10
Nadab te Abihu
1 Aaron ccapaw hae Nadab te Abihu nynh pakephepaw kha mawmawte lawkuh hae zah, tuin kya maee kha a nung hae, a vawlan khe mynkhuhpaw kha a khang hae; te minmin nynh athyaa leipaw maee kha Bawipaw malang a pya hae, tuhcite Bawipaw nynh minmin kha kawpya khyh hae.
2 Te Bawipaw malang te maee tuh yn pou zah minmin kha marya a u hae, te Bawipaw malang khe a chih hae.
3 Oute Moses nynh Aaron kha, “Bawipaw nynh,
‘Kamaw kya a naekuh hae paw kyakhate
kae tuh ka thyaa cipaw ka langsakuh cih,
te ccungccaw balyn malang
phu-esah ka thua cih,’ cite
a hopaw asuilan tuh
hynh-e nynh thua,” a cipya.
Te Aaron tuh daebabi lan a um.
4 Moses nynh Aaron a paaw neitaw Uzziel a ccapaw hae Mishael te Elzafan kha ko hae zah, “Malang oun cceih oh, nae uno hae kha beikinnthyaa malang kyate ryahmin atolang khe toikhaekuh oh,” a cipya hae.
5 Moses nynh kaw a pya hae thyhte, minmin nynh malang cceih hae zah mih puizia hae kha mih angkile khate hang hae zah ryahmin atolang a toikhaeku hae.
6 Te Moses nynh Aaron te a ccapaw hae Eleazar te Ithamar kha, “Nae sang kha phuasalae lan nung nan oh, nae boeining kha sei nan oh, tuhkhyhze tuh na chih cih oh zah thinrianaw kha ccungccaw zapi balyn tungvaw a ccah cih; thuasalama nae uno hae, Israel ccungccaw balyn nynh Bawipaw nynh a ruasahpaw maeeruanaw kha rawkhui hae sah.
7 Tungkunaw bu thuakaw atolang na cceih lan khyh oh, tuhkhyhze tuh na chih cih oh; pawccecize Bawipaw kya-e thuhkupaw chitui tuh nae tungvaw kya a um,” a cipya hae. Te Moses nynh kaw a pya hae thyhte minmin nynh a cyi hae.
8 Bawipaw nynh Aaron kha,
9 “Namaw thuasah, na ccapaw hae thuasah tungkunaw bu lungkhu lang he na tee vae oh ze, na chi khyh nawlan oh, misutui thuasah, ruimangpaw niapaw thuasah na neih lan khyh oh; tuh-e tuh nae she balyn kya zungzae hanlan phungbya nynh thua.
10 Athyaapaw te huatawpaw, athyaa leipaw te athyaapaw kha na laesah cih oh;
11 te Bawipaw nynh Moses kyate Israel ccungccaw hae kalan a hopaw phungbya balyn kha na ccangpah cih oh,” a cipya.
12 Moses nynh Aaron te tuhlaepaw a ccapaw hae Eleazar te Ithamar kha, “Bawipaw kya-e maee te silawnaw hae lungkhu e alaepaw ccathae silawnaw kha lah oh lah, silawhang pe khe ransi phing leite ae oh, pawccecize tuh-e tuh athyaa huaccepaw nynh thua;Ref 10.12-13: Lev 6.14-18
13 tuh-e tuh Bawipaw kalan maee te silawnaw hae lungkhu e kha namaw te na ccapaw hae nynh na ccou lan oh paw athua keiccuze hmin thyaapaw kyakhe na ae cih oh, pawccecize tuhcite kamaw kha kawpya ka thua.
14 Thuasalama hangthungte hebia a thuapaw aby te hangthung a thuapaw aphae kha namaw, na ccapaw hae te na ccanung hae nynh athyaapaw hmin sankhakheit kya na ae cih oh; pawccecize Israel ccungccaw hae nynh a pya hae paw ccawkunaw silawnaw hae lungkhu e tuh-e hae tuh nang te na ccaaw hae kalan pya na thua vae oh.Ref 10.14-15: Lev 7.30-34
15 Hangthung athuapaw aphae te hangthungte hebia athuapaw aby kha maee-ute silawnawpaw atho ryte, Bawipaw malang khe hangthung-hebiate silawnaw lante hangthung khylan nanning nynh nae thuakhae cih oh; tuh-e hae tuh Bawipaw kawpyanaw thyhte, namaw te na ccaaw hae nynh zungzae na ccou lan oh paw nae hangpaw athua cih,” a cipya hae.
16 Oute Moses nynh seithyaanaw silawnaw kya-e miaa kong kha hoyte a khia hae tuh, maee te phe u vae hae cipaw a ny! Tuhlaepaw Aaron ccapaw hae Eleazar te Ithamar tungvaw a thinria zah,
17 “Pawcce seithyaanaw silawnaw kha athyaapaw hmin kya na ae khyh oh? Pawccecize ccungccaw zapi cyiseinaw kha na vuapya ccaw oh cite, minmin ccelang Bawipaw malang seingaethyanaw rae khylan, Pachia nynh tuh-e tuh nanning kalan ae pya vae oh.Ref 10.17: Lev 6.24-26
18 A chii kha beikinnthyaa lungkhu lang na teekhae lan oh paw thua khyh. Kaw kae pya thyh oh te, tuh-e tuh beikinnthyaa lungkhu kya na ae ccaccing lan oh paw nynh thua,” a cipya hae.
19 Te Aaron nynh Moses kha, “Dotua, atunin minmin nynh seithyaanaw silawnaw te maee-ute silawnaw kha Bawipaw malang a pya hae; tuhzemah tuhcihawpaw uccaw hae nynh ka tungvaw yn ccawphu vae! Atunin seithyaanaw silawnaw kha phe ka la ae vae lanze, tuh-e tuh Bawipaw malang nawccawpaw athua ung cih tou?” a cipya.
20 Moses nynh tuh-e bya tuh he a thae te, a lung accing.