7
A Ozia Thahpaw Israel
1 Ka hanlan ngaethya lan kou um!
Hawnin ccyh kya thingthae
lo koute a muihkuh leipaw hawte thuasah,
misu thae lo koute
ange kya ae lanpaw
a muihkuh leipaw hawte thuasah
ka thua vae;
ka ae rypaw avoi typaw
thaeku thae kha um vae khyh.
2 Ram lungkhu kya alungzipaw
ccungccaw um vae khyh,
adingpaw ccungccaw
lu kheit san um vae khyh;
mih balynte ccungccaw kha
chia lan buhkhaw hae zah,
lu kheit te lu kheit
kaang a syakhawkuh hae.
3 Ahoy leipaw cyi nawlan
mih kuih tuh myarya apuakuh;
bawi te byapiatu hae nynh
pyaruh kha a ngia hae,
kaw a hoipaw nynh a rypaw kha
hopah hae zah, tuhcite byading kyate a cceihsei hae.
4 Minmin kyaze ahoy huaccepaw tuh
thabu hawte thua zah,
minmin kyaze ading huaccepaw tuh
tureih kya-e hinpaw hawte nynh thua.
Pachia nynh raeringnaw
a la pya vae hae hawte,
minmin detahnaw nin tuh yn thua vae;
atu tuh mih lungmuanaw ccyh nynh thua vae.
5 Na banpaw kha zyn nan,
na sungsahpaw kha doliakuh nan;
na by vawlan a ihpaw na zu kya heize
raeringkute byaho;
6 pawccecize ccapaw nynh
a paaw kha a thethyasah zah,
ccanung nynh a nung kha a rawse,
monung nynh a ninnung kha a rawse;
nae rhaw hae tuh nae innbyn kya-e
ccungccaw hae kha nynh athua hae.Ref 7.6: Mat 10.35-36; Luk 12.53
7 Thuasalama kae tuh
Bawipaw kha ka ccung cih,
yn khumtu Pachia kha
ka ngaehoikuh cih;
ka Pachia nynh yn thaepah cih.
Ngaesikunaw te Pachia Doliakunaw
8 Pou ka rhawpaw, ka tungvaw
na lungtua nan sah;
kae tuh ka khuliaku ze
ka thokuh cih, mohnaw kya
ka haung ze Bawipaw tuh
ka hanlan awnaw athua cih.
9 Bawipaw tungvaw
ka sei keiccuze
a thinrianaw kha ka teing cih,
aning nynh yn pankhae zah,
bya yn piapya mawlaezung ka teing cih.
Awnaw kalan khe
yn poukhae cih zah, amaw kya-e
thyaaccounaw kha ka mue cih.
10 Tetuh, “Bawipaw na Pachia tuh
teimou a um?” cite
yn khiapaw ka rhawpaw nynh
tuh-e tuh a muih cih zah a maethah cih.
Aning nynh a shungpaw kha
ka muih cih; laanpi e tuiccua hawte
amaw kha syde athua cih.
Ki lanpaw Kong Profehbya
11 Na khualungrua raenaw ccyh yn thua cih!
Tuin nin vae tuh na ram tuh akochih cih.
12 Tuin nin vae tuh Assiria ram te
Izip khuapi hae kyate thuasah,
Izip ram te Vawpi kyate thuasah,
rili kin hae te mua hae miakaw kyate thuasah
na kalan oun cceih cih hae.
13 Thuasalama tuh-e laephi kya-e ccungccaw hae
mih cyisahnaw ahoy leipaw keiccuze
tuh-e laephi tuh ccungccaw phe adae cih.
14 Na tuuphu athuapaw
na ccungccaw hae hynh
na hoitang te rin hae, minmin tuh
ramkaw kya ramnonaw khe
mih makhaete a um hae paw
na tuuphu nynh thua hae;
langmawlya hawte,
Bashan te Gilead kyakhe
rampaeesakuh hae.
15 Izip ram kyate na pou lya hawte,
ngaeang lan umpaw uccaw hae kha
kaening oun muihsah.
16 Minphuin hae nynh
a muih cih hae zah,
mih thawzung balyn kha
mih maethyakhaekuh cih;
mih mung kha mih kuih te
a huhkuh cih hae;
mih nakaring mah nawthae lan khyh;
17 hupaw hawte thuasah,
laekhu kya avawpaw hawte thuasah
laenoi kha a lya cih hae.
mih rhawlungrua alungkhu kyate
thyngkute a pou cih hae;
Bawipaw ah Pachia kalan khe
thinphang ri biate oun ki cih hae,
te na rawri biate a thadyn cih hae.
Pachia Sungsahnaw te Ngaethyaumsahnaw
18 Hoyleinaw kha ngaethyate,
a laehypaw a rho ccungccaw hae
mih cyiseimenaw kha
a ngaethya hae paw,
nang ae lopaw Pachia hummou a um?
A thawccinaw langsakunaw kyakhe
a lungrythua keiccuze
aning tuh zungzae a thinria khyh.
19 Aning nynh aening kha
ngaethya bua oun umsah cih zah,
aening hoyleinaw balyn kha
a ccu kaw khe a syde cih.
Kae seinaw balyn kha
rili akhupaw lungkhu langkhe na vua cih.
20 Langmawlya kae minpaaw hae kya
bya na kinku vae hawte,
na lungzinaw kha Jakob kya
na langsakuh cih zah,
arulaekuh leipaw na sungsahnaw kha
Abraham kya na langsakuh cih.