5
Raerangsaro Bahkuhpaw A Dansah
(Mat 8.28-34; Luk 8.26-39)
Jesu te a zuitu hae tuh rili khuraw lang Garasene ram kya oun thua hae. Jesu tuh kohlung lungkhu te he a toikuh takaw te athyaa leipaw muisaw bahkuhpaw ccungccapaw nynh vaekheihmawte shawku kyate yn pou zah Jesu kha yn tungku. Tuh-e paw tuh shawku hae kya a umpaw thua zah hum nynh sanmah sivawrui te khii kho khyh hae. Aning tuh sivawlua thuh hae zah sivawrui te a he hae zemah sivawrui kha thoh pae zah sivawlua kha pong leih a khya; hum nynh sanmah ngaesah kho khyh hae. Khuazi khuadae shawku hae te mua hae kyakhe leih sia zah amaw te amaw kha lung te leih a awku. Asawnaw kyate Jesu kha he a muih tuh ccuenua zah a malang khe bakhung zah, “Ahang Huaccepaw Pachia Ccapaw Jesu, nang te kae tuh pawmou ah sekuh? Kae hynh vawsaw nae pya khyh nawlan Pachia min te kae ngiaku,” cite thawmawte a sia. Pawccecize Jesu nynh tuh-e paw tuh, “Nang athyaa leipaw muisaw, ccungccapaw kyate pou!” cite a cipya keiccu nynh thua. Jesu nynh, “Na min hummou?” cite a khia. Tuh-e paw nynh, “Ka min tuh Legion nynh thua, pawccecize kaening tuh patae kae cih,” cite a khung. 10 Tuin ram kyate asawnaw lang a dee khyh nawlan hae aning nynh Jesu kha thawte a ngia. 11 Tuin pe mua vawlan khe rampaeekuh hae paw voh hae tuh aphupi te a um hae. 12 Te raerangsaro hae balyn nynh, “Voh hae lungkhu lang kae tee ccaw minmin kalan beih oun saw,” cite Jesu kha a ngiaku hae. 13 Jesu nynh minmin kha a ua hae. Te athyaa leipaw muisaw hae tuh cceih hae zah voh hae lungkhu lang a tee hae; voh hae tuh rili kin apannaw langkhe thawte ccuebung hae zah rili kya pong phungkuh hae; voh hae tuh thong ning loukaw acih hae.
14 Voh a rintu hae nynh ccue hae zah tuh-e kong tuh khuapi te khua taraw hae kya balyn a ho hae. Ccungccaw hae tuh tuh-e acyihkuhpaw tuh do khylan a cceih hae. 15 Jesu kya a thua hae tuh raerangsaro bahkuh zah legion a hoipaw ccungccapaw nynh boeining lawkute a lungkyhrarih lan a haungpaw kha a muih hae tuh a rih hae. 16 Tuh-e a muih hae paw nynh raerangsaro bahkuhpaw kya pawte nynh acyiku cipaw te voh hae kya acyihkuhpaw kha a hopya hae. 17 Tetuh minmin nynh Jesu kha mih ram kyate a pou nawlan a ngia hae. 18 Jesu nynh kohlung lungkhu lang he a tee tuh raerangsaro bahkuhpaw ccungccapaw nynh amaw kya umbua lan a ngiaku. 19 Tuhzemah Jesu nynh ua khyh, “Nae inn lang na vaeccaw hae kalan la cceih lah na hanlan Bawipaw nynh ae cyipyapaw te ngaethya ae umsahnaw kha la hopah hae,” a cipya. 20 Tetuh aning nynh cceih zah Dekapolis ram khe Jesu nynh a cyipyapaw kha a ho vae, te ccungccaw hae balyn tuh mih ngaeangthua.
Jairas Ccanung te Jesu Boei Dung A Haenung
(Mat 9.18-26; Luk 8.40-56)
21 Jesu tuh kohlung te khuraw lang bua zua zah, rili kin a um lyakhe ccungccaw patae tuh amaw kalan oun sueluakuh hae. 22 Sinakok uktu hae lakuze lu kheit, a min Jairas cikuhpaw nynh yn thua zah Jesu kha he a muih tuh a cculeihpaw khe bakhung zah, 23 “Ka ccanung taraw vyavya a chih, beih yn cceih lah a tungvaw khe na kuih na khang zetuh a dan cih zah a hiin cih,” cite thawte a ngia.
24 Jesu tuh tuh-e paw ryte a cceih hae; ccungccaw patae nynh zui hae zah phang a lungnuaku hae. 25 Tuin kyakhe kum haw lae ning cia chiilua ccinaw a hoipaw nopinung lu kheit a um. 26 Sibawi patae nynh oih hae zah a hoipaw uccaw balyn pong a thangku zemah a ccinaw tuh hoyhua leite houh acihhua. 27 Tuh-e nung nynh Jesu kong kha thae zah ccungccazaw laku khe a nulang te yn cceih zah Jesu boei kha a hae. 28 Pawccecize tuh-e nung nynh, “A boei kha ka hae zetuh phe ka dan cih,” cite a tuaku. 29 Nopinung tuh vaekheihmawte a chii luapaw tuh phe akan, a pyn kya tuh-e ccinaw kyate ka dan vae cipaw a nyku. 30 Jesu nynh a kyate huhan a pou cipaw ccahe a nyh tuh ccungccaw zapi kalan maekuh zah, “Hummou ka boei a hae?” cite a khia hae. 31 A zuitu hae nynh, “Ccungccaw zapi nynh phang ae lungnuaku hae paw mang na muih pite, ‘Hummou yn hae?’ na ci,” a cipya hae. 32 Thuasalama Jesu nynh hummou yn hae cite muih khylan a pepan khe a do. 33 Nopinung nynh a tungvaw acyikuhpaw kha a nyku keiccu rih zah thyngku biate Jesu kalan cceih zah a malang khe bakhung zah acyikuhpaw balyn kha hmerarih lan a hopya. 34 Jesu nynh, “Ka ccanung na zynnaw nynh ae dansah vae, daebabi lan la cceih lah na ccinaw kyate dan ccavae,” a cipya.
35 Tuhte a ho cciamang lyakhe, sinakok uktupaw inn kyate ccungccaw abang oun thua hae zah, “Na ccanung kha phe chih vae, pawccemou ccangpatupaw hynh vawsaw na pya ry ung?” cite a hopya hae. 36 Tuh-e bya tuh Jesu nynh ccahe a thae tuh sinakok uktupaw kha, “Rih nan, zyn kyalya zyn,” a cipya. 37 Te Jesu nynh Peter, James te James neitaw Johan laelan humhung mah amaw kya zuiku lan ua khyh hae. 38 Sinakok uktupaw inn lang he a thua tuh siarisiarae um hae paw, thawte a rah hae paw kha a muih. 39 Innthung lang tee zah minmin kha, “Pawccemou siarisiarae na um oh zah na raw oh? Imuanung tuh chih khyh, a ihpaw nynh thua,” a cipya hae. 40 Minmin nynh a nuinse hae. Te mih balynte a pousah kou hae te, imuanung a nung te a paaw ryte amaw ry a umkheih hae paw ryte imuanung a inaw langkhe a tee hae. 41 Imuanung kha a kuih te kyng zah, “Talitha kumi,” a cipya; tuh-e asuilan tuh ‘Imuanung taraw, thokuh kae cipya,’ cipaw nynh thua. 42 Imuanung tuh vaekheihmawte thokuh zah a cceih (aning tuh kum haw lae ning acih vae paw nynh thua). Minmin tuh myaryamaw mih ngaeangthua. 43 Tuh-e kong tuh humhung mah a nysah khyh nawlan hae tynkaring lan kaw a pya hae; te aepaw hankhakheit pya oh cite a hopya hae.