18
Hummou A Lesaehua?
(Mar 9.33-37; Luk 9.46-48)
1 Tuh ccyh lyakhe zuitu hae nynh Jesu kalan oun thua hae zah, “Vaawlang peenaw kya hummou a lesaehua?” cite a khia hae.Ref 18.1: Luk 22.24
2 Jesu nynh imua taraw lu kheit kha a kalan ko zah minmin ngaelaku khe nung zah,Ref 18.3: Mar 10.15; Luk 18.17
3 “Byaccaccing kae hopya oh, nanning nynh na rulaeku khyh oh zah imua taraw hawte na thua khyh oh ze, vaawlang peenaw lungkhu lang papin na tee lan khyh oh.Ref 18.3: Mar 10.15; Luk 18.17
4 Tukeiccuze humhung zemah e imua hawte zakaw a sangsakuhpaw tuh vaawlang peenaw kya a lesae huapaw nynh thua.
5 Humhung zemah e tahawpaw imua lu kheit kha ka min te leh a khanpaw tuh kae kha leh yn khanpaw nynh thua.
Seinaw kalan Tuhounaw
(Mar 9.42-48; Luk 17.1-2)
6 “Humhung zemah kae yn zynpaw e imua taraw lukhakheit kha seinaw a raesahpaw tuh a nging kya mianawpaw lung kha sae lan zah rili akhunaw kya phung lanze amaw hanlan ahoyhua.
7 Zynnaw kyate cciasahseinaw a um keiccuze laephi hanlan ngaethya lan kou um! Zynnaw kyate cciasahseinaw tuh solei a um cih; thuasalama tuhcite cciasahseinaw a umsahpaw hanlan ngaethya lan kou um!
8 “Na ccu nynh thuasah, na kuih nynh thuasah ae seisah ze, thoh tya lah dae vua; ccukhou te tuhkhyhze kuihccu ccing leite hiinnaw lungkhu lang tee lanpaw tuh kuih voi ning, ccu voi ning te zungzae aruapaw maee lungkhu lang vuaku lanpaw laeze na hanlan ahoyhua.Ref 18.8: Mat 5.30
9 Na mit nynh ae seisah ze poh khoi lah dae vua; mit voi ning te hell maee lungkhu lang vuaku laeze mit voi kheit te hiinnaw kalan teepaw tuh na hanlan ahoyhua.Ref 18.9: Mat 5.29
Tuu Azopaw Tousenaw
(Luk 15.1-7)
10 “E imua taraw hae hynh lu kheit sanmah na dothatheih khyh nawlan oh raeringkuh oh; pawccecize kae hopya oh, imua hae a thungkhawtu vaaw hae nynh vaawlang umpaw ka Paaw mitmae kha tyty a muih hae.
11 Pawccecize Ccungccaw Ccapaw tuh a zopaw kha khum khylan nynh yn thua.
12 Pawtemou na tua oh? Ccungccaw lu kheit nynh tuu za kheit hoi zah tuh-e hae kyaze sa kheit tuh laanpi a vaesei ze, sung takua sa takua kha mua vawlan a cciataw cih zah tuh-e laanpi a vaepaw tuu sa kheit kha ccung khylan cceih lan khyh tou?
13 Byaccaccing kae hopya oh, tuh-e tuu kha he a muih lan thua ze, laanpi a vae lei hae paw sung takua sa takua tungvaw laeze tuh-e tuu sa kheit kya a lungtuahua.
14 Tuhawte vaawlang umpaw nae Paaw nynh e imua taraw hae kyaze lu kheit sanmah zosah ry khyh.
A Seipaw Uno Thuiheinaw
15 “Na uno nynh na tungvaw a cyisei ze, cceih lah nae makhae kyakhe a cyiseinaw kha hopah; aning nynh ae ngaepya lanze na uno kha bua na muethui.Ref 18.15: Luk 17.3
16 Thuasalama aning nynh ae ngaepya khyh ze, lu kheit khyhze lu ning la hoeikuh hae, tuhteze nynh ccaekia lu ning khyhze lu thum hae liate na hopaw bya miakaw tuh atyn cih.Ref 18.16: Deu 19.15
17 Aning nynh minmin bya kha a ngae khyh ze khriccaawbuu kya na ho cih; khriccaawbuu bya kha bua a ngae vae khyh ze amaw kha lawkipaw te ngunto khoipaw hawte la tua ccavae.
18 Byaccaccing kae hopya oh, pawpaw zemah laephi vawlan na khiide oh paw tuh vaawlang kya khiide athua cih, te pawpaw zemah laephi vawlan na supya oh paw tuh vaawlang kya supya athua cih.Ref 18.18: Mat 16.19; Joh 20.23
19 Nanning kha bua kae hopya oh, laephi vawlan hin nanning kyaze ccungccaw lu ning nynh lunglokute uccaw hankhakheit kha a ngia hae ze, vaawlang umpaw ka Paaw nynh a pya cih hae.
20 Pawccecize lu ning khyhze lu thum nynh ka min te a sueluakunaw hae kyakhe kae mah minmin kya ka umbua,” a cipya hae.
Ngaethyakunaw A Hoi leipaw See
21 Peter nynh Jesu kalan yn cceih zah, “Bawipaw, ka uno lukhakheit nynh ka tungvaw a sei ze, vae hohzeihmou ka ngaethya cih? Vae sari cia tou?” cite a khia.Ref 18.21-22: Luk 17.3-4
22 Jesu nynh, “Vae sari cia kyalya thua khyh; vae sung sari leit sari cia na ngaethya cih, kae cipya.Ref 18.22: Gen 4.24
23 “Tukeiccuze vaawlang peenaw tuh a see hae te asekuhpaw phua ccazing a do rypaw siapharanpaw lu kheit te nynh aloku.
24 Ccazing he a lah tuh talent thong haw laebah umpaw lu kheit kha amaw kalan oun thuakhae hae.
25 Tuh-e paw nynh laebah sang lanpaw a hoi khyh keiccuze a bawipaw nynh amaw ry, a zu a ccaaw hae ryte a hoipaw balyn kha zua sah lah laebah kha sang sah cite kaw a pya.
26 Tukeiccuze tuh-e see nynh bakhungte amaw kha beik zah, ‘Bawipaw, beih yn ngaethya hin, laebah tuh marya kae sang cih,’ a cipya.
27 A bawipaw nynh ngaethya a umsah keiccuze a laebah kha ngaethya zah phe a luesah.
28 Tuh-e see tuh po cceih zah amaw nynh denari phua za kheit laebah a umsahpaw a banpaw see lu kheit kha a muih; te tuh-e paw tuh kyng zah a lotharue kha meih zah, ‘Laebah na umpaw kha yn pya ccavae,’ a cipya.
29 A banpaw nynh a cculeihpaw bakhung zah, ‘Yn ngaethya hin, laebah tuh marya kae sang cih,’ cite a ngiaku.
30 Thuasalama aning nynh ngaethya ry khyh; te cceih zah lae a sang makhia thong a saw.
31 Tuhte a cyipaw tuh ccangpaw a ban hae see hae nynh he a muih hae tuh myarya mih ngaethah, te cceih hae zah acyikuhpaw balyn kha mih bawipaw kya a hopya hae.
32 Tetuh a bawipaw nynh tuh-e see tuh ko zah, ‘Pou see thyapaw! Nae soihbiakuh zah na laebah balyn kha marya kae ngaethya.
33 Kae nynh na tungvaw ngaethya kae umsah hawte na banpaw see tungvaw kya ngaethya na umsah lan ccan khyh tou?’ a cipya.
34 A bawipaw tuh a thinria zah tuh-e paw nynh laebah marya a sang kou mawlaezung thong kya a saw.
35 Tuhawte nanning nynh nae uno hae mih cyiseinaw kha nae thinlung te na ngaethya khyh oh ze vaawlang umpaw ka Paaw nynh mah tuhcite ae cyihbua cih oh,” a cipya hae.