11
Athyaapaw te Athyaa leipaw Looh
(Deu 14.3-21)
1 Bawipaw nynh Moses te Aaron kha,
2 Israel ccungccaw hae kyakhe hynhte hopah oh:
Laephi vawlan e sarangpaw balyn lakuze na ae lan oh paw ahysuepaw hae tuh hynh-e hae nynh thua hae.
3 Accumakeih aphiakuhpaw te looh akhaethuipaw sarangpaw kha na ae cih oh.
4 Thuasalama looh akhaethuipaw accumakeih aphiakuhpaw lakuze akawlan e hae hynh na ae lan khyh oh: kalauh tuh looh akhaethui zemah accumakeih aphiakuh leipaw athua keiccuze nanning elang athyaa leipaw nynh thua.
5 Sangepavo tuh looh akhaethui zemah accumakeih phiakuh khyh zah nanning elang thyaa khyh.
6 Saveih tuh looh akhaethui zemah accumakeih phiakuh khyh zah nae hanlan thyaa khyh.
7 Voh tuh accumakeih aphiaku zemah looh khaethui khyh zah nae hanlan thyaa khyh.
8 E hae saw kha na ae lan khyh oh zah achihpaw kha mah na ty lan khyh oh; nae hanlan athyaa leipaw nynh thua hae.
9 Tui kya umpaw hynh-e hae hynh na ae cih oh. Rili kya te vawkhu kya um zah asake te akaleih umpaw tui lungkhu e pawpaw balyn kha na ae cih oh.
10 Thuasalama rili kya te vawkhu kya um zah asake te akaleih um leipaw miakaw, tui lungkhu e tui azeihthyapaw ahysuepaw hae te tui lungkhu e ahiinpaw ahysuepaw hae tuh nae hanlan anungsikuhpaw thua hae zah,
11 tuh-e hae tuh nae hanlan anungsikuhpaw athua cih hae. Tuh-e hae saw kha na ae lan khyh oh zah achihpaw mih pyn kha mah anungsikuhpaw lante na tua cih oh.
12 Asake te akaleih um leipaw tui lungkhu e pawpaw balyn tuh nae hanlan anungsikuhpaw nynh thua.
13 Pavaw hae lakuze hynh-e hae hynh nae hanlan anungsikuhpaw cite na tua cih oh. Na ae lei lan oh paw anungsikuhpaw pavaw hae tuh: mosipi, lantaw, ngasathypaw pavaw,
14 mocco, mosikalia phin miakaw,
15 va-aw phin miakaw,
16 kalauh pavaw, basakah, rili-pavaw, mosi phin miakaw,
17 nawnia adihpaw, tui-pavaw, nawniapi,
18 tui-aw, pelikan-pavaw, lantaw,
19 kaepaw-pavaw, heron pavaw phuin miakaw, michi-awlukhungpaw te balaw nynh thua.
20 Sake hoi zah accu ccu pali te avawpaw sarangpaw hae tuh nae hanlan anungsikuhpaw nynh thua.
21 Thuasalama sake hoi zah ccu pali te avawpaw sarangpaw hae lakuze laephi vawlan thohku nawpaw accu lae asaepaw ccu a hoipaw sarangpaw hae kha tuh na ae cih oh.
22 Tuh-e hae kyaze: tungkhipaw phin, lungnaw phin te pynthu phin kha na ae kho oh.
23 Thuasalama accu ccu pali te avawpaw ccangpaw sake hoipaw balyn kha tuh nae hanlan anungsikuh.
Athyaa leipaw Sarangpaw hae
24 Hynh-e sarangpaw hae liate athyaa leipaw lang na tang cih oh; hynh-e hae kya-e achihpaw kha a typaw humhung zemah zete cia athyaa leipaw athua cih,
25 te hynh-e hae kya-e achihpaw apyn kya-e hankhakheit kha a lahpaw humhung zemah a uccaw kha a sukuh cih zah zete cia athyaa leipaw athua cih.
26 Accumakeih aphiakuh leipaw, looh akhaethui leipaw sarangpaw miakaw nae hanlan thyaa khyh; hynh-e hae kyaze sahkhakheit kha a typaw miakaw tuh athyaa leipaw athua cih.
27 Ccu pali te cceihpaw sarangpaw hae lakuze a ccutin te cceihpaw balyn tuh nae hanlan thyaa khyh; achihpaw hynh-e hae kya-e ccangkhakheit kha a typaw humhung zemah zete cia athyaa leipaw athua cih,
28 te achihpaw kha a phupaw tuh a uccaw kha a sukuh cih zah zete cia athyaa leipaw athua cih; hynh-e hae tuh nae hanlan athyaa leipaw nynh thua hae.
29 Laephi kya avawpaw ahysuepaw hae lakuze hynh-e hae hynh nae hanlan thyaa khyh: theihmung, pazu, innkyngpaw alepaw phin,
30 tawhte, tang, innkyngpaw, laesia kya umpaw laeding te chihkua.
31 Avawpaw balyn lakuze hynh-e hae hynh nae hanlan thyaa khyh hae; hynh-e hae achihpaw ccangkhakheit kha a typaw humhung zemah zete cia athyaa leipaw athua cih.
32 Te hynh-e hae achihpaw ccangkhakheit nynh a ccawphupaw ccangkhakheit, thing te raepaw uccaw, boeining, saphua, sungkua te mangpaw uccaw ccangkhakheit tuh a thu cih; tui lungkhu khe dung athua cih zah zete cia athyaa leipaw athua cih, tukoute athyaa cih.
33 Te hynh-e hae lakuze ccangkhakheit nynh laephi ang lungkhu lang a ccaw lanze, a lungkhu umpaw balyn tuh thyaa vae khyh, te tuh-e laephi ang kha na koi cih.
34 Tuh-e ang lungkhu e tui nynh a ccawphupaw aepaw looh ccangkhakheit tuh athyaa leipaw athua vae cih; tuhcihawpaw ang ccangkhakheit lungkhu a umpaw niapaw atui miakaw tuh athyaa leipaw athua cih.
35 Tuh-e achihpaw apyn kya-e ccangkhakheit nynh a ccawphupaw pawpaw balyn tuh athyaa leipaw athua cih; takuamaee thuasah, maeephu thuasah ro athua cih; tuh-e hae tuh thyaa khyh hae zah nae hanlan athyaa leipaw athua cih hae.
36 Thuasalama tuidy thuasah, tui tungnawpaw tuikua thuasah athyaa cih, tuhzemah tuh-e alungkhu umpaw achihpaw kha a typaw pawpaw zemah athyaa leipaw athua cih.
37 Tuh-e achihpaw apyn kya-e ccangkhakheit nynh tuu lan cite nungpaw ccacii vawlan khe a ccawphu zemah, tuh-e ccacii tuh athyaa.
38 thuasalama tui kya dung athuapaw ccacii vawlan khe achihpaw apyn kya-e ccangkhakheit nynh a ccawphu lanze, tuh-e tuh nae hanlan thyaa khyh.
39 Na la ae oh paw phin sarangpaw nynh a chi lanze, tuh-e achihpaw kha a typaw tuh zete cia athyaa leipaw athua cih.
40 Tuh-e achihpaw kha a ae hae paw tuh mih boeining kha a sukuh cih hae zah zete cia athyaa leipaw athua cih hae; te achihpaw kha a phu hae paw tuh mih boeining kha a sukuh cih hae zah zete cia athyaa leipaw athua cih hae.
41 Laephi kya avawpaw ahysuepaw balyn tuh anungsikuh hae; tuh-e hae tuh ae lanpaw thua khyh hae.
42 A vue te a vawpaw pawpaw zemah thuasah, accu ccu pali te avawpaw pawpaw zemah thuasah, ccu patae a hoipaw pawpaw zemah thuasah, laephi kya avawpaw ahysuepaw balyn thuasah na ae lan khyh oh; pawccecize tuh-e hae tuh a nungsikuh hae.
43 Avawpaw ahysuepaw ccangkhakheit keiccuze naemaw nynh naemaw kha anungsikuhpaw lang na raekuh lan khyh oh; hynh-e hae hynhte naemaw nynh naemaw kha na thusakuh lan khyh oh, athyaa leipaw lang na tangsei cih oh.
44 Pawccecize kae tuh nae Pachia Bawipaw nynh ka thua; tukeiccu naemaw te naemaw kha thyaasakuh oh. Kae tuh ka thyaa keiccuze nanning mah thyaa oh. Laephi vawlan ahysuepaw avawpaw ccangkhakheit keiccuze naemaw te naemaw kha na thusakuh lan khyh oh.Ref 11.44: Lev 19.2; 1Pe 1.16
45 Pawccecize kae tuh nae Pachia thua khylan Izip ram kyate ae poukhae oh paw Bawipaw nynh ka thua; nanning tuh na thyaa cih oh, pawccecize kae tuh ka thyaa, a cipya hae.
46 E hynh sarangpaw, pavaw te tui kya a zeihthyapaw ahiinpaw ahysuepaw miakaw te laephi vawlan a vawthyapaw ahysuepaw miakaw te asekuhpaw upadi,
47 athyaapaw te athyaa leipaw laku, ae lanpaw ahiinpaw ahysuepaw te ae lei lanpaw ahiinpaw ahysuepaw laku laesahnawpaw kawbya nynh thua.