12
Ccaaw Pui koute Nopi hae Thyaasahnaw
Bawipaw nynh Moses kha, Israel ccungccaw hae kyakhe hynhte hopah hae:
Nopinung nynh ccaawpoi zah ccapaw a saah lanze, nin sari lungkhu athyaa leipaw athua cih; nopiny a ny ccyh lya hawte athyaa leipaw athua cih. Nin taryanaw nin khe ccapaw a vingdung kha aw athua cih.Ref 12.3: Gen 17.12; Luk 2.21 Tuh-e nopinung chii athyaanaw ccyh tuh sung thum nin thum athua cih; athyaanaw nin accing mawlaezung athyaapaw ccangkhakheit kha ty lan khyh, beikinnthyaa lungkhu lang mah cceih lan khyh. Tuh-e nopinung nynh ccanung kha a saah lanze, nopiny a ny lya hawte lonaw naw ning lungkhu athyaa leipaw athua cih; tuh-e nopinung chii athyaanaw ccyh tuh sung taruh nin taruh athua cih.
Ccapaw hanlan thuasah, ccanung hanlan thuasah, tuh-e nopinung a thyaanaw nin he accing te, maee-ute silawnaw hanlan kum kheit acihpaw tuutaw sa kheit kha thuasah, seithyaanaw silawnaw hanlan valaele sa kheit khyhze vahu anopaw sa kheit kha thuasah tungkunaw bu thuakaw kya ranpibawi kalan a thuakhae cih. Ranpibawi nynh tuh-e tuh Bawipaw malang a pya cih zah nopinung ccelang seingaethyanaw a raepah cih; oute a chii luanaw kyate a thyaa cih. E hynh ccapaw thuasah, ccanung thuasah ccaaw a saahpaw nopi hanlan upadi athua cih. Nopinung nynh tuu sa kheit kha a taening khyh ze, vahu anopaw sa ning khyhze valaele sa ning kha, maee-ute silawnaw lang sa kheit, seithyaanaw silawnaw lang sa kheit a ccyng cih; te ranpibawi nynh nopinung ccelang seingaethyanaw a raepah cih zah, tuh-e nung tuh a thyaa cih, a cipya.Ref 12.8: Luk 2.24