6
Pachia nynh Israel Seibenaw
1 Bawipaw nynh a hopaw
bya hynh thaetua oh:
Tho oh lah, mua hae malang khe
nae byathan kha hopya tua oh,
sangpyng hae nynh
nae roi kha thae hae sah.
2 Pou mua hae, zungzae atynpaw
laephi athonaw aleihpaw hae,
Bawipaw byathan hynh ngaetua oh;
pawccecize Bawipaw tuh
a ccungccaw hae tungvaw
byathan hoi zah,
Israel te bya a eikuh cih hae.
3 “Pou ka ccungccaw hae,
nanning kha pawmou kae cyi oh?
Pawtemou nae thaw kae bang sah oh?
Oun khungtua oh!
4 Nanning kha Izip ram kyate
kae cciakhae thung oh zah,
seetangnaw kyate kae shawkhaw oh;
nae malang khe Moses, Aaron te
Miriam kha kae sawpya oh.Ref 6.4: Exo 4.10-16, 12.50-51, 15.20
5 Pou ka ccungccaw hae,
Moab siapharan Balak nynh
a paccynkupaw kha thuasah,
Beor ccapaw Balaam nynh
bya a khungrupaw kha thuasah
liathui oh, Bawipaw nynh
nanning khum khylan
a cyipaw kha na ny nawlan oh,
Shittim kyate Gilgal kyacia
acyihkuhpaw kha
liathuitua oh,” a cipya hae.Ref 6.5: Nam 22.2—24.25; Jos 3.1—4.19
Pachia nynh A Rypaw
6 Bawipaw malang khe
paw ccyngpyate mou ka cceih cih zah,
ahangnaw umpaw
Pachia malang khe ka beik cih?
Maee-ute silawnaw te kum kheitpaw
vaetuataw hae khate tou
amaw kalan ka cceih cih?
7 Bawipaw nynh tuutepaw
thong kheit te chitui vawpi
thong haw kha a lungrythua vema?
Ka cyiseimenaw hanlan
ka ccatawccaw kha tou ka pya cih?
Ka thinlung seinaw hanlan
ka ccaaw kha tou ka pya cih?
8 Pou ccungccapaw, aning nynh
ahoypaw kha phe ae hopya vae;
dingrarih lante cyi lanpaw,
thawccinaw hoi lanpaw te
zakawsangsakute Pachia malang
hiin lanpaw kha
Bawipaw nynh nang
ae ngiapaw thua khyh tou?
Hynhunaw te Puathonaw kha Detahnaw
9 Bawipaw roi tuh
khuapi kya accae
(na min kha rawrinaw tuh hawnaw nynh thua):
Pou khuapi kya a pumkuh hae paw,
ngaetua oh!
10 Ccungccaw hoylei hae inn kya
umpaw ahme leite a mue hae paw sisua te
ahme leipaw tounawpaw
khinlung kha ka ning kho cih tou?
11 Ahme leipaw zawccu te
ahme leipaw khinlung
a mang hae paw tungvaw
ka ngaesang kho cih tou?
12 Khua lungkhu e mihoi hae tuh
puathonaw te phe abeih hae;
khua kya um hae paw tuh
hynbya ho hae zah,
mih khalang lungkhu kya
hynbya a hopaw lae a um.
13 Tuhcite na seinaw keiccuze
nang kha vuate ro khylan
ka thotakaw vae.
14 Na ae zemah na byn lan khyh,
na lungkhu kya kanmawnaw
a um cih; na mue zemah
na ccakhungkuh lan khyh,
na ccakhungkupaw kha
thaloi rhaw kalan ka pya cih.
15 Ccacii na tu zemah
looh na rue lan khyh;
chitui na miaa zemah
chitui kha na thuhkuh lan khyh;
misu thae na su zemah
misutui na neih lan khyh.
16 Pawccecize Omri siapharan
phungbya kha thuasah,
Ahab siapharan nynh
a cyipaw balyn kha thuasah
na zui zah, minmin nynh
tuanaw ae pya hae paw kha na zui.
Tukeiccuze nang tuh
ccungccaw adaepaw lang
kae rae cih zah, khuaccaaw hae kha
a sarya hae paw lang ka rae cih hae;
tuhcite nang tuh ccungccaw hae nynh
nuinsenaw kha na teing cih.Ref 6.16: 1Si 16.23-34, 21.25-26