13
Vaethya Ccinaw Aphuinphuin
1 Bawipaw nynh Moses te Aaron kha,
2 Lukhakheit nynh a pyn kya-e a ving kya phinnaw thuasah, phawnaw thuasah, ccapoh rawnaw thuasah ccangkhakheit hoi zah vaethyanote13.2 ving ccinaw aphuinphuin athua kho ccinaw lang he a tang te, ranpibawi Aaron kalan khyhze ranpibawi athuapaw a ccapaw hae lukhakheit kalan cciakhae athua cih.
3 Ranpibawi nynh a pyn kya-e ccinaw kha a dopah cih, tuh-e ccinaw kya umpaw a ming tuh arawpaw lang tang zah a ccinaw tuh a pyn kya-e a ving laeze akhu huapaw alo lanze, tuh-e tuh vaethya ccinaw nynh thua; ranpibawi nynh a do koute aning tuh athyaa leipaw nynh thua cite a ho cih.
4 Thuasalama a pyn kya-e ccapoh arawpaw tuh raw zah a ving laeze khuhua khyh zah a ving kya umpaw a ming tuh araw khyh lanze, ranpibawi nynh ccinaw hoipaw kha nin sari lungkhu phang a khung cih.
5 Ranpibawi nynh nin sarinaw nin khe a do cih, te ccinaw tuh amaw maminte um zah a ving kya a pazaeku khyh lanze, ranpibawi nynh nin sari bua a khung ung cih.
6 Ranpibawi nynh nin sarinaw nin khe bua a do cih, te ccinaw tuh danhua zah a ving kya a pazaeku khyh lanze, ranpibawi nynh aning tuh athyaa cite a ho cih; tuh-e tuh aphaw huatawpaw nynh thua; te a boeining kha a sukuh cih zah a thyaa cih.
7 Thuasalama a thyaanaw hanlan ranpibawi kalan a dosaku koute aphawpaw tuh a ving kya a pazaeku lanze, ranpibawi kalan bua a dosakuh cih.
8 Ranpibawi nynh a do cih zah aphawpaw tuh a ving kya a pazaeku lanze, ranpibawi nynh aning tuh thyaa khyh cite a ho cih; tuh-e tuh vaethya ccinaw nynh thua.
9 Lukhakheit tuh vaethya ccinaw a kae lanze, ranpibawi kalan thuakhae athua cih.
10 Ranpibawi nynh a do cih, te a ving kya umpaw arawpaw ming lang a tang vae paw arawpaw tuh um zah a phinnaw kya-e ngesaw tuh acia lanze,
11 tuh-e tuh a pyn kya umpaw vaethya arynpaw nynh thua. Ranpibawi nynh aning tuh thyaa khyh cite a ho cih zah phang khung lan khyh, pawccecize aning tuh a thyaa leipaw nynh thua.
12 Thuasalama ccinaw tuh a ving kya langkuh zah ranpibawi nynh phe a muih kho lan ciate a lu kyate a ccu kyacia ccinaw a hoitupaw a pyn balyn kya phe alekuh vae lanze,
13 ranpibawi nynh a do cih zah ccinaw nynh a pyn balyn kya pong alekuh vae zetuh, ranpibawi nynh aning tuh ccinaw kyate athyaa cite a ho cih; a pyn balyn phe araw vae keiccuze aning tuh athyaa.
14 Thuasalama a tungvaw kya aciapaw ngesaw a langku zetuh aning tuh thyaa khyh;
15 ranpibawi nynh aciapaw ngesaw kha a do cih zah aning tuh thyaa khyh cite a ho cih. Aciapaw ngesaw tuh thyaa khyh, pawccecize tuh-e tuh vaethya ccinaw nynh thua.
16 Thuasalama aciapaw ngesaw tuh arawpaw lang bua a tang zetuh ranpibawi kalan a cceih cih;
17 ranpibawi nynh a do cih zah tuh-e ccinaw tuh arawpaw lang a tang vae ze, ranpibawi nynh ccinaw hoitupaw kha athyaa cite a ho cih. Aning tuh athyaa.
18 Lukhakheit a pyn kyakhe balyh um zah phe ahoy koute,
19 tuh-e balyh a umnaw kyakhe arawpaw aphinpaw thuasah, se zah arawpaw lante ccapoh rawpaw thuasah, he a langku ze, tuh-e tuh ranpibawi kalan a dosakuh cih.
20 Ranpibawi nynh he a do te, tuh-e tuh a ving laeze khuhua zah, a ming tuh arawpaw lang a tang vae ze, ranpibawi nynh aning tuh thyaa khyh cite a ho cih, hynh-e tuh balyh kyate a poupaw vaethya ccinaw nynh thua.
21 Thuasalama ranpibawi nynh do zah avawlan umpaw a ming tuh raw leite a ving laeze khuhua khyh zah a danthung lanze, ranpibawi nynh nin sari lungkhu phang a khung cih.
22 Tuh-e tuh a ving kya a pazaeku lanze, ranpibawi nynh aning tuh thyaa khyh cite a ho cih; tuh-e tuh ccinaw nynh thua.
23 Thuasalama ccapoh rawpaw tuh san kheit kya kyalya um zah a pazaeku khyh lanze, tuh-e tuh balyh adaelaepaw nynh thua; ranpibawi nynh aning tuh a thyaa cite a ho cih.
24 Tuhkhyhze, a ving kha maee nynh u zah, tuh-e maee-unaw kya-e aciapaw ngesaw tuh ccapoh rawpaw lang tang zah sedaduh lante araw ze thuasah, phe araw ze thuasah
25 ranpibawi nynh tuh-e tuh a do cih. Ccapoh rawpaw kya umpaw a ming tuh raw zah a ving laeze akhu huapaw lante a langku lanze, tuh-e tuh vaethya ccinaw thua zah maee a unaw kya a langkuhpaw nynh thua, ranpibawi nynh aning tuh thyaa khyh cite a ho cih. E tuh vaethya ccinaw nynh thua.
26 Thuasalama ranpibawi nynh do zah ccapoh rawpaw kya-e aming tuh raw zah a ving laeze khuhua leite azyabung lanze, ranpibawi nynh amaw kha nin sari lungkhu phang a khung cih.
27 Ranpibawi nynh nin sarinaw nin kya a do cih; a ving kya a pazaeku lanze, ranpibawi nynh aning tuh thyaa khyh cite a ho cih. E tuh vaethya ccinaw nynh thua.
28 Thuasalama ccapoh rawpaw tuh san kheit kya um zah a ving kya pazaeku leite azyabung lanze, tuh-e tuh maee-unaw kyate aphinpaw thua zah ranpibawi nynh aning tuh athyaa cite a ho cih; pawccecize tuh-e tuh maee-unaw adaelaepaw nynh thua.
29 Pise khyhze nopi lukhakheit tuh a lu vawlan khyhze a khawming kya ccinaw a hoi lanze,
30 ranpibawi nynh ccinaw kha a do cih. Tuh-e tuh a ving laeze akhuhua lante langkuh zah, tuin kya umpaw a ming tuh pahsadya lante amepaw zong lang a tang ze, ranpibawi nynh aning tuh thyaa khyh cite a ho cih; tuh-e tuh a lu khyhze a khawming kya-e athahpaw vaethya ccinaw nynh thua.
31 Ranpibawi nynh laethah ccinaw kha do zah a ving laeze akhuhua lante langku leite tuin kya amanpaw ming a um khyh lanze, ranpibawi nynh laethah ccinaw a hoitupaw kha nin sari lungkhu phang a khung cih.
32 Nin sarinaw nin khe ranpibawi nynh laethah kha a do cih; laethah tuh pazaekuh khyh zah tuin kya ming amepaw um leite, laethah tuh a ving laeze akhuhua lante a langku khyh lanze,
33 aning nynh a ming kha a ngokuh cih, thuasalama laethah a umnaw e a ming kha tuh ngo lan khyh. Ranpibawi nynh laethah a kaepaw ccungccaw kha nin sari lungkhu phang a khung cih.
34 Nin sarinaw nin khe ranpibawi nynh laethah kha a do cih; laethah tuh a ving kya pazaekuh khyh zah a ving laeze akhuhua lante alangku khyh lanze, ranpibawi nynh aning tuh athyaa cite a ho cih. A boeining kha a sukuh cih zah a thyaa cih.
35 Thuasalama aning tuh athyaa cite ho athua koute laethah tuh a ving kya a pazaeku lanze,
36 ranpibawi nynh amaw kha a do cih. Laethah tuh a ving kya phe a pazaeku vae ze, ranpibawi nynh ming amepaw kha ccung ho vae khyh; aning tuh thyaa khyh.
37 Thuasalama laethah tuh a mit kya pazaekuh lae khyh zah ming amanpaw tuh tuin kya asae vae ze, laethah tuh hoy vae zah, aning tuh athyaa vae; te ranpibawi nynh aning tuh athyaa vae cite a ho cih.
38 Pise khyhze nopi lukhakheit tuh a pyn kya ccapoh rawpaw, arawpaw a um lanze,
39 ranpibawi nynh a do cih zah a pyn kya-e ccapoh rawpaw tuh raw phaphuhpaw athua lanze, tuh-e tuh a ving kyate alangkuhpaw nia nynh thua; aning tuh athyaa.
40 Lukhakheit tuh a lu kya-e a sang akuing lanze, aning tuh a lu anae, thuasalama aning tuh athyaa.
41 Aning tuh a terui te a nakalia kya-e a sang akuing lanze, a terui-o salamah a thyaa.
42 Thuasalama a lu anaenaw kya khyhze a te-onaw kyakhe asepaw te arawpaw ccinaw ccapoh rawpaw kha a um lanze, tuh-e tuh a lunaenaw kya khyhze a terui-onaw kyakhate apoupaw vaethya ccinaw nynh thua.
43 Ranpibawi nynh amaw kha a do cih; a lunaenaw kya khyhze a terui-onaw kyakhe aphinpaw ccinaw tuh asepaw lante raw zah a pyn kya vaethya ccinaw a poupaw alo lanze,
44 aning tuh vaethya ccinaw a hoipaw thua zah thyaa khyh. Ranpibawi nynh aning tuh thyaa khyh cite a ho cih; a lu vawlan ccinaw a um.
45 Vaethya ccinaw a hoipaw tuh aseiikuhpaw boeining kha a lawkuh cih zah a sang tuh phuasalae lante a nung cih; te palung lang mung kha phang a huhkuh cih zah, “Thyaa khyh, thyaa khyh,” cite a sia cih.
46 Aning tuh ccinaw a hoi lungkhu balyn athyaa leipaw athua cih; aning tuh thyaa khyh. Ryahmin atolang khe a makhaete a um cih.
47 Boeining te sekuh zah: vaethya ccinaw tuh boeining kya, saming boei kya thuasah, law te kuakuhpaw boeining kya thuasah,
48 akuakuhpaw kya thuasah, tuuming te kuakuhpaw kya thuasah, tuuming kya thuasah, saphua kya thuasah, saphua te raepaw ccangkhakheit kya thuasah he a langkuh tuh,
49 akuakuhpaw khyhze law kya thuasah, saphua kya thuasah, saphua te raepaw ccangkhakheit kya thuasah, ccinaw nynh boeining kyakhe ahinpaw khyhze asepaw lante a langkuh lanze, tuh-e tuh vaethya ccinaw thua zah ranpibawi kalan dosah athua cih.
50 Ranpibawi nynh ccinaw kha a do cih zah ccinaw a umpaw boeining kha nin sari lungkhu phang a khung cih.
51 Nin sarinaw nin khe ccinaw kha a do cih. Ccinaw tuh boeining kya thuasah, akuakuhpaw kya thuasah, tuuming law kya thuasah, saphua kya thuasah, saphua kya mangpaw pawpaw kya zemah thuasah, pong a pazaeku vae zetuh, tuh-e tuh apazaekuh thyapaw vaethya ccinaw nynh thua, tuh-e tuh thyaa khyh.
52 Ranpibawi nynh boeining ccinaw akaekuhpaw akuakuhpaw khyhze tuuming law kha thuasah, tuuming boei khyhze law te kuakuhpaw boeining kha thuasah, saphua kya-e ccangkhakheit kha thuasah maee te a u cih, pawccecize tuh-e tuh apazaekuh thyapaw vaethya ccinaw nynh thua; tuh-e tuh maee kya u athua cih.
53 Ranpibawi nynh do zah ccinaw tuh boeining kya, akuakuhpaw khyhze tuuming law kya thuasah, saphua kya-e ccangkhakheit kya thuasah, a pazaeku khyh lanze,
54 ranpibawi nynh ccinaw alangkuhpaw uccaw kha su lan kaw a pya cih hae, te ranpibawi nynh tuh-e uccaw tuh nin sari lungkhu bua a khung ung cih.
55 Ccinaw akaekuhpaw uccaw kha a suh kou hae te, ranpibawi nynh ccinaw kha a do cih. Ccinaw tuh a pazaeku khyh zemah ccinaw kaekuhpaw ccapoh rawpaw tuh azong a paleihku khyh zetuh ccinaw a pazaeku khyh zemah, tuh-e tuh thyaa khyh; tuh-e tuh maee kya na u cih, ccinaw akaekuhpaw ccapoh rawpaw tuh alungkhu kya thuasah, atolang kya thuasah, teitei a um zemah maee kya na u cih.
56 Ranpibawi nynh do zah tuh-e boeining tuh su koute ccinaw tuh a danthung zetuh, aning nynh boeining kya-e ccapoh rawpaw kya thuasah, akuakuhpaw kya thuasah, tuuming law kya thuasah, saphua kya thuasah abekuhpaw ccinaw kha thoh a seibia cih.
57 Tuh-e tuh boeining kya thuasah, akuakuhpaw khyhze tuuming law kya thuasah, saphua ccangkhakheit kya thuasah bua alangku lanze, tuh-e tuh apazaekuhpaw nynh thua; ccinaw alangkunaw kha maee te na u cih.
58 Thuasalama he na suh koute boeining, akuakuhpaw khyhze tuuming law, saphua ccangkhakheit kyate ccinaw kha a langku vae khyh zetuh, vaeningnaw bua na suh cih zah, tuh-e tuh athyaa vae cih.
59 E tuh tuuming te khyhze law te kuakuhpaw boeining kya thuasah, akuakuhpaw khyhze tuuming law kya thuasah, saphua te raepaw boeining kya thuasah a umpaw vaethya ccinaw tuh athyaa, thyaa khyh cipaw byapaenaw lanpaw phungzae nynh thua.