a hoku hae.
39 Te tuh-e paw tuh kyng hae zah misu khokhu akhung lang vua hae zah a chia hae.
40 Tukeiccuze misu khokhu a hoitupaw he yn thua te, khokhu a hohtu hae kha pawtemou a cyih cih hae?” cite a khia hae.
41 Minmin nynh, “Tuh-e ccungccaw hoylei hae paw kha myarya ccih lante a theih cih hae; te a misu khokhu kha athae lo ccyh kya athae hoyte a pya cih hae paw ccangpaw khokhu a hohtu hae kalan a hohsakuh cih hae,” a ci hae.
42 Jesu nynh minmin kha, “Ccathyaa kyaze,
‘Inn sak hae paw nynh
a nuee hae paw lung tuh
inn saknaw kya abyapi huapaw
apaki lang e lung lang
yn tang, hynh-e tuh Bawipaw nynh
a cyipaw thua zah,
aening muihnaw kya
ngaeang lan umpaw nynh thua,’
cite azeikuhpaw kha na ria boi khyh oh tou?Ref 21.42: Sam 118.22-23
43 Tukeiccuze kae hopya oh, Pachia peenaw tuh nae kyate lawpya athua cih zah tuh-e peenaw thae a thaepaw minphuin kalan pya athua cih.
44 Humhung zemah tuh-e lung vawlan a ccahpaw tuh phe akingkuh cih; humhung zemah tuh-e lung nynh a ccawphupaw tuh palae tui cih,” a cipya hae.
45 Te ranpibawi lepaw hae te Farasi hae nynh tuh-e tousenaw phungpaw hae kha he a thae hae tuh kaening kong nynh oun honua cipaw a nyku hae.
46 Minmin nynh Jesu kha kyng lan a ry hae zemah ccungccaw zapi raw kha a rih hae; pawccecize ccungccaw hae nynh Jesu tuh profeh cite a tua hae paw nynh thua.