MATTHAI
KYATE THEHOYPAW
Matthew
Matthai nynh raeringkuh tacite a zeipaw ccaw nynh thua. Jesu puinaw kyate tho zah, baptisma a innaw te tuhounaw, tukoute phunghonaw, ryalawnaw, ccangpyanaw, te Galilee kya a dansahnaw hae balyn kha nynh thua. Hynh-e hae a zei koute Galilee kyate Jerusalem lang khua a ccongnaw, athangnaw kya vaelantahnaw te a thoothuinaw hae nynh athua hae.
E Thehoypaw nynh Jesu tuh alepaw Ccangpahtu, Pachia Kawbya ccaesahpyanaw kya kawhoitu, te Pachia peenaw a ccangpahtu nynh thua cite a langsah. A ccangpyanaw balyn kha phu pangaw lan phia kho athua:
(1) mua vaw ccangpyanaw kya vaawlang Peenaw lungkhu e zia, ryalaw, ccou lanpaw te paccynku lanpaw kong a ho (byaria hae 5-7); (2) mih ryalawnaw hanlan zuitu hae lu haw lae ning kya ccangpyanaw hae (byaria 10); (3) vaawlang Peenaw kong tousenaw (byaria 13); (4) zuitu thuanawpaw asuilan (byaria 18); (5) te atu e she athangnaw te yn thua cih paw vaawlang Peenaw kong ccangpyanaw (byaria 24-25).
1
Jesu Khri Thokeinaw
(Luk 3.23-38)
Abraham Ccapaw, David Ccapaw Jesu Khri a thokeinaw tuh hynhte nynh thua.
Abraham ccaaw Isak; Isak ccaaw Jakob; Jakob nynh Judah te a uno hae kha a saah hae; Judah nynh Perez te Zerah a saah hae (mih nung tuh Tamar nynh thua); te Perez nynh Hezron a saah; Hezron nynh Ram; Ram nynh Amminadab; Amminadab nynh Nahshon a saah; Nahshon nynh Shalmon a saah; Shalmon nynh Boaz a saah (a nung tuh Rahab nynh thua); Boaz ccaaw Obed (a nung tuh Ruth nynh thua); Obed ccaaw Jessi; Jessi ccaaw tuh David Siapharan nynh thua.
David ccapaw tuh Solomon nynh thua (a nung tuh Uriah zu nynh thua); Solomon ccaaw Rehoboam; Rehoboam ccaaw Abijah; Abijah ccaaw Asa; Asa ccaaw Jehoshafat; Jehoshafat ccaaw Joram; Joram ccaaw Uzziah; Uzziah ccaaw Jotham; Jotham ccaaw Ahaz; Ahaz ccaaw Hezekiah; 10 Hezekiah ccaaw Manasseh; Manasseh ccaaw Amon; Amon ccaaw Josiah; 11 Josiah ccaaw Jekoniah te a uno hae; e ccyh loukaw hin nynh Babilon ram lang see lang a cciakhae hae.Ref 1.11. 2Si 24.14-15; 2Sh 36.10; Jer 27.20
12 Babilon see lang a cciakhae kou hae te Jekoniah nynh Shealtiel a saah; Shealtiel ccaaw Zerubbabel; 13 Zerubbabel ccaaw Abiud; Abiud ccaaw Eliakim; Eliakim ccaaw Azor; 14 Azor ccaaw Zadok; Zadok ccaaw Akhim; Akhim ccaaw Eliud; 15 Eliud ccaaw Eliezer; Eliezer ccaaw Matthan; Matthan ccaaw Jakob; 16 Jakob ccaaw Josef; Josef tuh Messiah a ci hae paw Jesu nung Mary a vawpaw kha nynh thua.
17 Tuhcite Abraham kyate David kyacia she haw lae pali, David kyate Babilon see lang a tangnaw hae cia she haw lae pali, see lang a tangnaw hae te Messiah kyacia she haw lae pali acih.
 
Jesu Khri Puinaw
(Luk 2.1-7)
18 Jesu Khri a puinaw tuh hynhte nynh thua: a nung Mary kha Josef nynh a haaw, thuasalama a umkheih maw hae ze Mary tuh Thyaa Muisaw liate ccaaw a poi.Ref 1.18. Luk 1.27 19 A vawpaw Josef tuh adingpaw ccungccaw thua zah Mary kha zapi malang thethyasah lan ry khyh zah aruh lante zya mya lan a tuaku. 20 Thuasalama tuhcite a tuaku lyakhe a maan kya Bawipaw vaawpaw nynh yn langkuh zah, “David ccapaw Josef, na zu lang Mary hoiku lanpaw kha rih nan. Pawccecize aning nynh a poipaw ccaaw tuh Thyaa Muisaw liate nynh a poi. 21 Aning nynh ccapaw yn saah cih zah Jesu cite min na phu cih, pawccecize a ccungccaw hae kha mih seinaw kyate a khum cih hae,”Ref 1.21. Luk 1.31 a cipya. 22 Bawipaw nynh profeh kyate a hopaw kha accing nawlan nynh hynh-e balyn hynh acyiku.
23 “Dotua, liaccady nynh
ccaaw yn poi cih zah
ccapaw yn saah cih, a min tuh
Immanuel yn cikuh cih,”
(asuilan tuh, “Pachia kae kya a um,” cipaw nynh thua).Ref 1.23. Isa 7.14 24 Tuinte Josef nynh inaw kyate he yn thaekuh tuh, Bawipaw vaawpaw nynh kaw a pya hawte cyih zah Mary kha a zu lang a hoiku. 25 Thuasalama ccapaw a pui mawlaezung tuh-e nung tuh ikhae khyh; te Josef nynh Jesu cite min a phu.Ref 1.25. Luk 2.21