14
Tui A Poipaw A Dansah
Sabbath nin kya Jesu nynh aepaw ae lan Farasi lupipaw lu kheit inn lungkhu lang he a tee tuh minmin nynh a dophi hae. Tui poipaw ccinaw a hoipaw lu kheit tuh Jesu malang khe a um. Jesu nynh tho zah kawbya thya hae paw te Farasi hae kha, “Sabbath nin kya dansah lan accan tou?” cite a khia hae. Minmin tuh yccae khyh hae. Jesu nynh tuh-e paw tuh ko zah a dansah koute a cciasah. Jesu nynh minmin kha, “Nanning lakuze a ccaaw tuhkhyhze a vaetua kha sabbath nin kya tuisung lungkhu lang a ccaw ze palou a thy leipaw a um cih tou?” cite a khia hae.Ref 14.5: Mat 12.11 Minmin nynh e bya hynh mah khung kho khyh hae.
Zakawsangsakunaw
Kopaw ccungccaw hae nynh ahoy huapaw haungnaw a poku hae paw kha Jesu nynh he a muih tuh, tousenaw phungpaw a hopya hae: “Lukhakheit nynh zudy poi kalan ae ko ze ahoy huapaw haungnaw kya la haung nan, nang laeze sawtuahua lan umpaw kha a la kobua ze,Ref 14.8-10: Ptb 25.6-7 nanning parouhte ae kotu oh paw nynh na kalan yn cceih cih zah, ‘E paw hynh na haungnaw kha pya,’ ae cipya ze, nang tuh maethyate ane huanaw hmin kya um lan yn ccan vae cih. 10 Thuasalama nang kha ae kobua hae ze, cceih lah ane huanaw kyakhe la haung; tuhteze nynh nang ae kotupaw he yn thua te, ‘Ka ban, ahang huanaw langkhe haung,’ ae cipah cih; tetuh na haungkheih oh paw malang khe sawtuanaw na mue vae cih. 11 Pawccecize humhung zemah amaw te amaw a hangsakuhpaw tuh sawbung athua cih zah, amaw te amaw zakaw a sangsakuhpaw tuh hangthung athua cih,” a ci.Ref 14.11: Mat 23.12; Luk 18.14
12 Jesu nynh amaw a kotupaw kha mah, “Nang nynh awkhua loohdangkunaw tuhkhyhze zete loohdangkunaw na rae vae ze, na ban hae, na uno hae, na vaeccaw hae, a hoirumpaw innpaw hae kha la ko nan hae; tuhte na ko hae ze minmin nynh mah bua ae koru cih hae zah amee ae sangru cih hae. 13 Thuasalama nang nynh poi na tua vae ze, ryachi hae, pyn kya-e accing lei hae paw, ccukhou hae te mitmoh hae kha la ko hae. 14 Minmin nynh ae sangru kho lan khyh hae, tukeiccuze hythua ccoupaw na thua cih. Miding hae thoothuinaw kya amee sangru na thua cih,” a cipya.
Loohdangkunaw Tousenaw
(Mat 22.1-10)
15 Jesu ryte aenaw kya a haungkheih hae paw lu kheit nynh tuh-e bya tuh thae zah Jesu kha, “Pachia peenaw kya sanlou a ae cih paw ccungccaw tuh hythua ccoupaw nynh thua!” a cipya. 16 Jesu nynh tuh-e paw tuh, “Ccungccapaw lu kheit nynh loohdangnaw poi pi tua zah ccungccaw patae a ko. 17 Looh ae ccyh yn zaw te, a ko hae paw kalan a seepaw kha saw zah, ‘Rang ccavae oh, pawpaw balyn atu paccyn athua vae,’ cite a hosahpya hae. 18 Thuasalama mih balyn te pong a seisah hae. Masaty e paw nynh, ‘Laekua kua kheit ka re zah do lan ka ccia aho ung, beih yn ngaethya hin,’ a cipya. 19 Mingccangpaw nynh, ‘Tangnua toi pangaw ka re zah syntawtua lan ka la cceih ung cih, beih yn ngaethya hin,’ cite a ngiaku. 20 Mingccangpaw nynh, ‘Atumaw khe zu ka hoi zah kae thuathya lan khyh,’ a ci. 21 Tukeiccuze tuh-e seepaw nynh ki zah tuh-e tuh a bawipaw kya a hopya. Inn hoitupaw tuh a thinria zah a seepaw kha, ‘Khualae e laanluepi hae te laanpi dihpaw hae kalan khe la cceih kangmaw lah ryachi hae, pyn kya-e accing lei hae paw, ccukhou hae te mitmoh hae kha hynhlang oun cciakhae hae,’ a cipya. 22 A seepaw nynh, ‘Bawipaw, kaw nae pya thyhte phe ka cyi vae, tuhzemah akhaan mang accawng ung,’ a cipya. 23 A bawipaw nynh a seepaw kha, ‘Laanluepi te laanpi dihpaw hae kalan la cceih lah, ka inn kya phe abia ccaw, ccungccaw hae kha nangsete oun ko hae. 24 Pawccecize nang kae hopya, kopaw ccungccaw hae lu kheit nynh sanmah ka zerya hynh taangtua lan khyh,’ a cipya,” cite a hopya.
Zuitu Thuanaw Mee
25 Ccungccaw zapi patae tuh Jesu ryte a cceih hae. Jesu nynh maekuh zah minmin kyakhe, 26 “Humhung zemah ka kalan yn cceih zah a paaw te a nung, a zu te a ccaaw hae, a uno hae te a ccia hae, te amaw a hiinnaw kha heize a hua khyh lanze ka zuitu lang tang kho lan khyh.Ref 14.26: Mat 10.37 27 Humhung zemah amaw a vaelantung kha puihku leite kae yn zuipaw tuh ka zuitu lang tang kho lan khyh.Ref 14.27: Mat 10.38, 16.24; Mar 8.34; Luk 9.23 28 Pawccecize nanning lakuze lukhakheit nynh innhangpaw sak lan a paccynku ze, inn lynnaw lanpaw phua azaw lan a hoi tou, hoi khyh tou cipaw ny khylan masaty haungte amee tuatua lan khyh tou? 29 Tuhte tuaty leite, innhangpaw tuh tungpi a bing koute a lyn kho khyh ze, a muih hae paw balyn nynh a sarya cih hae zah, 30 ‘E ccungccapaw nynh sak lan mang tho zah lyn kho vae khyh,’ cite a ho cih hae. 31 Tuhkhyhze, siapharan lu kheit nynh ccangpaw siapharanpaw kha rhawtuk lan a nouku ze, ccungccaw thong kuin te yn thokuhpaw siapharanpaw kha ccungccaw thong haw te ka dou kho cih tou cipaw masaty haungte tuaku ty leite a um cih zawtou? 32 A dou kho lan khyh ze, tuh-e siapharan tuh laan sawpi a um lyakhe, zeccuetu a saw cih zah ccawkunaw a ngiakuh cih. 33 Tuhawte nanning laku e humhung zemah a hoipaw balyn kha marya a cciataw leipaw tuh ka zuitu lang tang kho lan khyh.
A E leipaw Loi
(Mar 9.49-50)
34 “Loi tuh ahoy; thuasalama loi nynh a enaw kha azo lanze pawtemou esah kho athua ung cih? 35 Tuh-e loi tuh laephi hanlan thuasah, athupaw pumnaw hanlan thuasah hoy vae khyh; ccungccaw hae nynh ccaring a vua vae hae. Thaenaw nakaring a hoipaw nynh thae sah,” a ci.