24
Maeekhua
(Exo 27.20-21)
1 Bawipaw nynh Moses kha hynhte a hopya:
2 Maee tyty a aw ccaw cite, maeekhua hanlan aphongkuhpaw oliv chitui athyaapaw kha kamaw kalan oun ccyng oh cite Israel ccungccaw hae kha kawpya hae.
3 Tungkunaw bu kya byakin thingkua zokhawpaw boei atolang, Bawipaw malang khe awkhua te zete cia maee tyty a rua nawlan Aaron nynh a paccyn cih; tuh-e tuh nae she takyh kya zungzae hanlan kawpya athua cih.
4 Aaron nynh sui ccite raekuhpaw maeekhuatung vawlan umpaw maeekhua hae kha Bawipaw malang khe tyty a paccyn cih.
Boei Beikbu elang Sanlou
5 Ahoypaw vaekhui kha na lah cih zah sanlou phe haw lae ning kha na thou cih; tuh-e sanlou phe kheit cci tuh ephah ccangkheit kya-e pum haw pum ning athua cih.Ref 24.5-6: Exo 25.30
6 Tuh-e sanlou hae kha sui ccite raekuhpaw ccaboi vawlan khe ring kheit kyaze phe taruh ccite, ring ning lang na nung cih.
7 Tuh-e ring kheit cci kyakhe athyaapaw frankinsen kha na nung cih, tuh-e tuh Bawipaw kalan maee te silawnaw lante sanlou hanpaw liathui silawnaw athua cih.
8 Aaron nynh tuh-e sanlou kha sabbath nin takyh kya Bawipaw malang khe zungzae hanlan byakinnaw lante, Israel ccungccaw hae nynh a rae hae paw lante tyty a nung cih.
9 Tuh-e sanlou hae tuh hmin thyaapaw kya a ae cih hae paw Aaron te a ciihan elang athua cih, pawccecize tuh-e sanlou tuh Bawipaw kalan maee te silawnawpaw hae kyaze minmin nynh a ccou hae paw athyaa huaccepaw nynh thua, tuh-e tuh zungzae tynpaw phungbya nynh thua.Ref 24.9: Mat 12.4; Mar 2.26; Luk 6.4
Pachia Sarya Byahonaw te Detahnaw
10 A paaw tuh Izip ccungccaw thua zah a nung tuh Israel ccungccaw a thuapaw pisepaw tuh Israel ccungccaw hae laku khe a cceihbua; tuh-e Israel nopinung a ccapaw te Israel ccungccapaw tuh ryahmin kyakhe a pekuh hae.
11 Israel nopinung a ccapaw nynh thya a lawnaw kyakhe Pachia Min kha the a thyasah. Te amaw kha Moses kalan a cciakhae hae, a nung min tuh Shelomith, Dan phin kya-e Dibri ccanung nynh thua.
12 Bawipaw kya-e byapaenaw kha minmin kalan thaesah athua makhia tuh tuh-e paw kha phang a khung hae.
13 Bawipaw nynh Moses kha hynhte a hopya:
14 Bawipaw Min sarya bya a hopaw kha ryahmin atolang poukhae; a bya a thae hae paw balyn nynh a lu vawlan khe mih kuih khang hae sah, te zapi balyn nynh amaw kha lung te deih hae sah.
15 Te Israel ccungccaw hae kha hynhte hopah hae: Pachia kha thya a lawpaw miakaw tuh a seinaw mee kha a ing cih.
16 Bawipaw min kha saryanaw bya a hopaw tuh chia athua cih; zapi balyn nynh tuh-e saryanaw bya a hopaw kha lung te a deih cih hae. Ramccungccaw thuasah, ramccang ccungccaw thuasah Bawipaw Min kha sarya bya a hopaw tuh chia athua cih.
17 Ccungccaw a theihpaw tuh chia athua cih.Ref 24.17: Exo 21.12
18 Sarangpaw a theihpaw nynh tuh-e a chiapaw hanlan, hiinnaw hanpaw hiinnaw kha a pyaru cih.
19 Lukhakheit nynh milaepaw a pyn kya-e hankhakheit kha a rosah ze, tuh-e thyhte a teing ru cih:
20 ru khyanaw hanlan ru khyanaw thuasah, mit hanpaw mit thuasah, haw hanpaw haw thuasah teing ru athua cih; ming hae kha vaemaw a muesah paw tuh amaw tungvaw mah vaemaw muesah ru athua cih.Ref 24.20: Exo 21.23-25; Deu 19.21; Mat 5.38
21 Sarangpaw a theihpaw nynh tuh-e a chiapaw hanlan a pyaru cih; thuasalama ccungccaw a theihpaw tuh chia athua cih.
22 Ramccang ccungccaw hanlan te ramccungccaw hanlan upadi ccangkheit kyalya na hoi cih oh; pawccecize kae tuh Bawipaw nae Pachia nynh ka thua.Ref 24.22: Nam 15.16
23 Moses nynh Israel ccungccaw hae kha tuhcite a hopya hae; te minmin nynh Pachia saryanaw bya a hopaw kha ryahmin atolang sue hae zah lung te phe chih lan a deih hae. Bawipaw nynh Moses kha kaw a pya thyhte Israel ccungccaw hae nynh a cyi hae.