25
Sabbath Kum
(Deu 15.1-11)
1 Bawipaw nynh Moses kha Sinai Mua vawlan khe hynhte a hopya:Ref 25.1-7: Exo 23.10-11
2 Israel ccungccaw hae kyakhe hynhte hopah hae: Kae pya cih oh paw ram lungkhu lang he na tee oh te, tuh-e ram nynh Bawipaw elang sabbath a naawsah cih.
3 Kum taruh lungkhu nae loo kya na ccou cih oh zah kum taruh lungkhu nae misu khokhu kya-e akaran kha na baepah cih oh zah athae kha na suelua cih oh;
4 thuasalama kum sarinaw kum kya tuh ram hanlan daebabi lan haeungpaw sabbath, Bawipaw hanlan sabbath athua cih: nae loo kya na ccou lan khyh oh zah nae misu khokhu kya-e akaran hae kha mah na cciccae lan khyh oh.
5 Amaw po lan apopaw kya-e kha na rue lan khyh oh zah akaran na cciccae lei oh paw kya-e misu thae mah na suelua lan khyh oh: tuh-e kum tuh ram hanlan daebabi lan haeung kum athua cih.
6 Ram sabbath lungkhu kya ram nynh a pousahpaw kha namaw, na seenung hae te na seepaw hae, na hoh hae paw te naemaw kya a um hae paw ramccang hae nynh na ae cih oh;
7 ram nynh a pousahpaw balyn tuh nae sahiin-awvaw hanlan te nae ram kya umpaw loramsaw hanlan looh athua cih.
Jubilee Kum
8 Sabbath vaesarinaw hae kum aro ccyh tuh sung pali kum takua athua nawlan, sabbath kum kha vaesari leit sari na ria cih oh.
9 Oute mungkae kha myarya ccae lan na tu cih oh; sawpaw sah sarinaw nin haw nin kya seingaethyanaw rae nin khe nae ram balyn kya phe lekuh lan mungkae kha na tu cih oh.
10 Te kum sung pangawnaw kum kha taekhiate na thyaasah cih oh zah ram lungkhu um hae paw balyn kyakhe luenaw kha na thaesah cih oh. Tuh-e tuh nanning elang jubilee athua cih: nanning lu kheit cci nynh na hoi oh paw kha bua na mue cih oh zah, nae innbyn raveih lang na ki cih oh.
11 Tuh-e sung pangawnaw kum tuh nanning elang jubilee athua cih; ccacii na ccou lan khyh oh, amaw po lan a popaw kha na rue lan khyh oh, akaran na cciccae lei oh paw kya-e misu thae kha na rue lan khyh oh.
12 Pawccecize jubilee nynh thua; jubilee tuh nanning elang athyaapaw athua cih: loo kyate apoupaw kyalya kha na ae cih oh.
13 Jubilee kum kyahin, nanning lu kheit cci nynh na hoi oh paw kha a hoitupaw kalan na kii cih oh.
14 Na innpaw kalan na zua ze thuasah, na innpaw kyate na re ze thuasah lu kheit te lu kheit na lingkuh lan khyh oh.
15 Na innpaw kyate na re lanze, jubilee kum koute riapaw kum hae elang kyalya amee na pya cih; a zuatu nynh bua yn thua cih paw jubilee azaw maw loohrue kum hae hanlan kyalya ae zuapah cih.
16 Kum alung lanze a mee tuh aru cih zah, kum azya lanze a mee azoi cih, pawccecize loohrue kum alung azya thyhte ae zuapyapaw nynh thua.
17 Lu kheit te lu kheit na lingkuh lan khyh oh zah nae Pachia kha na rih cih oh; pawccecize kae tuh Bawipaw nae Pachia nynh ka thua.
18 Ka phungbya hae kha na zui cih oh zah ka phungzae hae kha tynkaring lan na zui cih oh. Tuhteze tuh ram lungkhu khyndadyh lan na um cih oh.
19 Ram nynh thingthae-rohthae a pousah cih, te nae vue phe so lan na ae cih oh zah, ram lungkhu khyndadyh lan na um cih oh.
20 Nanning nynh, “Ccacii ah ccoukuh khyh oh zah, looh ah ccakhungku khyh keiccu oh ze, kum sarinaw kum kya pawmou ah ae cih oh?” cite na khiakuh cih oh tou?
21 Kum taruhnaw khe nanning elang ka hythuanaw kha kaw ka pya cih zah, tuh-e kum khe kum thum hanlan looh avoi cih.
22 Kum taryanaw kum kya ccacii he na ccou oh kyate kum takuanaw kum looh he na rue oh kyacia, looh arynpaw kha na ae cih oh.
23 Loram kha zungzae hanlan na zua lan khyh oh. Pawccecize loram tuh kamaw uccaw nynh thua; nanning tuh kamaw kya mikhia hae te a hohkuhtu hae nynh na thua oh.
24 Na hoi oh paw loram balyn kya loram kha shaw thui khonaw na ua cih oh.
25 Nae uno lukhakheit nynh vawsaw tung zah a hoipaw abang kha a zua lanze, anaekuhpaw uno nynh a ccianua cih zah a puiziapaw nynh a la zuapaw kha a shaw cih.
26 A shawtu lanpaw puizia a hoi khyh lanze, amaw tuh yn hoirum zah shawkunaw lanpaw phe zaw lante yn hoi lanze,
27 a la zuapya lya te aropaw kum kha riasah lah pya lan accanpaw a mee kha a la zuapyapaw ccungccaw kalan a kiithui cih.
28 Thuasalama shawnaw lanpaw kha phe zaw lan a hoi khyh zetuh, a la zuapaw uccaw tuh a retu kya jubilee kum cia a um cih; jubilee kyakhe tuh-e uccaw tuh luesah athua cih zah, langmaw a hoitupaw kalan kiithui athua cih.
29 Lukhakheit nynh koihlupaw khuapi kya umpaw inn innkheit kha a zua lanze, a zua koute kum kheit lungkhu shaw kho athua cih; shawnaw kaw uapaw ccyh tuh kum kheit athua cih.
30 Tuh-e inn tuh kum kheit ccing zah accyh athang maw a shaw vae khyh zetuh, tuh-e koihlupaw khuapi kya umpaw inn tuh a retu te a ciihan hae balyn inn lang zungzae a tang vae cih, tuh-e inn tuh jubilee kya zemah kii thua lan khyh.
31 Thuasalama koihlu leipaw khua taraw kya-e inn hae tuh ramkaw e loo hae hawte ria athua cih; tuh-e hae tuh shaw kho athua cih hae zah jubilee kya vae ze kii athua cih hae.
32 Levi hae khuapi kya tuh mih khua e mih inn hae kha minmin nynh shawnaw kaw zungzae a hoi cih hae.
33 Levi hae khuapi kya zua a thuapaw inn hae te jubilee kya kii athua cih paw inn hae kha tuh Levi hae kyate shaw kho athua cih; pawccecize Levi hae khuapi kya umpaw inn hae tuh Israel ccungccaw hae lakuze Levi hae nynh a hoi hae paw nynh thua.
34 Thuasalama Levi hae mih khuapi pepan umpaw loo hae kha zua kho thua khyh; pawccecize tuh-e tuh minmin nynh zungzae hanlan a hoi hae paw nynh thua.
35 Nae uno lukhakheit tuh vawsaw tung zah nanning kya a reihpekuhpaw lang a tang lanze, amaw kha na bawm cih; aning tuh ramccang ccungccaw a um buapaw hawte nae kya a umbua cih.Ref 25.35: Deu 15.7-8
36 Aning kyate ato thuasah, amia thuasah na lah lan khyh, na Pachia kha ritua; aning tuh namaw kya umbua sah.
37 Aning kha ato te phua na koiisakuh lan khyh zah looh kha ccahpaw lante na bawm lan khyh.Ref 25.37: Exo 22.25; Deu 23.19-20
38 Kae tuh Izip ram te ae poukhae oh paw, Kanaan ram ae pya cih oh paw te nae Pachia athua cih paw Bawipaw nae Pachia nynh ka thua.
39 Nang ae reihpekuhpaw lukhakheit tuh myarya ryachi zah amaw te amaw kha na kya a zuaku lanze, see hawte na mang lan khyh.Ref 25.39-46: Exo 21.2-6; Deu 15.12-18
40 Hohpaw ccungccaw hawte thuasah, mikhia hawte thuasah na umkheih cih oh. Jubilee kum athua makhia rya ae lawpah cih.
41 Oute amaw te a ccaaw hae tuh na uknaw kaw kyate a lue cih hae; mih innbyn hae kalan te mih minpaaw hae laephi kalan a ki cih hae.
42 Pawccecize minmin tuh Izip ram kyate ka poukhae hae paw ka rya yn lawpahtu hae nynh thua hae; see hae kha zua hawte minmin kha zua thua lan khyh hae.
43 Minmin kha myarya ccih lante na uk lan khyh hae, na Pachia kha na rih cih.
44 Na hoi lanpaw seenung hae te seepaw hae tuh na pepan umpaw minphuin hae kyate na re cih.
45 Nanning laku um hae paw ramccang hae kyate thuasah, nae ram kya pui hae paw mih innbyn hae kyate mah thuasah minmin kha na re kho oh; minmin tuh na hoi oh paw athua cih hae.
46 Minmin kha naemaw nukhute nae ccaaw hae nynh po a lawkuh cih hae zah rho lang a ccou cih hae paw uccaw hawte athua cih hae. Minmin kha see lang na mang cih oh, thuasalama nae uno Israel hae kha tuh, naemaw te naemaw myarya ccih lante na ukkuh lan khyh oh.
47 Nanning laku umpaw ramccang ccungccaw tuh yn hoirum zah, nae puizia lukhakheit tuh tuh-e ramccang ccungccaw kya vawsaw tung zah amaw te amaw kha tuh-e paw kya phe a zuaku lanze, tuhkhyhze ramccang ccungccaw innbyn kya-e lukhakheit kya a zuaku lanze,
48 amaw te amaw a zuakuh koute shawkunaw kaw a hoi cih; a uno lukhakheit nynh a shawkhaw kho,
49 tuhkhyhze a paaw uno nynh thuasah, tuhkhyhze a paaw uno ccapaw nynh thuasah, tuhkhyhze chiisaw naekuhpaw a innbyn kya-e lukhakheit nynh thuasah a shaw cih; tuhkhyhze yn hoirum lanze amaw te amaw a shawkuh cih.
50 Amaw te amaw kha ramccangpaw kalan a zuakunaw kum kyate jubilee kum cia, kum abalyn kha amaw te a retupaw nynh a ria cih hae; zuanaw mee kha kum alung azya thyhte tuaa athua cih: a retu kya a umpaw accyh kha ryalahtu hohnaw accyh thyhte tuaa athua cih.
51 Kum patae abou ung zetuh, shawkunaw mee hanlan a la renaw mee kha a kii bang cih;
52 te jubilee azaw maw, kum tuh beihtaraw kyalya abou vae zetuh, minmin nynh a tuaa cih hae: kum alung azya thyhte a tuaa cih hae zah shawkunaw mee kha a pya cih.
53 Aning tuh ramccangpaw kawhoinaw zakaw khe kum kheit koute kum kheit hohpaw ccungccaw hawte a um cih, nae mitmuihnaw kya myarya ccih lante uk lan khyh.
54 Te tuhcihawpaw phinkhakheit te shawkhaw athua vae khyh zetuh, amaw te a ccaaw hae tuh jubilee kum kya a lue cih hae.
55 Pawccecize Israel ccungccaw hae tuh kamaw rya a lahtu hae nynh thua hae; minmin tuh Izip ram kyate ka poukhae hae paw ka rya a lahtu hae nynh thua hae: kae tuh Bawipaw nae Pachia nynh ka thua.