16
Ahynhupaw Synriatu Tousenaw
Jesu nynh a zuitu hae kyakhe, “Mihoipaw lu kheit nynh synriatu lu kheit a hoi, tuh-e paw nynh a bawipaw uccaw hae kha phya a mang kou cite a bawipaw kha a hopya hae. A bawipaw nynh tuh-e paw tuh ko zah, ‘Na konglang ka thaepaw tuh pawtemou athua? Synriatu rya na lawnawpaw ccazing kha yn pya, pawccecize synriatu na thua kho vae lan khyh,’ a cipya. Synriatu nynh a lungkaw te, ‘Pawmou ka cyih vae cih? Ka bawipaw nynh ka ryalaw kyate phe yn phua vae, laephi thae lanze ka thae kho khyh, ngiaku lanze ka maethah. Ka ryalaw athang vae ze, ming hae nynh mih inn lang oun thuasah nawlan hae, pawte cyi lan cipaw ka nyku vae,’ a ciku. A bawipaw laebah um hae paw miakaw kha ko hae zah, masaty lukheitpaw kha, ‘Ka bawipaw kya hohzeihmou laebah na um?’ cite a khia. Aning nynh, ‘Chitui bath za kheit,’ a cipya. Aning nynh, ‘Na ccazing kha lawkuh lah arangte haung lah sung pangaw cite zeikuh,’ a cipya. Mingccangpaw kha, ‘Nang so hohzeihmou laebah na um?’ cite a khia. Tuh-e paw nynh, ‘Chanvuih kor za kheit,’ a cipya. Synriatu nynh, ‘Na ccazing kha lawkuh lah sung tarya cite zeikuh,’ a cipya. A hynhupaw synriatu nynh hawrarih lante a cyi keiccuze a bawipaw nynh the a hoysah. Pawccecize e laephi ccungccaw hae tuh mimaw she e ccungccaw hae te ccuepekunaw kya awnaw ccungccaw hae laeze a hawhua hae. Nanning kae hopya oh, atyn leipaw laephi sisua khate ruiban hae kha raekuh oh; tuhteze nynh tuh-e sisua he athang te, tuh-e ruiban hae nynh nanning kha zungzae tynpaw inn kya ae cciadue cih oh.
10 “Adihpaw uccaw kya a lungzipaw tuh alepaw uccaw kya mah a lungzi; adihpaw uccaw kya a hynpaw tuh alepaw kya mah a hynpaw nynh thua. 11 Tukeiccuze atyn leipaw sisua kya nae lungzi khyh ze, ahmepaw hoirumnaw kha hum nynh mou ae pya cih oh? 12 Ming hae uccaw kya nae lungzi khyh ze, naemaw na ccou lan oh paw uccaw thy tuh hum nynh mou ae pya ry cih oh? 13 See lu kheit nynh bawi lu ning ryalawpah kho khyh; pawccecize bawi lu kheit kha a hua cih zah lu kheit kha a sungsah cih, tuhkhyhze lu kheit kalan a pan cih zah lu kheit kha pawlangria lan khyh. Nanning nynh Pachia te phuasui kha parouh na ryaa kho khyh oh,” a cipya hae.Ref 16.13: Mat 6.24
14 Phua a ry hae paw Farasi hae nynh tuh-e bya balyn tuh thae hae zah Jesu kha a nuinse hae. 15 Jesu nynh minmin kha, “Nanning tuh ccungccaw hae malang naemaw te naemaw na dingsakuh oh paw nynh na thua oh; thuasalama Pachia nynh nae thinlung kha a ny; pawccecize ccungccaw nynh myarya aphute lante tuapaw uccaw tuh Pachia muihnaw kya anungsikuhpaw nynh thua.
16 “Kawbya te profeh hae ccauh tuh baptisma pyatu Johan kyacia hanlan nynh thua. Johan ccyh kyate vae tuh Pachia peenaw thehoypaw kha ho thua vae zah ccungccaw miakaw nynh tuh-e peenaw lungkhu lang thawte a tee vae hae.Ref 16.16: Mat 11.12-13 17 Kawbya kya-e ccapyh loihpaw ccaw ccangkheit azo laeze vaaw te lae zo nynh azoihua.Ref 16.17: Mat 5.18
18 “Humhung zemah a zu kha mah zah ccangpaw nopi kha zu lang a hoipaw tuh milae zu a seikhaepaw nynh thua; a vawpaw nynh a myapaw nopi kha zu lang a hoipaw tuh milae zu a seikhaepaw nynh thua.Ref 16.18: Mat 5.32; 1Ko 7.10-11
Lazaruh te Mihoipaw
19 “Sephaphuhpaw boeining te nebaleihpaw boeining kha lawkuh zah myarya hoysahte nin takyh leih umpaw mihoipaw lu kheit a um. 20 Lazaruh a ci hae paw ryachipaw lu kheit a um, aning tuh a pyn balyn vaemaw te phe beih zah mihoipaw thuakaw zung khe phang a huekuh. 21 Mihoipaw ccaboi kyate accahpaw loohmoi kha ae lan a ry; ui hae nynh oun cceih hae zah a vaemaw hae kha leih a lyapya hae. 22 Tuh-e ryachipaw tuh chih zah vaaw hae nynh Abraham byvaw kalan a cciakhae hae. Mihoipaw mah chih zah a uu hae. 23 Mihoipaw tuh Hell lungkhu kya myarya ccih lan teing zah, a dothung tuh asawnaw e Abraham te a pe umpaw Lazaruh kha a muih hae. 24 Tetuh aning nynh sia zah, ‘Apang Abraham, thaw beih yn ccih lah Lazaruh kha beih yn sawpah, a kuihdung kha tui kya yn dungsah lah ka lae hynh yn kyaasah sah, pawccecize kae tuh hynh-e maeephu kya myarya ccih lan ka teing,’ a cipya. 25 Thuasalama Abraham nynh, ‘Ka ccapaw, na hiin lyaze uccaw hoypaw hae kha na mue zah, Lazaruh tuh uccaw thahpaw hae kha a mue cipaw liathuitua; thuasalama atu aning tuh hein kya ngaengansah athua vae, nang tuh myarya ccih lan na teing vae. 26 Tuhpiaze kaening te nanning laku kya myarya khupaw hunghuapi kha rae athua vae. Tukeiccuze hein kyate nae kalan a cceih ry hae paw nynh cceih kho khyh hae, khahlang te kaening kalan a cceih ry hae paw mah cceih kho khyh hae,’ a cipya. 27 Mihoipaw nynh, ‘Tuhteze, apang, Lazaruh kha ka paaw inn lang nae la sawpya nawlan kae ngia. 28 Pawccecize kae tuh uno lu pangaw ka hoi, minmin nynh hynh-e teingnaw hmin kalan oun thuabua khyh nawlan hae, aning nynh minmin kha raeringnaw la pya hae sah,’ a cipya. 29 Abraham nynh, ‘Minmin tuh Moses te profeh hae mang a hoi hae, minmin bya kha la ngae hae sah,’ a cipya. 30 Thuasalama aning nynh, ‘Apang Abraham, tuhte thua khyh; chinaw kyate lu kheit nynh thoothui zah mih kalan a ccia ze, minmin tuh a ngaesikuh cih hae,’ a cipya. 31 Abraham nynh, ‘Minmin nynh Moses te profeh hae bya kha a ngae khyh hae ze lukhakheit nynh a chih hae paw kyate a tho zemah zyn lae vae lan khyh hae,’ a cipya,” cite a hopya hae.