23
Accyh Khyapaw Poi hae
Bawipaw nynh Moses kha hynhte a hopya: Israel ccungccaw hae kha hynhte hopah hae: E hae hynh athyaapaw pumkunaw lante na thaesah cih oh paw Bawipaw kya-e accyh khyapaw ka poi hae nynh thua hae.
Sabbath, Kawtaw Poi, Ransi Phing leipaw Sanlou Poi
Nin taruh lungkhu ryalaw law athua cih; thuasalama nin sarinaw nin tuh daebabi lan haeungpaw sabbath nin, athyaapaw pumkunaw nin athua cih; ryalaw na lah lan khyh oh; e nin tuh nae umnaw takyh kya Bawipaw hanlan sabbath nin nynh thua.Ref 23.3: Exo 20.8-10, 23.12, 31.15, 34.21, 35.2; Deu 5.12-14
E hae hynh khyapaw accyh kya minmin hanlan poi na tua lan oh paw Bawipaw hanlan ccyh khyapaw poi hae, athyaapaw pumkunaw nynh thua hae. Masaty sawpaw nin haw lae pali nin, zetepakaw ccyh tuh Bawipaw kya-e kawtaw poi athua cih,Ref 23.5: Exo 12.1-13; Deu 16.1-2 te tuh-e sawpaw nin haw lae pangaw nin tuh Bawipaw elang ransi phing leipaw sanlou poi athua cih; nin sari lungkhu ransi phing leipaw sanlou kha na ae cih oh.Ref 23.6-8: Exo 12.14-20, 23.15, 34.18; Deu 16.3-8 Masaty nin khe athyaapaw pumkunaw kha na rae cih oh; nae ryalaw kha na lah lan khyh oh. Nin sari lungkhu Bawipaw kalan maee te silawnaw kha na rae cih oh; nin sarinaw nin khe athyaapaw pumkunaw kha na rae cih oh; nae ryalaw kha na lah lan khyh oh.
Thaety Silawnaw
Bawipaw nynh Moses kha hynhte a hopya: 10 Israel ccungccaw hae kha hynhte hopah hae: Kae pya cih oh paw ram lungkhu lang na tee oh zah, looh he na rue oh te, na rue oh paw masaty ccavui kya-e ccathae kha ranpibawi kalan na cciakhae cih oh. 11 Tuh-e ccathae tuh ccoupya na thua nawlan oh, ranpibawi nynh Bawipaw malang hangthungte a hebia cih; sabbath nin koute awkhualan khe ranpibawi nynh khah-e kha hangthungte a hebia cih. 12 Ccathae kha hangthungte na hebia nin oh khe, douccahpaw tuutaw kum kheit acihpaw khate Bawipaw kalan maee-ute silawnaw kha na rae cih oh. 13 Te tuh-e silawnaw te asekuhpaw ccathae silawnaw tuh chitui te pykuhpaw ahoypaw vaekhui ephah ccangkheit kya-e pum haw pum ning athua cih zah tuh-e tuh Bawipaw elang amynthuapaw, maee te silawnaw nynh thua; tuh-e silawnawpaw ryte pydepaw niapaw silawnaw tuh misutui hin ccangkheit kya-e pum pali pum kheit athua cih. 14 Nae Pachia kalan silawnawpaw na cciakhae nin oh athua makhia tuh sanlou thuasah, thoupaw ccathae thuasah, hinlalyhpaw thingthae-eccang thuasah na ae lan khyh oh: e tuh nae umnaw balyn kyaze nae she takyh kya zungzae hanlan phungbya nynh thua.
Lonaw Poi
(Nam 28.26-31)
15 Te sabbath nin koute awkhualan, hangthung-hebiate silawnawpaw ccathae na cciakhae nin oh kyate lonaw naw sari phe ccing lan na ria cih oh.Ref 23.15-21: Exo 23.16, 34.22; Deu 16.9-12 16 Vaesarinaw sabbath nin koute awkhualan cia, nin sung pangaw kyacia na ria cih oh; oute athawpaw ccathae silawnaw kha Bawipaw kalan na pya cih oh. 17 Nae umnaw kyate ephah ccangkheit kya-e pum haw pum ning ccite, raepaw sanlou phe ning kha hangthung-hebiate silawnaw lante na cciakhae cih oh; tuh-e vaekhui te raepaw athua cih hae zah ransi te ruadepaw athua cih hae, Bawipaw elang thaety lante silawnawpaw athua cih. 18 Sanlou ryte douccahpaw tuutaw kum kheit acihpaw sa sari, anopaw tangnua sa kheit te tuutepaw sa ning kha na pya cih; tuh-e hae tuh minmin kya-e ccathae silawnaw, niapaw silawnaw ryte Bawipaw elang amynthuapaw, maee te silawnaw athua cih. 19 Seithyaanaw silawnaw hanlan miaatepaw sa kheit kha thuasah, ccawkunaw silawnaw hanlan kum kheit acihpaw tuutaw pise sa ning kha mah thuasah na pya cih oh. 20 Ranpibawi nynh thaety sanlou kha tuutaw sa ning rykhate Bawipaw malang hangthung-hebiate silawnaw lante a hebia cih; tuh-e hae tuh ranpibawi elang Bawipaw malang athyaapaw athua cih hae. 21 Tuh-e nin khe thaesahkunaw na rae cih oh; athyaapaw pumkunaw kha na rae cih oh; nae ryalaw kha na lah lan khyh oh. E hynh nae umnaw balyn kyakhe nae she takyh kya zungzae hanlan phungbya athua cih.
22 Nae laephi kya-e looh kha he na rue vae oh ze, nae loo akin-akae cia na rue lan khyh oh, looh na rue kou oh te, ccamua kha na suelua vae lan khyh oh; khah-e hae kha ryachi hae te ramccang hae elang na cciatawpah cih oh: kae tuh Bawipaw nae Pachia nynh ka thua.Ref 23.22: Lev 19.9-10; Deu 24.19-22
Mungkae Tu Poi
(Nam 29.1-6)
23 Bawipaw nynh Moses kha hynhte a hopya: 24 Israel ccungccaw hae kha hynhte hopah hae: Sawpaw sah sarinaw, masaty nin khe daebabi lan na haeung cih oh, ning lei nawlan mungkae tu te athyaapaw pumkunaw kha na rae cih oh, 25 Nae ryalaw kha na lah lan khyh oh; Bawipaw kalan maee te silawnaw kha na rae cih oh.
Seingaethya Nin
(Nam 29.7-11)
26 Bawipaw nynh Moses kha hynhte a hopya: 27 Hynh-e sawpaw sah sarinaw, nin haw nin hynh seingaethya nin nynh thua; e hynh nanning elang athyaapaw pumkunaw nynh thua: naemaw te naemaw na taekuh cih oh zah Bawipaw kalan maee te silawnaw kha na rae cih oh.Ref 23.26-32: Lev 16.29-34 28 tuh-e nin kya rya na lah lan khyh oh; pawccecize tuh-e nin tuh Bawipaw nae Pachia malang nae hanlan seingaethyanaw rae nin nynh thua. 29 Tuh-e nin kya amaw te amaw a taekuh leipaw miakaw tuh a ccungccaw hae kyate vua athua cih. 30 Te tuh-e nin kya ryalaw ccangkhakheit kha a lahpaw miakaw tuh a ccungccaw hae laku kyate ka roh cih. 31 Pawpaw ryalaw mah na lah lan khyh oh: e tuh nae umnaw takyh kyakhe nae she takyh kya zungzae hanlan phungbya nynh thua. 32 Tuh-e nin tuh daebabi lan haeung nin sabbath athua cih zah, naemaw te naemaw na taekuh cih oh; tuh-e sawpaw, nin takua nin, zetepakaw kyate awkhualan zetepakaw cia nae sabbath nin kha na naawsah cih oh.
Bu Poi
(Nam 29.12-40)
33 Bawipaw nynh Moses kha hynhte a hopya:Ref 23.33-36: Deu 16.13-15 34 Israel ccungccaw hae kha hynhte hopah hae: Hynh-e sawpaw sah sarinaw, nin haw lae pangaw nin kyate nin sari kyacia tuh Bawipaw hanlan bu poi athua cih. 35 Masaty nin tuh athyaapaw pumku nin nynh thua; nae ryalaw kha na lah lan khyh oh. 36 Nin sari lungkhu Bawipaw kalan maee te silawnaw kha na rae cih oh; nin taryanaw nin khe athyaapaw pumkunaw kha na rae cih oh zah, Bawipaw kalan maee te silawnaw kha na rae cih oh; e hynh aphutepaw pumkunaw nynh thua; nae ryalaw kha na lah lan khyh oh.
37-38 E poi hae tuh Bawipaw sabbath hae, na pyapaw lasung hae, Bawipaw kalan na pyapaw byakinnaw ahlu hae balyn te lungthote raepaw silawnaw hae, tuh-e hae balyn kha holeite, khyapaw accyh kyaze Bawipaw kalan maee te silawnaw ahlu haeā€”maee-ute silawnaw hae te ccathae silawnaw hae, silawnawpaw hae te niapaw silawnaw hae kha rae khylan athyaapaw pumkunaw rae lanpaw, accyh khyapaw Bawipaw poi hae nynh athua hae.
39 Ram lungkhu te apoupaw kha he na suelua kou oh te, sawpaw sah sarinaw, nin haw lae pangaw nin kyate Bawipaw poi kha nin sari lungkhu na tua cih oh; masaty nin khe daebabi lan na haeung cih oh zah, nin taryanaw nin mah daebabi lan na haeung cih oh. 40 Masaty nin khe apuithyapaw thingku athae hae te suinpaluin ku ange hae te anaw abungthyapaw thingku ange hae te vawkhu kin apopaw aku kya-e anaw kha na lah cih oh zah Bawipaw nae Pachia malang nin sari lungkhu lungpawnaw na rae cih oh. 41 E poi hynh Bawipaw elang poi lante kum kheit ze nin sari na naawsah cih oh; nae she takyh kya zungzae elang phungbya athua cih, e poi hynh sawpaw sah sarinaw khe na tua cih oh. 42 bu lungkhu nin sari na um cih oh; Israel ramccungccaw athuapaw balyn nynh bu lungkhu a um cih hae, 43 tuh-e tuh Izip ram kyate he ka poukhae hae tuh, Israel hae kha bu kya ka umsah hae cipaw kha nae ciihan hae nynh a ny nawlan hae nynh thua: kae tuh Bawipaw nae Pachia nynh ka thua.
44 Ou tuhte accyh khya athuapaw Bawipaw poi hae kong kha Moses nynh Israel ccungccaw hae kyakhe a thaesah hae.