3
Oun Thua Cih paw Zeccuetu
1 Dotua, ka ccianaw laanpi kha paccyn khylan ka zeccuetu kha ka saw cih, na ccung oh paw Bawipaw tuh amaw beikinn langkhe palou yn thua cih. Nanning nynh nae lungrythuapaw byakinnaw zeccuetu tuh yn thua ccaccing cih, cite vaaw Bawipaw nynh a ci.Ref 3.1: Mat 11.10; Mar 1.2; Luk 1.76, 7.27
2 Aning yn thua nin tuh hummou a teing kho cih? Aning he yn langkuh te hummou a thadyn kho cih?
Tuh-e zeccuetu tuh sivaw thyaasahtu kya-e somaee te boeisuhtu kya-e saepia hawte nynh thua;Ref 3.2: Joe 2.11; Bya 6.17
3 aning tuh sivaw te ngun thyaasahtu hawte a haung cih zah, Levi ciihan hae nynh pyapaw uccaw hae kha Bawipaw kalan dingnaw te a pya mawlaezung hae, minmin kha sui te ngun thyaasah hawte a thyaasah cih hae.
4 Tetuh Judah te Jerusalem kya-e pyapaw uccaw kha alia vae paw nin te kum lya hawte Bawipaw nynh a lungrythua cih.
5 Kae tuh nae kalan byapia khylan kae naekuh cih; naawthya hae paw, milae zu milae vawpaw te a sei hae paw, ahme lei lante thyalawkuh hae paw, ryalahtu hae kha mih ryalaw mee pya leite a tuaa a sah hae paw, nomae hae te ngawraw hae, ramccang ccungccaw hae kha amia ccungnahkuh hae paw te ka rawrih lei hae paw kha rawsete ccaekia lang arangte ka tang cih, cite vaaw Bawipaw nynh a ci.
6 Kae tuh arulaekuh leipaw Bawipaw nynh ka thua. Tukeiccuze, pou Jakob ccaaw hae, nanning tuh phe na roh khyh oh.
7 Nae minpaaw hae she lyate ka phungbya kyate na maeleihkuh oh zah na zui khyh oh. Ka kalan oun ki oh lah, kae mah nae kalan kae ki cih, cite vaaw Bawipaw nynh a ci. Thuasalama nanning nynh, “Pawcitemou kae ki cih?” na ci oh.
Pachia Uccaw Luade Nan
8 Ccungccaw nynh Pachia uccaw kha a luade cih tou? Thuasalama nanning nynh ka uccaw kha nae luade oh! Nanning nynh, “Pawcitemou nang kha kae luade?” na ci oh. Pumhaw pumkheit thuasah, pyapaw uccaw hae thuasah nae luade oh!
9 Nanning nynh ka uccaw kha nae luade oh keiccuze minphuin pynpi te nanning kha thyalaw na thua oh!
10 Pumhaw pumkheit kha abalynte sisuainn lungkhu lang oun thuakhae oh, tuhteze nynh ka inn kya looh a um cih, te nanning hanlan vaaw thuakaw kha hungte paepae leikuhpaw hythuanaw kha kae bunua oh tah, kae bunua khyh oh tah, yn syntawtua oh, cite vaaw Bawipaw nynh a ci.Ref 3.10: Lev 27.30; Nam 18.21-24; Deu 12.6, 14.22-29; Neh 13.12
11 Tungkhipaw kha ka thuihei cih zah nae laephi kyate apoupaw ccathae kha roh lan khyh; nae khokhu kya umpaw misu ku tuh athae thae leite um lan khyh, cite vaaw Bawipaw nynh a ci.
12 Nae ram tuh lungrythua lan umpaw ram athua cih keiccuze minphuin hae balyn nynh nanning kha lungtuapaw ae ci cih oh, cite vaaw Bawipaw nynh a ci.
13 Nanning nynh kae kha rawsete byarepaw kha na ho oh, cite Bawipaw nynh a ci. Tuhzemah nanning nynh, “Nang kha rawsete pawtemou bya kae ho?” na ci oh.
14 Nanning nynh, “Pachia rya kha law tuh alakawpaw nynh thua. Rya oun nawpaw kha law liate thuasah, vaaw Bawipaw malang khe a rah a khui hae paw hawte umsaku liate thuasah aening nynh thanenaw pawmou ah mue cih oh?
15 Aening nynh a lysakuh hae paw kha lungtua hae paw ah ci vae oh; hoyleinaw a rae hae paw tuh mih laan mih sui a ua apiaze Pachia kha a syntawtua hae zemah a lue hae,” cite na ho oh.
Lungzi hae paw Ryalaw Mee
16 Tetuh Bawipaw rawrih hae paw nynh lu kheit te lu kheit a hoku hae. Bawipaw nynh ngae zah phe a thae, te Bawipaw rawrih hae paw te amaw min kha saw a tua hae paw tuh a malang e ccazing kyakhe mih min kha a zei hae.
17 Ka paccynpaw nin khe minmin tuh kamaw nynh ka hoipaw ka kya-e athua cih hae, te paaw nynh a hanlan ryalawpahpaw a ccapaw kha thaw a cci hawte minmin kha thaw ka ccih cih hae.
18 Miding te mihoy leipaw alaenaw kha thuasah, Pachia rya a lahpaw te a lah leipaw alaenaw kha thuasah na muih cih oh.