14
Baptisma Pyatu Johan Chinaw
(Mar 6.14-29; Luk 9.7-9)
1 Tuh-e ccyh lyakhe Galilee ram uktupaw Herod nynh Jesu thongpang kha thae zah,
2 a ryalawpatu hae kha, “E paw hynh Baptisma pyatu Johan thua zah chinaw kyate yn hiinthuipaw nynh athua cih; tukeiccu nynh e ngaeangnaw hae hynh a rae kho,” a cipya hae.
3 Pawccecize Herod nynh a neitaw Filip zu Herodias keiccuze Johan kha kyng zah a he koute thonginn kya a saw.Ref 14.3-4: Luk 3.19-20
4 Pawccecize Johan nynh Herod kha, “Herodias kha na dyku lan ccan khyh,” a la cipya.Ref 14.4: Lev 18.16, 20.21
5 Aning nynh Johan kha chia lan a ry zemah ccungccaw zapi raw kha a rih. Pawccecize minmin nynh Johan kha profeh lu kheit hawte a tua hae paw nynh thua.
6 Herod a pui nin khe Herodias ccanung nynh ccungccaw hae malang khe he yn law tuh Herod kha a lungrythuasah.
7 Tukeiccuze Herod nynh tuh-e nung kyakhe, “Nae ngiakupaw miakaw kae pya cih,” cite thyalawkute bya a kinpyaku.
8 Te a nung nynh a hopya thyhte, tuh-e nung nynh, “Baptisma pyatu Johan lu kha pakephepaw te hynhlang hin yn pya,” a ci.
9 Siapharan tuh a ngaethah; tuhzemah thyalawkupaw keiccu te a ko hae paw ccungccaw hae keiccuze tuh-e nung nynh a rypaw kha raepya lan kaw a pya hae.
10 Tukeiccuze thonginn lungkhu e Johan lu kha a paesah hae.
11 Johan lu kha pakephepaw te oun ccyng hae zah nopinung taraw kha a pya hae, te aning nynh tuh-e tuh a nung kalan a ccyng.
12 Johan zuitu hae oun thua hae zah a rhua kha lah hae zah a ccy hae, te cceih hae zah Jesu kha a hopya hae.
Thong Pangaw Looh A Dang hae
(Mar 6.30-44; Luk 9.10-17; Joh 6.1-14)
13 Jesu nynh Johan kong he a thae tuh tuin kyate a makhaete ramkaw lang kohlung te a cceih; ccungccaw hae nynh tuh-e tuh he a thae hae tuh khua kyate mih ccu te amaw kha a zui hae.
14 Jesu tuh varang lang thua zah ccungccaw zapi kha he a muih tuh, ngaethyaumsah hae zah mih ngeccih hae kha a dansah hae.
15 Zete he yn thua tuh a zuitu hae nynh amaw kalan oun thua hae zah, “E kya tuh ramkaw thua zah khuanin phe anae vae, tukeiccuze ccungccaw zapi hynh saw hae lah khua hae kalan la cceih hae sah lah, looh la rekuh hae sah,” cite a hopya hae.
16 Thuasalama Jesu nynh, “Cceih nan hae sah, nanning nynh minmin kha ae lanpaw hankhakheit khangpah oh,” a cipya hae.
17 Minmin nynh, “E kya sanlou phe pangaw te ngasaw zaw ning rou nynh kae hoi,” a cipya hae.
18 Jesu nynh, “Tuh-e tuh hynhlang ka kalan oun ccyng oh,” a ci.
19 Te ccungccaw zapi kha lonua vawlan haung lan kaw a pya hae, te sanlou phe pangaw te ngasaw zaw ning kha lah zah vaawlang dothung zah lungtuabya a ho, te eih zah sanlou kha zuitu hae a pya hae, te zuitu hae nynh ccungccaw zapi kha a nee hae.
20 Mih balyn te ae hae zah phe byn hae; te alaepaw a eihpaw kha khuin hae zah kee haw lae ning phe abeih.
21 Tuh-e a ae hae paw tuh nopi hae te imua hae riabia leite pise ccite thong pangaw loukaw acih hae.
Jesu Tui vawlan A Cceih
(Mar 6.45-52; Joh 6.15-21)
22 Jesu nynh ccungccaw zapi a cciasah lya hae khe, zuitu hae kha kohlung kalan palou teesah hae zah rili khuraw lang a cciasah lalo hae.
23 Te ccungccaw zapi kha he a cciasah kou hae te, a makhaete sawsang lan mua vawlan a kaethung; khuanin nae cia tuin kya a makhaete a um.
24 Varang te asawnaw lang a thua vae paw kohlung tuh khise yn tho keiccuze tuileih nynh vyavya a buleih.
25 Khuadae dyn khe Jesu tuh rili vawlan khe zuitu hae kalan a cceih.
26 Te zuitu hae nynh amaw rili vawlan yn cciapaw kha he a muih hae tuh siikuh hae zah, “Muisaw nynh thua!” a ci hae; te minmin tuh a ri hae keiccuze thawte a sia hae.
27 Thuasalama Jesu nynh minmin kha hopah kangmaw hae zah , “Nae thinphang nan sah, kamaw nynh ka thua, rih nan oh,” a cipya hae.
Zynnaw Zyapaw
28 Tetuh Peter nynh, “Bawipaw, namaw na thua ze, tui vawlan te na kalan ccianaw kaw beih yn pya,” a cipya.
29 Te Jesu nynh, “Rang,” a cipya. Tukeiccuze Peter tuh kohlung kyate sahkuh zah tui vawlan te Jesu kalan a cceih.
30 Thuasalama khisan arupaw kha he a muih tuh a rih vae, te tui lungkhu lang he yn ccahbung zah, “Bawipaw, yn khum!” cite a sia.
31 Jesu nynh vaekheihmawte a kuih kha dyng zah a kyng koute, “Na zynnaw eih zya kaesy! Pawccemou na lung ahiin?” a cipya.
32 Minmin nynh kohlung lungkhu lang he oun thua hae tuh khisan phe adae.
33 Te kohlung kya a um hae paw nynh oun cceih hae zah, “Nang tuh Pachia Ccapaw ccaccing nynh na thua,” ci hae zah amaw kha a beik hae.
Genesaret kya A Dansah hae
(Mar 6.53-56)
34 Minmin nynh khuraw lang zua hae zah Genesaret ram a thua hae.
35 Tuin kya-e ccungccaw hae nynh amaw kha he a nyh hae tuh tuin pepan balyn kalan khe byataw hae zah ngeccih hae balyn kha amaw kalan oun cciakhae hae.
36 Te minmin nynh a boei dung sankaw hae lan amaw kha a ngiaku hae; te a hae paw miakaw tuh marya a dan hae.