6
Bawipaw nynh Moses kha hynhte a hopya:Ref 6.1-7: Nam 5.5-8 Lukhakheit nynh a innpaw kha uccaw ccypyanaw hanlan aamahkhan lante nungpaw uccaw kong a hynpya ze thuasah, milae uccaw a luade ze thuasah, a innpaw kha a ling ze thuasah, azopaw uccaw a muihnaw kong kha hyn zah ahme lei lante thya a lawku ze thuasah, tuhcihawpaw cyiseinaw kha raete Bawipaw tungvaw sei zah, a cyiseinaw kha he a nyhkuh te, luadete a lawpaw uccaw kha thuasah, a hynpyapaw kha thuasah, aamahkhan lan a nungpaw uccaw thuasah, azopaw uccaw a muihpaw kha thuasah, ahme lei lante thya a lawnua kupaw uccaw kha thuasah, a lawpaw uccaw zeihte a pyathui cih zah tuh-e uccaw pum pangaw pum kheit kha a biapah chih cih. A cyiseinaw kha he a thaethya te, tuh-e tuh a hoitu kalan a pyathui cih. Te tuuphu kya-e douccahpaw tuutepaw sa kheit khyhze amee phe lokuhpaw kha Bawipaw kalan cyiseinaw silawnaw lante ranpibawi kalan khe a cciakhae cih. Aning elang ranpibawi nynh Bawipaw malang khe seingaethyanaw kha a raepah cih, te a cyiseinaw miakaw kha ngaethya athua vae cih.
Silawnawpaw Phungbya
Bawipaw nynh Moses kha hynhte a hopya: Aaron te a ccapaw hae kha hynhte kawpya hae: E hynh maee-ute silawnaw phungzae nynh thua. Maee-ute silawnawpaw kha silawhang vawlan angaelung khe khuazi zidae awkhua cia nung athua cih zah silawhang vawlan e maee tuh po arua cih. 10 Ranpibawi nynh akaw nawkupaw ccuhoih kha a lawkuh koute a boeining kha a lawkuh cih; te silawhang vawlan maee nynh a upaw maee-ute silawnaw buhhaw kha a lah cih zah silawhang pe khe a nung cih. 11 Oute a boeining kha a khahku cih zah ccangpaw boeining kha a lawkuh cih, te buhhaw kha ryahmin atolang athyaapaw hmin langkhe a cciakhae cih. 12 Beikhang vawlan e maee tuh po arua cih zah chih lan khyh. Ranpibawi nynh awkhua takyh maeething kha a ccong chih cih zah maeething vawlan khe maee-ute silawnaw kha a khang cih, ccawkunaw silawnaw atho kha tuh-e silawhang vawlan khe maee te a u cih. 13 Beikhang vawlan khe maee tuh po arua cih zah chih lan khyh.
14 E hynh ccathae silawnaw phungzae athua cih. Aaron ccapaw hae nynh silawhang a malang, Bawipaw malang khe tuh-e tuh a pya cih hae. 15 Minmin nynh kuihphe te hu khinpaw vaekhui kha thuasah, ccathae silawnaw kya-e chitui te pyapaw vawlan umpaw frankinsen balyn kha thuasah a lah cih hae zah, tyty ny nawlan Bawipaw kalan amynthuapaw lante silawhang vawlan khe maee te a u cih hae. 16 Alaepaw kha Aaron te a ccapaw hae nynh a ae cih hae; hminthyaa kyakhe ransi phing leite a ae cih hae; tungkunaw bu voidu lungkhu khe a ae cih hae. 17 Ransi ryte thoude thua lan khyh. Maee te kamaw kalan pyapaw hae kya-e kha minmin ccou khylan ka pya vae hae; tuh-e tuh seithyaanaw silawnaw te cyiseinaw silawnaw hawte athyaa huaccepaw nynh thua. 18 Aaron ciihan pise miakaw nynh a ae cih hae, maee te Bawipaw kalan pyapaw hae kyaze nae she balyn kya zungzae a cyi lan hae paw nynh thua; tuh-e pyapaw kha a typaw miakaw tuh athyaapaw lang a tang cih.
19 Bawipaw nynh Moses kha hynhte a hopya: 20 E tuh chitui thuh athua nin khe Aaron te a ccapaw hae nynh Bawipaw kalan a pya hae paw nynh thua: palei a la pya hae paw vaekhui ephah ccangkheit, pum haw pum kheit kya-e angankuh kha awkhua ccyh kya, angankuh kha zete ccyh kya a pya cih hae. 21 Talyng-ang lungkhu khe chitui te thou athua cih; tuh-e tuh hoyte ciasahte, ccathae silawnaw kya-e thoupaw sanlou a eihpaw hawte na ccyng cih, amynthuapaw lante Bawipaw kalan na pya cih. 22 Te Aaron ciihan kya-e Aaron ccelang chitui thuh a thuapaw ranpibawi nynh tuh-e silawnawpaw tuh a paccyn cih; tuh-e tuh Bawipaw hanlan zungzae cyi lanpaw thua zah, abalynte maee te u lanpaw nynh thua. 23 Ranpibawi kya-e ccathae silawnaw miakaw kha abalynte u athua cih; ae thua lan khyh.
24 Bawipaw nynh Moses kha hynhte a hopya: 25 Aaron te a ccapaw hae kyakhe hynhte hopah hae: E hynh seithyaanaw silawnaw phungzae nynh thua. Seishawnaw silawnawpaw kha Bawipaw malang maee-ute silawnawpaw chia a thuanaw hmin kyakhe chia athua cih; tuh-e tuh athyaa huaccepaw nynh thua. 26 Seithyaanaw silawnaw a raepaw ranpibawi nynh tuh-e tuh a ae cih; tungkunaw bu voidu lungkhu, hmin thyaapaw kyakhe ae athua cih. 27 Tuh-e a saw kha a typaw miakaw tuh athyaapaw lang a tang cih; te a chii abang kha boeining kya a beku zetuh, abekuhpaw boeining kha hmin thyaapaw kyakhe na suh cih. 28 Saw thungnawpaw laephi ang kha koi athua cih; thuasalama sohin ang te thung athua zetuh nuih lan zah tui te sing athua cih. 29 Ranpibawi pise miakaw nynh tuh-e tuh a ae cih hae; tuh-e tuh athyaa huaccepaw nynh thua. 30 Thuasalama hmin thyaapaw kya seingaethyanaw hanlan tungkunaw bu lungkhu lang teekhae a thuapaw seishawnaw silawnawpaw pawpaw chii mah ae thua lan khyh; tuh-e tuh maee te u athua cih.