MALAKHI
Malachi
Malakhi ccauh hynh Jerusalem Beikinn sakthui koute, BC 400 loukaw kya a poupaw thua zah, profeh Malakhi nynh abyapi lan a hopaw tuh ranpibawi hae te zapi hae nynh Pachia kalan bya a kinku hae paw thawsah thui lanpaw kong nynh thua. Pachia ccungccaw hae tuh mih hiinnaw kya te Pachia beiknaw kya sawphahkuh hae zah mih ozia aroh cipaw phe aria. Ranpibawi hae te zapi hae nynh Pachia kalan rae lanpaw silawnaw kha rae leite, a ccangpyanaw thyhte hiin leite Pachia kha a hynpya hae. Thuasalama Bawipaw tuh a ccungccaw hae kha byapia khylan te thyaasah khylan yn thua cih, laanpi paccyn khylan te a byakinnaw phy khylan a locceihtu kha amaw malang yn saw ty cih.
1
1 Hodaebya. Malakhi kyate Israel kalan Bawipaw bya tuh yn thua.
Bawipaw nynh Israel A Sungsah
2 Bawipaw nynh a hopaw tuh, Nanning kha kae sungsah oh.Ref 1.2-3: Rom 9.13Ref 1.2-5: Isa 34.5-17, 63.1-6; Jer 49.7-22; Eze 25.12-14, 35.1-15; Amo 1.11-12; Oba 1-14 Thuasalama nanning nynh, “Pawtemou kaening kha nae sungsah?” na ci oh. Esau tuh Jakob upaw thua khyh tou? cite Bawipaw nynh a ci. Tuhzemah Jakob kha ka sungsah,
3 thuasalama Esau tuh ka hua; a muaram kha alakawpaw lang ka rae cih zah a rho laephi kha suizaw hae hanlan ramkaw lang ka rae cih.
4 Edom nynh, “Aening tuh phiariphiarae nung ah thua oh zemah, arohpaw khua hae kha bua ah sakthui cih oh,” cite a ho hae ze, vaaw Bawipaw nynh a hopaw tuh: Minmin nynh a sak kho hae zemah kae nynh ka roh cih, minmin tuh ahoy leipaw ram, Bawipaw nynh zungzae a thinrianuapaw minphuin, cite ko athua cih hae.
5 Tuh-e tuh nae mit te na muih cih oh zah, “Bawipaw tuh Israel ram atolang cia alesae!” cite na ho cih oh.
Ranpibawi Ozia Ronaw
6 Ccapaw nynh a paaw kha sawtua zah, ryalahtu hae nynh mih bawipaw kha saw a tua hae. Kae tuh paaw ka thua lanze, ka tungvaw sawtuanaw tuh teimou a um? Kae tuh bawi ka thua lanze, ka tungvaw sawtuanaw tuh teimou a um? cite vaaw Bawipaw nynh a min pawlangria lei hae paw nanning, ranpibawi hae kha ae hopya oh. Nanning nynh, “Pawcihtemou na min tuh pawlang kae ria khyh?” na ci oh.
7 Ka silawhang vawlan khe anungsikuhpaw looh kha nae thuakhae oh. Te nanning nynh, “Tuh-e looh tuh pawcihtemou kae nungsisaku?” na ci oh. Tuhcite na honaw oh liate Bawipaw ccaboi tuh pawlang na ria vae khyh oh.
8 A mitzupaw sarangpaw khate si na law vae oh ze, tuh-e tuh sei khyh tou? Te a ccukhoupaw te thuasah, accihpaw te thuasah si na law vae oh ze, tuh-e tuh sei khyh tou? Tuhcite nae uktu bawi kha na pya oh ze, nae tungvaw a lungrythua cih tou? Maehoynaw ae pya cih oh tou? cite vaaw Bawipaw nynh a ci.Ref 1.8: Deu 15.21
9 Te Pachia nynh aening kha thaw oun cci nawlan, amaw kya-e maehoynaw kha ngiaku tua oh. Nanning tuh na sei oh. Aning nynh nanning kha lu kheit sanmah maehoynaw ae pya cih oh zawtou? cite vaaw Bawipaw nynh a ci.
10 Nanning nynh ka silawhang kya alakaw lan mae na aw khyh nawlan oh, nanning lukhakheit nynh beikinn thuakaw hae kha khaw vae sah! Nae tungvaw ka lungrythua khyh, nae kuih kya-e pyapaw ahlu kha ka ccou lan khyh, cite vaaw Bawipaw nynh a ci.
11 Khuanin a thuanaw kyate a ccawnaw kyacia ka min tuh minphuin hae laku kya alesae, khyzawvawkaw kya mynkhuhpaw te athyaapaw pyapaw uccaw tuh ka min te a pya hae; ka min tuh minphuin hae kya myarya alesae, cite vaaw Bawipaw nynh a ci.
12 Thuasalama nanning nynh tuh, Bawipaw ccaboi tuh anungsikuh, ccaboi vawlan e looh tuh pawlangria leite um kho athua, na ci oh zah ccaboi kha na nungsisaku oh.
13 “E ryalaw tuh thawbang lan kou um,” na ci oh zah, kae kha nae sarya oh, cite vaaw Bawipaw nynh a ci. Puathote na lawku oh paw kha thuasah, a ccukhoupaw, accihpaw kha thuasah pyapaw uccaw lante nae ccyng oh! Nae kuih kya-e tuh-e tuh kae ccoupah cih oh tou? cite Bawipaw nynh a ci.
14 A tuuphu kya tuutepaw mang a um pite, pya lan byakinkuh zah douccah leipaw sahiin te Bawipaw kalan si a lawpaw, ahynpaw ccungccaw tungvaw kya thyalawnaw um sah; kae tuh alesaepaw Siapharan ka thua zah, ka min tuh minphuin hae nynh saw a tua hae, cite vaaw Bawipaw nynh a ci.