12
Ahoy leipaw Ryalahtu hae Tousenaw
(Mat 21.33-46; Luk 20.9-19)
1 Jesu nynh minmin kha tousenaw phungpaw te bya a hopya hae: “Ccungccapaw lu kheit nynh misu khokhu raekuh zah hohung te po a koih, misu mianawpaw akhu kha karouh zah buhang phe a dua, te misu khokhu kha a hohtu hae kalan hohsakuh hae zah ramccang lang a cceih.Ref 12.1: Isa 5.1-2
2 Misu thae lo ccyh yn zaw tuh aning nynh a hanpaw misu thae kha law khylan a see lu kheit kha mih kalan a saw.
3 Minmin nynh tuh-e see tuh kyng hae zah a bua kou hae te, a kuih ccakaete a kisah hae.
4 Aning nynh ccangpaw see kha minmin kalan bua a saw; minmin nynh lung te deih hae zah a lu kya vaemaw a muesah kou hae te, maethyate a kisah hae.
5 Aning nynh ccangpaw see kha bua saw zah minmin nynh tuh-e paw tuh phe a chia hae; te ccangpaw patae kha mah saw hae zah abang kha a bua hae, abang kha a chia hae.
6 Khokhu hoitupaw nynh a sungsahpaw a ccapaw lu kheit kyalya nynh saw lanpaw a hoi vae. Nyathyakou tuh, ‘Minmin nynh ka ccapaw tuh saw a tua cih hae,’ ci zah a ccapaw kha minmin kalan a saw.
7 Thuasalama khokhu a hohtu hae nynh, ‘E paw tuh rhoccoutu nynh thua, rang oh, theih oh sih lah a rho tuh ah uccaw lang a tang vae cih,’ cite lu kheit te lu kheit a hoku hae.
8 Minmin nynh a ccapaw kha kyng hae zah a theih kou hae te, misu khokhu atolang khe a vua hae.
9 Tukeiccuze misu khokhu hoitupaw nynh pawtemou a cyi cih? Aning nynh yn cceih cih zah minmin kha marya a theih cih hae zah misu khokhu kha mingccang hae kalan a pya cih hae.
10 Ccathyaa kyaze,
‘Inn sak hae paw nynh
a nuee hae paw lung tuh
inn saknaw kya abyapi huapaw
apaki lang e lung lang yn tang.Ref 12.10-11: Sam 118.22-23
11 E tuh Bawipaw nynh
a cyipaw thua zah,
aening muihnaw kya
ngaeang lan umpaw nynh thua,’ cite
azeikuhpaw kha
na ria boi khyh oh tou?” a cipya hae.
12 Minmin nynh hynh-e tousenaw phungpaw hynh kaening nynh yn honua cipaw a nyku hae keiccuze Jesu kha kyng lan a zuaku hae; thuasalama ccungccaw zapi raw a ri hae keiccuze Jesu kha a cciataw hae.
Ngunto Kong Byakhianaw
(Mat 22.15-22; Luk 20.20-26)
13 Jesu nynh bya a hopaw kha kyngpya khylan minmin nynh Farasi hae te Herodias hae abang kha a sawnua hae.
14 Jesu kya a thua hae te, “Sazae, nang tuh ahmepaw nynh na thua, mirymihua na po khyh, pawccecize nang tuh ccungccaw hae kha maedo leite Pachia laanpi kha hmerarih lan na ccangpya hae cipaw kae ny. Sizar siapharan kalan ngunto pya lan accan tou, ccan khyh tou?
15 Kaening nynh kae pya cih tou, kae pya lan khyh tou?” cite a khia hae. Thuasalama Jesu nynh mih thyaruhnaw kha nyh zah minmin kha, “Pawccemou nae syntawtua oh? Denari kia kheit kha oun ccyngtua oh, ka la dotua,” a cipya hae.
16 Minmin nynh kia kheitpaw kha a cciakhae hae. Jesu nynh minmin kha, “E hynh hum muinsan te hum min mou?” cite a khia hae. Minmin nynh, “ Siapharan muinsan te min,” a ci hae.
17 Jesu nynh minmin kha, “Siapharan uccaw hae kha siapharan kalan pya oh lah, Pachia uccaw hae kha Pachia kalan pya oh,” a cipya hae. Minmin tuh a tungvaw kya mih ngaeangthua.
Thoothuinaw Kong Byakhianaw
(Mat 22.23-33; Luk 20.27-40)
18 Thoothuinaw um khyh cite a ho hae paw Sadusi hae abang nynh Jesu kalan oun cceih hae zah,Ref 12.18: Loc 23.8
19 “Sazae, ‘Ccungccapaw lu kheit nynh ccaawsaah leite a zu kha a chitaw ze, tuh-e paw a neitawpaw nynh tuh-e zu tuh a umkhae cih zah a upaw elang ccaaw a saahpah cih,’ cite Moses nynh oun zeipya.Ref 12.19: Deu 25.5
20 Vaekheit tuh uno lu sari a um hae. Atawccapaw nynh zu hoi zah ccaawsaah leite a chih.
21 Lu ningnaw nynh tuh-e nung tuh umkhae zah ccaawsaah leite bua a chih; te lu thumnaw nynh tuhawte a chitaw;
22 lu sari mawte tuh-e nung tuh umkhae hae zah ccaawsaah leite a chih hae; nyathyakou tuh tuh-e nopinung mah a chihbua.
23 Tukeiccuze thoothui nin kya tuh-e nung tuh hum zu lang mou a tang cih? Pawccecize lu sari mawte tuh-e nung tuh zu lang a umkhae hae,” cite a khia hae.
24 Jesu nynh minmin kha, “Ccathyaa te Pachia thungnaw kha na ny khyh oh keiccuze na mesei oh.
25 Pawccecize minmin tuh chinaw kyate he a thoothui hae tetuh zuvaw tang ci um vae khyh, zu dypyaku ci mah um vae khyh, minmin tuh vaawlang e vaaw hae hawte nynh athua vae hae.
26 A chih hae paw thoothuinaw kong lante Pachia nynh, ‘Kae tuh Abraham Pachia, Isak Pachia te Jakob Pachia nynh ka thua,’ cite thabu kyate Moses a hopyapaw kha Moses ccauh kya na ria boi khyh oh tou?Ref 12.26: Exo 3.6
27 Pachia tuh a chih hae paw Pachia thua khyh, a hiin hae paw Pachia nynh thua, tukeiccuze nanning tuh myarya na mesei oh,” a cipya hae.
Byapi huapaw Kawbya
(Mat 22.34-40; Luk 10.25-28)
28 Kawbya sazae lu kheit nynh yn cceih zah minmin a eiku hae paw kha thae zah Jesu nynh Sadusi hae kha hoyte a phipya hae paw kha a muih keiccuze Jesu kha, “Kawbya balyn kyaze paw kawbya mou abyapihua?” cite a khia.Ref 12.28-34: Luk 10.25-28
29 Jesu nynh, “Kawbya balyn kyaze abyapi huapaw kawbya tuh: ‘Pou Israel, ngaetua; Bawipaw ah Pachia tuh ccangkheit kyalyapaw Bawipaw nynh thua.Ref 12.29-30: Deu 6.4-5
30 Bawipaw na Pachia kha na thinlung balyn te, na hiinnaw balyn te, na tuanaw balyn te, na thawzung balyn te na sungsah cih,’ cipaw hynh nynh athua.
31 Ccangningnaw tuh: ‘Na innpaw kha namaw toulou hawte na sungsah cih,’ cipaw hynh nynh thua. E hae laeze abyapi huapaw kawbya ccangpaw um vae khyh,” a cipya.Ref 12.31: Lev 19.18
32 Kawbya sazaepaw nynh, “Sazae, na hopaw tuh akyh, byaccing nynh na ho, ‘Pachia tuh ccangkheit kyalya nynh a um; amaw laelan ccangpaw Pachia um vae khyh.’Ref 12.32: Deu 4.35
33 Pachia kha thinlung balyn te, hawnaw balyn te, thawzung balyn te sungsah lanpaw te ah innpaw kha ahmaw toulou hawte sungsah lanpaw tuh apynpi te maee-ute silawnaw hae te silawnawpaw balyn laeze abyapi huapaw nynh thua,” cite a hopya.Ref 12.33: Hos 6.6
34 Aning nynh hawrarih lante a khungpaw kha Jesu nynh he a muih tuh amaw kha, “Nang tuh Pachia peenaw te na sawkuh khyh,” a cipya. Tukoute Jesu kha hum nynh sanmah byakhia ngan vae khyh hae.
Messiah tuh Hum Ccapaw Mou?
(Mat 22.41-46; Luk 20.41-44)
35 Jesu nynh beikinn kya a ccangpya lya hae ze a hopaw tuh, “Pawtemou kawbya sazae hae nynh, ‘Messiah tuh David Ccapaw nynh thua,’ cite a ho kho hae?
36 David amaw ccaccei nynh Thyaa Muisaw liate ho zah,
‘Bawipaw nynh ka Bawipaw kha,
“Na rhaw hae kha na ccuphe kaw
kae nung makhia hae nang tuh
ka ranglang khe haung,” a cipya,’ a ci.Ref 12.36: Sam 110.1
37 Tukeiccuze David amaw ccaccei nynh Messiah kha ‘Bawipaw’ cite a ko lanze pawtemou aning tuh a ccapaw athua kho cih?” a ci. Ccungccaw zapi nynh a bya kha lungtuate a ngae hae.
Kawbya Sazae hae Raeringnaw Pyanaw
(Mat 23.1-36; Luk 20.45-47)
38 A ccangpya lya hae khe Jesu nynh, “Kawbya sazae hae kha la raeringkuh oh. Minmin tuh boeining ccuabalaepaw lawkute innlaepae ry hae zah kungkunaw kya sawtuate byabeihku a ry hae;
39 sinakok kya tungkhung ahoy huaccepaw ry hae zah poi kya ahoy huanaw khe a um ry hae;
40 minmin tuh nomae hae inn kha luade hae zah ccungccaw hae nynh oun muih hae sah cite hynhsepi saw a sang hae; minmin tuh accih huapaw detahnaw kha a mue cih hae,” a ci.
Nomaenung Lungsing
(Luk 21.1-4)
41 Jesu tuh sisua bawng te ahawiliakuh lante haung zah ccungccaw hae nynh sisua bawng lungkhu lang phua a sang hae paw kha a do; a hoirum hae paw patae nynh phua patae a sang hae.
42 A ryachipaw nomaenung lu kheit nynh yn thua zah, pia haw loukaw aphupaw daw phuapia pia ning kha a sang.
43 A zuitu hae kha ko hae zah, “Byaccaccing kae hopya oh, sisua bawng lungkhu lang a sangpaw ccungccaw hae balyn laeze e a ryachipaw nomaenung nynh alunghua a sang.
44 Pawccecize minmin balyn tuh mih hoirumnaw patae kya-e kha a sang hae; thuasalama e nung tuh a ryachi pite a hiinnaw hanlan a hoipaw balyn kha marya a sang,” a cipya hae.