16
Muihsahnaw A Ngiaku hae
(Mar 8.11-13; Luk 12.54-56)
1 Farasi hae te Sadusi hae nynh oun thua hae zah Jesu kha syntawtua khylan, vaawlang e muihsahnaw kha minmin kya langsahpya lan a ngia hae.Ref 16.1: Mat 12.38; Luk 11.16
2 Jesu nynh, “Zete ccyh kya nanning nynh, ‘Vaawlui ase ze khuaa ahoy cih,’ na ci oh.
3 Te awkhua ccyh kya, ‘Vaawlui se zah mae-ui keiccuze atunin tuh khuaarah cih,’ na ci oh. Nanning nynh vaawlui kha dote khuaa nincce kha na ny kho oh; thuasalama accyh muihsahnaw tuh na nyh kho khyh oh.
4 Ahoy leipaw te a ohhuakuhpaw ciihan nynh muihsahnaw kha a ngia hae zemah profeh Jonah kya-e muihsahnaw laelan pawpaw muihsahnaw mah langsahpya thua vae lan khyh,” a ci. Te minmin kha po a cciataw vae hae.Ref 16.4: Mat 12.39; Luk 11.29
Farasi hae te Sadusi hae Ransi
(Mar 8.14-21)
5 Te a zuitu hae nynh khuraw lang he a thua hae tuh sanlou phuku lanpaw kha phe a ning hae.
6 Jesu nynh minmin kha, “Farasi hae te Sadusi hae ransi kha raeringkute la sibia oh,” a cipya hae.Ref 16.6: Luk 12.1
7 Minmin nynh, “Aening nynh sanlou ah phuku khyh oh keiccu nynh e bya hynh a ho,” cite mimaw te mimaw a hoku hae.
8 Jesu nynh tuh-e tuh he a nyh te, minmin kha, “Zynnaw a zyn hae paw nanning, pawccemou sanlou na hoi khyh oh paw tuh palei na ho oh?
9 Na thaethya loh khyh oh tou? Sanlou phe pangaw kha ccungccaw thong pangaw nynh ae hae zah kee hohzeihmou na khuin oh cipaw na nyh vae khyh oh tou?Ref 16.9: Mat 14.17-21
10 Sanlou phe sari kha ccungccaw thong pali nynh ae hae zah kee hohzeihmou na khuin oh cipaw so na nyh vae khyh oh tou?Ref 16.10: Mat 15.34-38
11 Kae hopya oh paw hynh sanlou kong thua khyh cipaw kha pawccemou na thaethya khyh oh? Farasi hae te Sadusi hae ransi kha raeringkuh oh!” a cipya hae.
12 Tetuh zuitu hae nynh sanlou kya-e ransi kha raeringku lan oun hopya rypaw thua leite, Farasi hae te Sadusi hae ccangpyanaw kong nynh oun hopya ry cipaw kha a thaethya vae hae.
Peter nynh Jesu Kong Phynaw
(Mar 8.27-30; Luk 9.18-21)
13 Jesu tuh Sisaria Filipi ram lang he a thua te a zuitu hae kyakhe, “Ccungccaw hae nynh Ccungccaw Ccapaw kae hynh hum yn ci hae mou?” cite a khia hae.
14 Minmin nynh, “Ccungccaw abang nynh Baptisma pyatu Johan ae ci hae; abang nynh Elijah ae ci hae; abang nynh Jeremiah khyhze profeh lukhakheit nynh thua ae ci hae,” cite a khung hae.Ref 16.14: Mat 14.1-2; Mar 6.14-15; Luk 9.7-8
15 Jesu nynh minmin kha, “Nanning nynh so kae hynh hum nae ci oh mou?” cite a khia hae.
16 Simon Peter nynh, “Nang tuh a hiinpaw Pachia Ccapaw Messiah nynh na thua,” a ci.Ref 16.16: Joh 6.68-69
17 Tetuh Jesu nynh, “Johan ccapaw Simon, nang tuh hythua a ccoupaw nynh na thua! Pawccecize chii te saw nynh e hynh nang ae phypyapaw thua khyh, vaawlang umpaw ka Paaw nynh ae phypyapaw nynh thua.
18 Te nang tuh Peter nynh na thua cipaw kha kae hopya; e lungtung vawlan hin ka khriccaawbuu kha ka thadynsah cih zah, Michi khua e koikua hae nynh tae kho lan khyh.
19 Vaawlang peenaw toh hae kha nang kae pya cih; nang nynh laephi vawlan na khiidepaw miakaw tuh vaawlang zemah khiide athua cih; te laephi vawlan na supyapaw miakaw tuh vaawlang zemah supya athua cih,” a cipya.Ref 16.19: Mat 18.18; Joh 20.23
20 Te Jesu nynh a zuitu hae kha aning tuh Messiah nynh thua cite humhung kya mah a hopya khyh nawlan hae tynkaring lan kaw a pya hae.
A Chi lanpaw A Hoty
(Mar 8.31-9.1; Luk 9.22-27)
21 Tuin ccyh kyate Jesu nynh Jerusalem lang a ccia lanpaw, piccan hae, ranpibawi lepaw hae te kawbya sazae hae kuih kya patae a teing lanpaw, a chia lan hae paw, te nin thumnaw kya a thoothui lanpaw kong kha a zuitu hae kya a langsahpya hae.
22 Peter nynh Jesu kha ccanglang cciakhae zah, “Bawipaw, tuh-e tuh Pachia nynh khee vae sah; na tungvaw kya tuh-e tuh cyihkuh nan sah!” cite a hopya.
23 Thuasalama Jesu nynh Peter kha maenuakuh zah, “Satan, ka nulang cceih! Nang tuh kae yn khawtu nynh na thua; pawccecize na tuanaw hynh Pachia kyate yn thuapaw thua khyh, ccungccaw kyate yn thuapaw nynh thua,” a cipya.
24 Jesu nynh a zuitu hae kha, “Lukhakheit nynh kae kha yn zui ry ze amaw te amaw kha vuakuh sah lah a vaelantung kha puihkute yn zui sah.Ref 16.24: Mat 10.38; Luk 14.27
25 Pawccecize humhung zemah a hiinnaw kha a khumkuh rypaw tuh a hiinnaw kha a shung cih; thuasalama humhung zemah a hiinnaw kha kae ka keiccuze a shungpaw tuh a hiinnaw kha a mue cih.Ref 16.25: Mat 10.39; Luk 17.33; Joh 12.25
26 Pawccecize ccungccaw lu kheit nynh laephi pynpi hynh pong a ccou zeso a hiinnaw kha a shung ze, a hanlan pawmou athane? Tuhkhyhze a hiinnaw kha paw uccaw te mou a shawkhawkuh kho cih?
27 “Pawccecize Ccungccaw Ccapaw tuh a Paaw phu-enaw kya a vaawccungccaw hae ryte yn thua cih; ccungccaw miakaw kha mih ryalawnaw thyhte ryalaw mee oun pya cih hae.Ref 16.27: Mat 25.31; Sam 62.12; Rom 2.6
28 Byaccaccing kae hopya oh, Ccungccaw Ccapaw nynh a peenaw te yn thuapaw kha a muih hae cia a chih cih lei hae paw abang tuh hein kya a thadyn hae,” cite a hopya hae.