17
Sarangpaw hae Chianaw
1 Bawipaw nynh Moses kha hynhte a hopya:
2 Aaron te a ccapaw hae te Israel ccungccaw balyn kha hynhte hopah hae: E hynh Bawipaw kya-e kawpyapaw nynh thua.
3 Israel ccungccaw lukhakheit nynh tangnuapaw thuasah, tuutaw thuasah, miaa thuasah ryahmin kya khyhze ryahmin atolang khe theih zah,
4 Bawipaw beikbu malang khe Bawipaw kalan tuh-e tuh ahlu lang pya khylan tungkunaw bu thuakaw kalan a thuakhae khyh lanze, tuh-e paw tuh chii luanaw hanlan seinaw a hoitu cite tua athua cih; aning nynh chii a luasah vae keiccuze a minphuin kyate vua athua cih.
5 E hynh Israel ccungccaw hae nynh ramkaw kyakhe mih pyapaw hae kha tungkunaw bu thuakaw kya umpaw ranpibawi kalan, Bawipaw kalan thuakhae hae zah, ccawkunaw silawnaw lante Bawipaw kalan a pya ccaw hae cipaw nynh thua.
6 Ranpibawi nynh tuh-e chii khate tungkunaw bu thuakaw kya umpaw Bawipaw kya-e silawhang kha a hei cih, te atho kha Bawipaw hanlan amynthuapaw lante maee te a u cih,
7 Tuhcite minmin nynh mimaw te mimaw a la ohhuakunaw hae miaa-khozi hae kalan khe si a lawnaw hae paw kha pya vae lan khyh hae. E hynh minmin mih she takyh kya zungzae hanlan phungbya athua cih.
8 Te minmin kha hynhte hopah hin hae: Israel ccungccaw lukhakheit nynh thuasah, minmin laku umpaw ramccang ccungccaw lukhakheit nynh thuasah maee-ute silawnaw khyhze silawnaw kha rae zah,
9 Bawipaw kalan silaw khylan tungkunaw bu thuakaw kalan a thuakhae leipaw tuh a minphuin kyate vua athua cih.
Kheepaw Chii Aenaw
10 Israel ccungccaw lukhakheit nynh thuasah, minmin laku umpaw ramccang ccungccaw lukhakheit nynh thuasah pawpaw chii zemah a ae lanze, chii a aetupaw kyate ka maeleihtawkuh cih zah tuh-e ccungccaw kha a minphuin kyate ka vua cih.Ref 17.10: Gen 9.4; Lev 7.26-27, 19.26; Deu 12.16, 23, 15.23
11 Pawccecize pynsaw hiinnaw tuh chii kya nynh a um; te nae hiinnaw hanlan silawhang vawlan khe seingaethyanaw rae nawlan chii kha kae pya vae oh; pawccecize chii tuh hiinnaw hanlan seingaethyanaw a raepaw chii nynh thua.Ref 17.11: Heb 9.22
12 Tukeiccu Israel ccungccaw hae kalan ka hopya hae paw tuh: Nanning laku e humhung mah chii kha na ae lan khyh oh, nanning laku umpaw ramccang ccungccaw nynh mah chii kha ae lan khyh.
13 Te Israel ccungccaw lukhakheit nynh thuasah, nanning laku umpaw ramccang ccungccaw lukhakheit nynh thuasah sawde zah ae lanpaw sarangpaw khyhze pavaw kha a kaw zetuh a chii kha a lae cih zah laephi te a theithin cih.
14 Pawccecize ahysuepaw miakaw hanlan a chii tuh a hiinnaw nynh thua; tukeiccu Israel ccungccaw hae kha hynhcite phe ka hopya vae hae: ahysuepaw pawpaw chii zemah na ae lan khyh oh, pawccecize ahysuepaw miakaw hiinnaw tuh a chii nynh thua; chii a aepaw humhung zemah vua athua cih.
15 Amaw chi lan a chihpaw saw kha thuasah, sarepaw nynh a teipaw saw kha thuasah, a aepaw ccungccaw balyn, ramccungccaw hae thuasah, ramccang ccungccaw hae thuasah, mih boeining kha a sukuh cih hae zah tui te a singkuh cih hae, zete cia thyaa lan khyh hae, tukoute a thyaa cih hae.
16 Thuasalama mih boeining kha sukuh khyh hae zah mih pyn kha mah a singku khyh hae zetuh mih cyiseinaw mee kha mimaw nynh a phu cih hae.