12
Sabbath Bawipaw
(Mar 2.23-28; Luk 6.1-5)
1 Tuh ccyh lyakhe Jesu tuh sabbath nin kya loo lungkhu po a cceih; a zuitu hae tuh mih vuelaw zah looh avui kha zukuh hae zah a ae hae.Ref 12.1: Deu 23.25
2 Tuh-e tuh Farasi hae nynh he a muih hae tuh Jesu kha, “Dotua, sabbath nin kya kawbya nynh cyi lan a ua leipaw kha na zuitu hae nynh a cyi hae,” a cipya hae.
3 Jesu nynh minmin kha, “David te a umkheih hae paw nynh mih vuelaw lyaze David nynh pawmou a cyi cipaw kha na ria boi khyh oh tou?Ref 12.3-4: 1 Sam 21.1-6
4 Pachia inn lungkhu lang tee zah kawbya nynh ranpibawi hae kyalya ae lan ua zah amaw thuasah, amaw te a umkheih hae paw thuasah ae lan a ua leipaw Nungpyapaw sanlou kha a ae hae cipaw na ria boi khyh oh tou?Ref 12.4: Lev 24.9
5 Tuhpiaze ranpibawi hae nynh sabbath nin kya Beikinn lungkhu khe sabbath phung kha a lawe hae zemah seibe thua khyh hae cipaw kha kawbya kya na ria boi khyh oh tou?Ref 12.5: Nam 28.9-10
6 Byaccaccing kae hopya oh, Beikinn laeze alesae huapaw tuh hein kya a um.
7 ‘Silawkunaw tuh ka ry khyh, ngaethyaumsahnaw nynh ka ry,’ acikuhpaw asuilan kha na ny oh ze, seibe lan accan leipaw kha sei na be cih lei oh paw.Ref 12.7: Mat 9.13; Hos 6.6
8 Pawccecize Ccungccaw Ccapaw tuh sabbath Bawipaw nynh thua,” a cipya hae.
A Kuih Chihpaw Ccungccapaw
(Mar 3.1-6; Luk 6.6-11)
9 Jesu nynh tuh-e hmin tuh cciataw zah mih sinakok lungkhu lang a tee.
10 Tuin kyakhe a kuih voihawlang achihpaw ccungccapaw lu kheit a la um. Minmin nynh Jesu kha a seinaw kae kyngpya ccaw cite, “Sabbath nin kya dansah lan kawbya nynh a ua tou?” cite a khia hae.
11 Jesu nynh minmin kha, “Nanning lakuze lukhakheit nynh tuu sa kheit hoi zah, sabbath nin kya hunghua lungkhu lang a ccaw ze tuh-e tuu tuh thuaa leite na um cih oh tou?
12 Tuu laeze ccungccaw tuh pawcihmou houh aphutehua! Tukeiccuze sabbath nin kya hoynaw rae tuh kawbya nynh a uapaw nynh thua,” a cipya hae.
13 Te Jesu nynh ccungccapaw kha, “Na kuih dyngtua,” a cipya. Aning nynh a kuih kha dyng zah voihawlang kuih hawte a dan vae.
14 Tetuh Farasi hae tuh cceih hae zah Jesu kha pawtemou chia lan cipaw khua a khanku hae.
Pachia Popaw Ryalahtu
(Mar 3.7-12)
15 Jesu nynh tuh-e mih khuakhannaw kha he a nyh tuh tuin kyate a cceih. Te ccungccaw zapi nynh amaw kha zui hae zah minmin balyn kha a dansah hae.
16 Te amaw kong kha ming hae na nysah lan khyh oh cite kaw a pyasya hae.
17 Hynhte a cyipaw hynh profeh Isaiah nynh a hosyapaw bya accing nawlan nynh thua. A hopaw tuh:
18 “Ka pokupaw ka ryalahtu tuh
hein kya mang um!
Ka sungsah zah a tungvaw
ka lungryccing.
A tungvaw khe
ka Muisaw ka nung cih zah
aning nynh Zenta hae kha
byading kong a hopah cih hae.Ref 12.18-21: Isa 42.1-4 (LXX)
19 Aning nynh ei lan khyh,
sia mah sia lan khyh,
hum ccungccaw nynh sanmah
laanpi kya a roi thae lan khyh.
20 Byading kha taenaw kalan
a thuakhae makhia aning nynh
a vaemaw umpaw phaeku kha
khya lan khyh zah
vyavya chihpaw maeekhua kha
the lan khyh.
21 Amaw min kha
Zenta hae nynh
a doliakuh cih hae,” a ci.
Jesu te Beelzebul
(Mar 3.20-30; Luk 11.14-23)
22 Te raerangsaro a bahku keiccuze a mitmoh zah bya a ho kho leipaw lu kheit kha Jesu kalan oun thuakhae hae zah a dansah. Tetuh bya a ho kho leipaw tuh byaho zah ngaw a muih vae.
23 Ccungccaw zapi balyn tuh mih ngaeangthua zah, “E paw hynh David Ccapaw thua vema?” a ci hae.
24 Thuasalama Farasi hae nynh he a thae hae tuh, “E paw nynh raerangsaro hae a dee khopaw hynh raerangsaro hae bawipaw Beelzebul liate nynh thua,” a ci hae.Ref 12.24: Mat 9.34, 10.25
25 Jesu nynh mih tuanaw kha nyh zah minmin kha, “Amaw te amaw kha rawsekuh zah aphiakuhpaw peenaw miakaw tuh aroh cih; te amaw te amaw kha rawsekuh zah aphiakuhpaw khuapi thuasah, innbyn thuasah tyn kho lan khyh.
26 Satan nynh Satan kha a dee lanze, aning tuh amaw te amaw a rawsekuhpaw te a phiakuhpaw nynh thua; pawtemou a peenaw tuh atyn kho cih?
27 Kae nynh Beelzebul liate raerangsaro hae kha ka dee ze, nae ccungccaw hae nynh hum liate mou minmin kha a dee hae? Tukeiccuze minmin tuh nanning bya ae piatu oh athua cih hae.
28 Thuasalama kae nynh Pachia Muisaw liate raerangsaro hae kha ka dee ze, Pachia peenaw tuh nae kya a thua ccaccing vae.
29 Tuhkhyhze ccungccaw lu kheit nynh a thawsaepaw lu kheit kha a khiide ty leite, pawcihtemou tuh-e paw inn lungkhu lang a tee kho cih zah a uccaw hae kha a lua kho cih? A khiide ty ze nynh a inn kha a lua kho cih.
30 Humhung zemah ka kalan a pan leipaw tuh kae yn rawsepaw nynh thua; ka kalan a sueluakuh bua leipaw tuh a phiakuhpaw nynh thua.Ref 12.30: Mar 9.40
31 Tukeiccuze kae hopya oh, seinaw miakaw te Pachia saryapaw bya hanlan ccungccaw hae tuh ngaethya athua cih hae; thuasalama Thyaa Muisaw saryapaw bya a hopaw ccungccaw hae tuh ngaethya thua lan khyh hae.
32 Ccungccaw Ccapaw kha rawsete bya a hopaw miakaw tuh ngaethya athua cih, thuasalama Thyaa Muisaw kha rawsete bya a hopaw tuh, atu she kya mah, malang she kya mah ngaethya thua lan khyh.Ref 12.32: Luk 12.10
33 “Thingku kha ahoy lan rae lah athae ahoy cih, tuhkhyhze ahoy lei lan rae lah athae hoy lan khyh, pawccecize thingku tuh athae liate ny athua.Ref 12.33: Mat 7.20; Luk 6.44
34 Pou huparepaw ciihan hae! Nanning tuh na hoy lei oh pite ahoypaw uccaw hae kong kha pawtemou na ho kho cih oh? Pawccecize thinlung kya phe beihpaw kha nynh munglae nynh leih a ho.Ref 12.34: Mat 3.7, 23.33, 15.18; Luk 3.7, 6.45
35 Ccungccaw hoypaw nynh thinlung kya-e ahoypaw sisua bawng kya-e ahoypaw uccaw hae kha yn poukhae; te ahoy leipaw ccungccaw nynh ahoy leipaw sisua bawng kya-e ahoy leipaw uccaw hae kha yn poukhae.
36 Nanning kae hopya oh, raeringku leite bya na ho oh paw miakaw hanlan byapianaw nin kya paw keiccu nynh khahte ka ho cipaw na langsakuh cih.
37 Pawccecize na bya liate thyaaccousah na thua cih zah na bya liate seibe na thua cih,” a cipya hae.
Jonah Muihsahnaw
(Luk 11.29-32)
38 Te kawbya sazae hae abang te Farasi hae nynh khung hae zah, “Bawipaw, na raepaw muihsahnaw ccangkheit kae muihtua ry,” a cipya hae.Ref 12.38: Mat 16.1; Mar 8.11; Luk 11.16
39 Thuasalama Jesu nynh minmin kha, “Ahoy leipaw te a ohhuakuhpaw ciihan nynh tuh muihsahnaw kha leih a ngia, thuasalama profeh Jonah kya-e muihsahnaw laelan ccangpaw muihsahnaw kha langsahpya thua vae lan khyh.Ref 12.39: Mat 16.4; Mar 8.12
40 Pawccecize Jonah tuh nin thum te zi thum ngasawpi vue lungkhu a um hawte, Ccungccaw Ccapaw mah nin thum te zi thum laephi lungkhu a um cih.Ref 12.40: Jon 1.17
41 Nineveh khuaccaaw hae tuh e she kya-e ccungccaw hae ryte byapianaw kya oun thadyn cih hae zah, e she kya-e ccungccaw hae kha oun seisah cih hae, pawccecize minmin tuh Jonah phunghonaw kya a ngaesikuh hae, te dotua, Jonah laeze alesae huapaw tuh hein kya mang um!Ref 12.41: Jon 3.5
42 Byapianaw kya Alia lang e siapharannung tuh e she kya-e ccungccaw hae ryte yn thadyn cih zah minmin kha yn seisah cih hae, pawccecize aning tuh laephi athangnaw langte Solomon hawnaw bya kha thae khylan yn thua; te dotua, Solomon laeze alesae huapaw tuh hein kya mang um!Ref 12.42: 1Si 10.1-10; 2Sh 9.1-12
Athyaa leipaw Muisaw Kithuinaw
(Luk 11.24-26)
43 “Athyaa leipaw muisaw nynh ccungccapaw kyate he a pou te, umnaw hmin zahku lan ramrou kalan a khiakuh, thuasalama muihkuh khyh.
44 Tetuh aning nynh, ‘Ka poutawnaw ka inn lang ka ki cih,’ ci zah, he a kithui tuh tuh-e inn tuh phe la phikuh zah ccynmamyh lan a ccawnghanpaw kha a muih.
45 Tetuh aning nynh cceih zah amaw laeze houh athahhua hae paw ccangpaw muisaw lu sari kha a hoeibua hae, te minmin nynh tee hae zah tuh-e paw kya a um hae; te tuh-e ccungccapaw tuh nyalang e a cyisahnaw tuh langmaw a cyisahnaw laeze houh athahhua vae. E ahoy leipaw ciihan kya mah tuh-e hawte yn cyihkuh bua cih,” a cipya hae.
Jesu Vaeccaw hae Ccaccing
(Mar 3.31-35; Luk 8.19-21)
46 Jesu nynh ccungccaw zapi kya bya a ho cciamang lyakhe a nung te a neitawpaw hae tuh amaw kha bya hopya lan ry hae zah atolang khe a thadyn hae.
47 Te ccungccaw lu kheit nynh amaw kha, “Dotua, na nung te na neitawpaw hae tuh nang kha bya hopya lan ae ry hae zah atolang phang thadyn hae,” a cipya.
48 Thuasalama Jesu nynh tuh-e bya a hopahpaw kha, “Ka nung tuh hummou? Ka neitawpaw hae tuh hum hae mou?” cite a khung.
49 Te a zuitu hae kha khii hae zah, “E hae hynh ka nung te ka neitawpaw hae nynh thua hae!
50 Pawccecize vaawlang umpaw ka Paaw rynaw a cyihpaw miakaw tuh ka neitawpaw, ka ccianung te ka nung nynh athua hae,” a ci.