20
Athyaapaw Einaw keiccu Detahnaw hae
1 Bawipaw nynh Moses kha hynhte a hopya:
2 Israel ccungccaw hae kha hynhte bua hopah hin hae: Israel ccungccaw thuasah, Israel hae kya a um buapaw ramccang ccungccaw thuasah a ccaaw kha Molek pachia kalan a pyapaw tuh chia athua cih; ram kya-e ccungccaw hae nynh amaw kha lung te phe chih lan a deih cih hae.
3 Kamaw ccaccei nynh minmin kha ka maeleihtawkuh cih hae zah mih ccungccaw hae kyate ka vua cih hae, pawccecize ka beikinnthyaa kha thusah hae zah athyaapaw ka min kha thethyasahte mih ccaaw hae kha Molek pachia kalan a pya vae hae.
4 Te ram kya-e ccungccaw hae nynh Molek kalan mih ccaaw a pyatupaw kha mih mit phe masi hae zah khah-e paw kha a chia khyh hae zetuh,
5 kamaw ccaccei nynh minmin te mih innbyn hae kha ka maeleihtawkuh cih hae zah Molek kalan ohhuakunaw kya amaw te amaw kya a zuikuh hae paw balyn kha mih ccungccaw hae kyate ka vua cih hae.
6 Lukhakheit nynh chihiinleihthyapaw apawepaw te mitleihthyapaw kalan cceih zah tuanaw a ngiaku hae zetuh, ka maeleihtawkuh cih zah a ccungccaw hae kyate ka vua cih.
7 Tukeiccu naemaw te naemaw kha thyaasakuh oh. Kae tuh Bawipaw nae Pachia ka thua keiccuze nanning tuh thyaa oh.
8 Ka phungbya hae kha tynsah oh lah zui oh; kae tuh Bawipaw nynh ka thua; nanning kha kae thyaasah oh.
9 A nung thuasah, a paaw thuasah thya a lawpaw balyn tuh chia athua cih hae; nung te paaw kha thya phe a law vae hae, mih chiise tuh mih tungvaw nynh a um.Ref 20.9: Exo 21.17; Mat 15.4; Mar 7.10
10 Pise lukhakheit nynh a innpaw zu te seinaw a rae hae ze, seinaw a rae hae paw parouh mawte chia athua cih hae.Ref 20.10: Exo 20.14; Lev 18.20; Deu 5.18
11 A paaw zu te a sei hae paw pise tuh a paaw kha maethya a lahpaw nynh thua; mih lu ning te chia athua cih hae; mih chiise tuh mih tungvaw nynh a um.Ref 20.11: Lev 18.8; Deu 22.30, 27.20
12 Pise lu kheit nynh a monung te a sei lan hae ze, mih lu ning te chia athua cih hae; minmin nynh aphung thua leite phe a sei vae hae, mih chiise tuh mih tungvaw nynh a um.Ref 20.12: Lev 18.15
13 Pise lu kheit nynh pise kha nopi hawkhate a seikhae lanze, mih lu ning te anungsikupaw kha phe a rae vae hae; minmin tuh chia athua cih hae; mih chiise tuh mih tungvaw nynh a um.Ref 20.13: Lev 18.22
14 Pise lu kheit nynh zu hoi zah a zu nung kha mah zu lang a umkhae lanze, tuh-e tuh hoyleinaw nynh thua. Nanning laku tuhcihawpaw hoyleinaw a um khyh nawlan, tuh-e lu thum hae kha phe chih lan maee te u athua cih hae.Ref 20.14: Lev 18.17; Deu 27.23
15 Pise lukhakheit nynh sarangpaw kha ikhae zah a seikhae zetuh, amaw kha chia athua cih; tuh-e sarangpaw kha mah na theih cih oh.Ref 20.15-16: Exo 22.19; Lev 18.23; Deu 27.21
16 Nopi lu kheit nynh sarangpaw sakhakheit kha naenuakuh zah ikhae zah a seikhae zetuh, tuh-e nopinung te sarangpaw kha na theih cih oh; minmin kha chia athua cih hae; mih chiise tuh mih tungvaw nynh a um.
17 Pise lu kheit nynh amaw a ccianung athuapaw, a paaw ccanung khyhze a nung ccanung kha zu lang umkhae zah a ikhae lanze, tuh-e tuh maethya lan umpaw thua zah, minmin kha mih ccungccaw hae muihnaw kyate vua athua cih hae; tuh-e paw nynh a ccianung kha phe a ikhae vae keiccuze detahnaw a mue cih.Ref 20.17: Lev 18.9; Deu 27.22
18 Pise lu kheit nynh nopiny a nyh cciamangpaw nopi te a ikheih hae ze, tuh-e paw nynh nopinung chii a luanaw kha langsah zah, nopinung nynh mah amaw a chii luanaw kha phe a langsah vae; mih lu ning te mih ccungccaw hae kyate vua athua cih hae.Ref 20.18: Lev 18.19
19 Na nung a neitawnung khyhze a unung kha thuasah, na paaw ccianung kha thuasah na ikhae lan khyh, pawccecize tuh-e tuh ahmaw te anaekuhpaw puizia kha ikhaepaw nynh thua; a ihkheih hae paw tuh detahnaw a mue cih hae.Ref 20.19-20: Lev 18.12-14
20 Pise lu kheit nynh a paaw a upaw zu khyhze a neitaw zu kha a ikhae zetuh, a paaw a uno kha the a thyasahtu nynh thua. Minmin tuh detahnaw a ing cih hae; ccaawsaah leite a chih cih hae.
21 Pise lukhakheit nynh a upaw zu khyhze a neitawpaw zu kha zu lang a umkhae lanze, tuh-e tuh athyaa leipaw nynh thua; a upaw zu khyhze a neitawpaw zu kha a seikhae vae keiccuze minmin tuh ccaawsaah lan khyh hae.Ref 20.21: Lev 18.16
22 Ka phungbya balyn te ka phungzae balyn kha na tynsah cih oh zah na zui cih oh, Tuhcite nynh nanning umnaw khylan kae cciakhaenaw oh, ram nynh nanning kha moh ae loh lan khyh oh.
23 Nae malang kyate ka dee cih hae paw minphuin hae mih phung kha na zui lan khyh oh. Minmin nynh khah-e phung hae balyn a zui keiccu hae ze, ka hua hae.
24 Mateitui te khoilutui a luanaw ram kha nae ram lang kae pya cih oh zah nanning nynh mih ram kha rho lang na ccou cih oh cite phe kae hopya vae oh. Kae tuh Bawipaw nae Pachia nynh ka thua; tuh-e ccungccaw hae kyate nanning kha phe kae phia vae oh.
25 Tukeiccu nanning nynh sarangpaw athyaapaw te athyaa leipaw thuasah, pavaw athyaapaw te athyaa leipaw thuasah laesahnaw na rae cih oh; nae hanlan thyaa khyh cite laesahnaw ka rae vae paw sarangpaw, pavaw te laephi vawlan avawpaw ccangkhakheit khate naemaw te naemaw kha na nungsisakuh lan khyh oh.
26 Nanning tuh kamaw elang na thyaa cih oh; pawccecize kamaw, Bawipaw tuh ka thyaa zah, nanning kha kamaw elang mingccang hae kyate phe kae phia vae oh.
27 Pise thuasah, nopi thuasah chihiinleihthyapaw apawepaw te mitleihthyapaw tuh chia athua cih; minmin kha lung te phe chih lan deih athua cih hae, mih chiise tuh mih tungvaw nynh a um.