19
Phungzae, Ozia te Asekuhpaw Thyaanaw hae
1 Bawipaw nynh Moses kha hynhte a hopya:
2 Israel ccungccaw zapi balyn kyakhe hynhte hopah hae: Nanning tuh na thyaa cih oh, pawccecize Bawipaw nae Pachia kae tuh ka thyaa.Ref 19.2: Lev 11.44-45; 1Pe 1.16
3 Nanning balyn nynh nae nung te nae paaw kha saw na tua cih oh, ka sabbath hae kha na naawsah cih oh: kae tuh Bawipaw nae Pachia nynh ka thua.Ref 19.3: Exo 20.8, 12; Deu 5.12, 16
4 Zohtuh hae kalan maeleihkuh nan oh, laeekupaw pachia hae kha naemaw elang raekuh nan oh: kae tuh Bawipaw nae Pachia nynh ka thua.Ref 19.4: Lev 26.1; Exo 20.23, 34.17; Deu 27.15
5 Ccawkunaw silawnaw kha Bawipaw kalan he na rae oh ze, naemaw ccelang ccoupya athua lante pya oh.
6 Na pya nin oh khyhze awkhualan khe tuh-e tuh ae athua cih; nin thumnaw nin cia alaepaw miakaw kha maee te u athua cih.
7 Tuh-e tuh nin thumnaw nin khe ae athua lanze, tuh-e tuh anungsikuhpaw thua zah ccoupya thua lan khyh.
8 Tuh-e a aepaw balyn tuh Bawipaw kya-e athyaapaw kha phe a thusah vae keiccuze detahnaw a ing cih, tuhcihawpaw ccungccaw miakaw kha a ccungccaw hae kyate vua athua cih.
9 Nae loo kya-e looh kha he na rue vae oh ze, nae loo akin-akae lang cia na rue lan khyh oh, looh na rue kou oh te, ccamua kha na suelua vae lan khyh oh.Ref 19.9-10: Lev 23.22; Deu 24.19-22
10 Nae misu khokhu kya-e kha pong thang lan na lo lan khyh oh, nae misu khokhu e misu thae akhuakuhpaw kha pong na khuin lan khyh oh; khah-e hae kha ryachi hae te ramccang hae elang na cciatawpah cih oh: kae tuh Bawipaw nae Pachia nynh ka thua.
11 Na ruh lan khyh, ccungccaw na ling lan khyh; lu kheit te lu kheit na hynpakuh lan khyh oh.Ref 19.11: Exo 20.15, 16; Deu 5.19, 20
12 Ka min phyate ahme lei lante thya na lawkuh lan khyh, na Pachia min kha na thusah lan khyh: Kae tuh Bawipaw nynh ka thua.Ref 19.12: Exo 20.7; Deu 5.11; Mat 5.33
13 Na innpaw uccaw kha lingte na lawkuh lan khyh, na ruh lan khyh; ryalahtu kya-e a ryalaw mee kha awkhua cia na nungkuh lan khyh.Ref 19.13: Deu 24.14-15
14 A nawpanpaw kha na ruin na sang lan khyh, a mitmohpaw malang khe thykupawku lanpaw kha na nungkhaw lan khyh; na Pachia kha na rih cih: Kae tuh Bawipaw nynh ka thua.Ref 19.14: Deu 27.18
15 Ahme leipaw byapianaw kha na rae lan khyh; a ryachipaw kha na pankhae lan khyh zah alesaepaw kha mah a mae na do lan khyh: na innpaw kha dingnaw te bya na pia cih.Ref 19.15: Exo 23.6-8; Deu 16.19
16 Milae thethya a hotu lante na ccungccaw hae laku na khiavuikuh lan khyh, na innpaw a hiinnaw kha rawsete thadyn nan.
17 Na uno lukhakheit kha na thinlung kya na hua lan khyh; na innpaw nynh a cyiseinaw kha ahme thathyhte na hopah cih, tuhkhyhze tuh namaw te namaw kha seinaw na hoisaku cih.Ref 19.17: Mat 18.15
18 Na ccungccaw lukhakheit kha na liaru lan khyh zah lung-ung na tungpah lan khyh, thuasalama na innpaw kha namaw hawkhate na sungsah cih: Kae tuh Bawipaw nynh ka thua.Ref 19.18: Mat 5.43, 19.19, 22.39; Mar 12.31; Luk 10.27; Rom 13.9; Gal 5.14; Jam 2.8
19 Ka phungbya hae kha na zui cih. Na sarangpaw hae kha aphuin lokuh leipaw te sahpawdesahkute ataw na thansah lan khyh hae; na loo kya ccacii phuin ning kha na ccoude lan khyh; aphuin lokuh leipaw uccaw phuin ning te raedepaw boeining kha na lawkuh lan khyh.Ref 19.19: Deu 22.9-11
20 Ccangpaw pise hanlan haaw thua vae salamah luenaw pya athua loh leipaw te shawkhaw athua loh leipaw seenung lu kheit tuh pise lu kheit te nopi pise seinaw a rae hae ze, minmin tuh detahnaw a ing cih hae. Seenung tuh a lue loh leipaw athua keiccuze minmin tuh chia thua lan khyh hae;
21 thuasalama pisepaw nynh amaw elang tuutepaw sa kheit kha cyiseinaw silawnaw lante tungkunaw bu thuakaw kyakhe Bawipaw kalan a ccyng cih.
22 Te tuh-e pisepaw a seinaw hanlan ranpibawi nynh cyiseinaw silawnawpaw tuutepaw khate Bawipaw malang khe seingaethyanaw kha a raepah cih; te tuh-e pisepaw a seinaw kha ngaethya athua cih.
23 Nanning nynh ram lungkhu lang na tee oh zah thingku aphuinphuin kha looh lang he na ling oh te, mih thingthae kha kheepaw thingthae lante na ria cih oh; tuh-e thingthae tuh nae hanlan kum thum lungkhu khee athua cih zah na ae lan khyh oh.
24 Kum palinaw kum khe mih thingthae balyn tuh athyaa cih zah Bawipaw thehoysahnawpaw ahlu athua cih.
25 Thuasalama kum pangawnaw kum khe mih thingthae tuh nanning elang houh alung lante a thae nawlan, mih thingthae kha na ae cih oh: Kae tuh Bawipaw nae Pachia nynh ka thua.
26 Pawpaw saw mah achii ryte na ae lan khyh oh. Kuihdokupaw beidin te naawthyanaw kha na mang lan khyh oh.Ref 19.26: Gen 9.4; Lev 7.26-27, 17.10-14; Deu 12.16, 23, 15.23, 18.10
27 Nae nakalia e nae sang kha na ngokuh lan khyh oh, nae khawming adung kha mah na ngokuh lan khyh oh.Ref 19.27-28: Lev 2.5; Deu 14.1
28 Achihpaw keiccuze na ngesaw kha na awkuh lan khyh, nae pyn kya apyaa na pyaakuh lan khyh: Kae tuh Bawipaw nynh ka thua.
29 Ram tuh a ohhuakuhpaw lang a tang khyh nawlan te ozia hoyleinaw te phe abia khyh nawlan, na ccanung kha ohhuanung lang tangsahte pawlangria leite um nan.Ref 19.29: Deu 23.17
30 Ka sabbath hae kha na sung cih zah ka beikinnthyaa kha saw na tua cih: Kae tuh Bawipaw nynh ka thua.Ref 19.30: Lev 26.2
31 Chihiinleihthya hae paw, apawe hae paw te mitleihthya hae paw kha doliakuh nan oh; minmin keiccuze na nungsiku khyh nawlan oh, minmin kha ccung nan oh: Kae tuh Bawipaw nae Pachia nynh ka thua.Ref 19.31: Deu 18.11; 1Sa 28.3; 2Si 23.4; Isa 8.19
32 Ataw vae paw malang khe na thadyn cih zah a kum tangpaw kha saw na tua cih; na Pachia kha na rih cih: Kae tuh Bawipaw nynh ka thua.
33 Nae ram kya ramccang ccungccaw nynh a umbua ze, tuh-e ccungccaw kha na theihrya lan khyh oh.Ref 19.33-34: Exo 22.21; Deu 24.17-18, 27.19
34 Nae kya a um buapaw ramccang ccungccaw tuh nanning laku e ramccungccaw hawte athua cih; khah-e ramccang ccungccaw kha namaw toulou hawte na sungsah cih, pawccecize nanning tuh Izip ram kya ramccang hae nynh na thua oh: Kae tuh Bawipaw nae Pachia nynh ka thua.
35 Asaepaw, aripaw te alung-azyapaw tounaw kya na hyn lan khyh.Ref 19.35-36: Deu 25.13-16; Ptb 20.10; Eze 45.10
36 Ahmepaw khinlung, ahmepaw zawccu, ahmepaw ephah, ahmepaw hinnote19.36 hin: paling ling haw lae ning loukaw. kha na mang cih oh: Kae tuh Izip ram kyate ae poukhae oh paw Bawipaw nae Pachia nynh ka thua.
37 Ka phungbya balyn te ka phungzae balyn kha na zui cih oh zah na cyih cih oh: Kae tuh Bawipaw nynh ka thua.