LUKA
KYATE THEHOYPAW
Luke
Ccangpaw Thehoypaw kya a um leipaw kha Luka kya muih thua zah, tuh-e hae tuh Jesu a pui lyaze tuurin hae te vaaw hae nynh paeenaw kya hlaw a sah hae paw kong, a imua lya Beikinn lungkhu kya Jesu, Samaria Mihoypaw te Ccapaw Zopaw phungpaw hae nynh athua hae. Thehoypaw lungkhu kya balyn abyapi lante a langsahkupaw tuh sawsangnaw, Thyaa Muisaw, Jesu ryalawnaw kya nopi hae a byapinaw hae te Pachia kya-e seingaethyanaw kha nynh athua.
1
Baptisma Pyatu Johan Puinaw
1 Ccungccaw patae nynh aening kya acyihkuhpaw konglang kha ccaw te zei lan a zuaku hae.
2 Tuhawte atakaw lyaze mit te a muih hae paw ccaekia hae te thehoypaw a phytu hae nynh a ho hae thyhte a zei hae.
3 Tukeiccuze sawtua lan kou umpaw Theofilas, kae mah atakaw te pawpaw balyn kha akaw-aleih ka thaethya koute, po akyngkuh lante na kalan zei lanze ahoy cih cite ka tua,
4 tuhteze nynh ae ccangpya vae hae paw uccaw hae konglang ahmepaw kha na nyh cih.
5 Judea ram kya Herod Siapharan ccyh lyakhe Abijah ranpibawi aphu kya a um buapaw Zekhariah a ci hae paw ranpibawi lu kheit a um; a zu tuh Aaron ciihan thua zah a min tuh Elizabeth acikuh.Ref 1.5: 1 Chr 24.10
6 Minmin lu ning tuh Bawipaw kawbya hae te phung hae balyn kha ccaenaw um lei lan a zui hae paw thua zah Pachia malang parouh mawte a ding hae paw nynh thua.
7 Elizabeth tuh a tiin keiccuze ccaawsaah khyh hae, parouh mawte myarya taw vae hae.
8 Vaekheih tuh Zekhariah nynh amaw a phu hae ryte atue nynh a phya thyhte Pachia malang ranpibawi rya a law lyakhe,
9 ranpibawi ryalaw phung thyhte, ccungthydung hae zah aning tuh Bawipaw beikinnthyaa lungkhu lang tee lan zah mynkhuhpaw u lan accan.
10 Mynkhuhpaw a u lyakhe ccungccaw hae balyn tuh atolang khe saw a sang hae.
11 Bawipaw vaawpaw tuh a kya yn langkuh zah mynkhuhpaw unawpaw silawhang ranglang khe a thadyn.
12 Zekhariah nynh he a muih tuh siikuh zah a rih.
13 Thuasalama vaawpaw nynh, “Zekhariah, rih nan, pawccecize na sawsangnaw tuh thaepya athua, na zu Elizabeth nynh ccapaw ae saahpah cih zah a min tuh Johan cite na phu cih.
14 Na lungtua cih zah na lungpaw cih; tuh-e ccapaw a pui keiccuze ccungccaw patae mah mih lungtua cih.
15 Pawccecize aning tuh Bawipaw muihnaw kya a lesae cih. Misutui te ruithyapaw kha kharouh neih lan khyh; aning tuh a pui mawze Thyaa Muisaw te abeih cih.Ref 1.15: Nam 6.3
16 Israel ccungccaw patae kha Bawipaw mih Pachia kalan a kikhae cih hae.
17 Bawipaw malang zeccuetu athua cih zah profeh Elijah hawte a thungpaw te huhan hoipaw athua cih. Paaw hae te ccaaw hae kha oun ccawsakuh thui cih hae zah kawngae lei hae paw kha miding hae hawnaw kalan oun kikhae cih hae. Bawipaw hanlan ccungccaw hae kha a paccyn ty cih,” a cipya.Ref 1.17: Mal 4.5-6
18 Zekhariah nynh vaawpaw kha, “Tuhte yn cyiku lanpaw tuh pawtemou ka nyh cih? Pawccecize kae tuh a taw vae paw ka thua zah, ka zu mah a kum phe tang vae,” a cipya.
19 Vaawpaw nynh, “Kae tuh Gabriel nynh ka thua. Pachia malang a thadynpaw ka thua zah, aning nynh hynh-e thehoypaw hynh na kalan hopya lan te phypya lan yn saw.Ref 1.19: Dan 8.16, 9.21
20 Nang nynh accyh yn zaw te accing cih paw ka bya hynh na zyn khyh keiccuze hynh-e uccaw hae accing makhia byaho kho leite na um cih zah bya na ho lan khyh,” a cipya.
21 Ccungccaw hae nynh Zekhariah kha phang ngaw hae zah beikinnthyaa lungkhu khaw aro keiccu mih ngaeangthua.
22 Aning nynh he yn pou tuh byaho kho vae khyh zah, beikinn lungkhu kya vizin nynh a muih cih cite a tua hae; aning nynh a kuih te a tangpya hae, bya tuh ho kho vae khyh.
23 Zekhariah tuh a ryalaw ccyh athang te a inn lang a ki.
24 Aro mawze a zu Elizabeth tuh ccaawpoi zah sawpaw sah pangaw lungkhu inn kya a khungkuh.
25 Elizabeth nynh, “Ccungccaw hae laku kya ka teingpaw maethyanaw kha lawpya khylan Bawipaw nynh yn bawm zah, e hynh yn cyipya,” a ci.
Jesu Pui lanpaw Hotynaw
26 Sawpaw sah taruhnaw lyakhe Pachia nynh vaawpaw Gabriel kha Galilee ram, Nazareth a ci hae paw khua kya umpaw liaccadynote1.34 Liaccady: Pise te a ihkheih boi leipaw liaccaw. kalan a saw,
27 tuh-e liaccady tuh David ciihan athuapaw a min Josef a ci hae paw ccungccapaw elang a dypya vae hae paw thua zah a min tuh Mary acikuh.Ref 1.27: Mat 1.18
28 Vaawpaw nynh tuh-e nung kalan yn thua zah, “Maehoynaw a ccounung, na tungvaw hythuanaw um sah! Bawipaw tuh na kya a um,” a cipya.
29 Mary nynh tuh-e bya a thae te, a lungriathae zah, e byabeihnaw hynh pawcihawpaw mou athua cite a tua.
30 Vaawpaw nynh, “Mary, rih nan, pawccecize Pachia nynh nang kha maehoynaw ae pya.
31 Ccaaw na poi cih zah Ccapaw na saah cih, a min tuh Jesu cite na phu cih.Ref 1.31: Mat 1.21
32 Aning tuh a lesaepaw athua cih zah Ahang Huaccepaw Pachia Ccapaw cite ko athua cih, Bawipaw Pachia nynh amaw tuh a minpaaw David kya-e bawitungkhung kha a pya cih.Ref 1.32-33: 2 Sam 7.12, 13, 16; Isa 9.7
33 Aning nynh Jakob ciihan kha zungzae a uk cih zah a peenaw tuh thang boi lan khyh,” a cipya.
34 Mary nynh vaawpaw kha, “Kae tuh liaccady nynh ka thua, pawtemou tuh-e tuh athua kho cih?” a cipya.
35 Vaawpaw nynh, “Thyaa Muisaw tuh na tungvaw yn thua cih zah Ahang Huaccepaw thungnaw tuh na tungvaw yn um cih; Tukeiccuze na saah lanpaw Ccapaw tuh athyaapaw athua cih zah Pachia Ccapaw cite ko athua cih.
36 Dotua, na pui oh paw Elizabeth, a tiinnung a ci hae paw mah a taw vae mawte ccaawpoi zah atu hynh sawpaw sah taruh acih vae.
37 Pawccecize Pachia nynh a cyi kho leipaw pawpaw mah um khyh,” a cipya.Ref 1.37: Gen 18.14
38 Mary nynh, “Kae tuh Bawipaw seenung nynh ka thua, na bya hawte ka tungvaw thua vae sah,” a ci. Te vaawpaw tuh Mary kyate phe a cceih.
Mary nynh Elizabeth A Paebua
39 Tuin nin hae kyakhe Mary tuh thokuh zah Judea muaram kya a umpaw khua langkhe arangte a cceih,
40 Zekhariah inn lang tee zah Elizabeth kha a beih.
41 Mary nynh bya a beihpaw kha Elizabeth nynh he a thae tuh, a vue lungkhu e imua tuh a thohkuh. Elizabeth tuh Thyaa Muisaw te phe beih zah,
42 aning nynh roi accae lante a hopaw tuh: “Nopi hae lakuze nang tuh hythua a ccounung nynh na thua, na vue kya-e imua mah hythua a ccoupaw nynh thua.
43 Ka Bawipaw a nung nynh ka kalan paebua lan ciate pawccemou hynh-e maehoynaw hynh kae nynh ka mue?
44 Pawccecize bya nae beihpaw roi ccahe ka thae te, ka vue lungkhu e imua tuh a lungtua zah a thohkuh.
45 Bawipaw nynh a hopyapaw bya kha accing cih cite a zynpaw nopinung tuh hythua a ccounung nynh thua,” a ci.
Mary Hlaw
46 Mary nynh,
“Ka thinlung nynh Bawipaw kha
the a hoysah,Ref 1.46-55: 1 Sam 2.1-10
47 ka hiinnaw tuh yn Khumtu
Pachia kya a lungtua.
48 Pawccecize a seenung
a nyaanaw kha ningpah khyh.
Atu te she takyh kya
hythua ccounung cite
yn ko vae cih hae.Ref 1.48: 1 Sam 1.11
49 Pawccecize Athungpaw Pachia nynh
myarya lepaw uccaw hae kha
ka hanlan yn cyipya vae;
a min tuh athyaa.
50 A thawccinaw tuh amaw raw
a rih hae paw tungvaw kya
she takyh atyn.
51 A thungnaw khate
a thawzung kha a langsah;
mih thinlung kya
a lysakuh hae paw kha
pong a phiasaku hae.
52 Athungpaw ccungccaw hae kha
mih bawitungkhung kyate
sahbung hae zah,
a nyaa hae paw kha a hangthung hae.Ref 1.52: Job 5.11, 12.19
53 Mih vuelaw hae paw kha
uccaw hoypaw te a kua hae,
mihoi hae kha mih kuih ccakaete
a cciasah hae.
54-55 Ah minpaawhae kya,
Abraham kya te
a ciihan hae kya a hosya vae hawte,
a ngaethya-umsahnaw kha liathui zah
a seepaw Israel kha
phe a bawm vae,” a ci.Ref 1.55: Gen 17.7
56 Mary tuh Elizabeth ryte sawpaw sah thum loukaw a umkheih kou hae te, a inn lang a ki.
Baptisma Pyatu Johan Puinaw
57 Elizabeth tuh aninsaw yn kyh zah ccapaw yn saah.
58 Bawipaw nynh Elizabeth tungvaw kya myarya lepaw a thawccinaw a langsahpyaku cipaw kha a innpaw hae te a vaeccaw hae nynh he a thae hae tuh, amaw ryte mih lung atua.
59 Nin taryanaw nin kya imua tuh vingdungaw lan a cciakhae hae, a paaw min kha kisah te Zekhariah cite a minphu lan a ci hae.Ref 1.59: Lev 12.3
60 Thuasalama a nung nynh, “Thua khyh, Johan cite a minphu lan,” a ci.
61 Minmin nynh, “Na pui oh paw kya tuh-e min a phukuhpaw lu kheit san um boi khyh,” a ci hae.
62 Tuinte minmin nynh a paaw kha pawtemou min na phu ry cite tangpyate a khia hae.
63 A paaw nynh zei nawlan ccalung kha ngiakuh hae zah, “A min tuh Johan nynh thua,” cite a zei. Mih balynte mih ngaeang pong thua.
64 Zekhariah tuh vaekheihmawte a munglae yn hoythui zah bya yn hothya, te Pachia kha the a hoysah.
65 Mih innpaw hae balyn tuh a rih hae, tuh-e thongpang tuh Judea muaram balyn kya azeihkuh.
66 A thae hae paw balyn nynh tuh-e tuh mih thinlung kya ccykekuh hae zah, “E imua hynh pawlang vema yn tang?” a ci hae. Pawccecize Bawipaw kuih nynh imuapaw kha a umkhae.
Zekhariah nynh Profehbya Honaw
67 A paaw Zekhariah tuh Thyaa Muisaw te phe beih zah profehbya a ho:
68 “Israel Pachia Bawipaw tuh
thehoysah oh sih,
pawccecize a ccungccaw hae kha
bawm hae zah a shawkhaw hae.
69 A seepaw David ciihan kyate
aening hanlan athungpaw
khumtu kha a langsaku vae.
70 Langmawlya mawte
athyaapaw a profeh hae
munglae kyate a ho hawte,
71 ah rhaw hae te oun huatu hae
kuih kyate khum ah thua cih oh.
72 Ah minpaaw hae kya
bya a kinkupaw a thawccinaw kha
langsah zah athyaapaw
a byakinnaw kha a liathui vae,
73-74 Ah minpaaw Abraham kyaze,
‘Nae rhaw hae kyate
kae luesah cih oh;
rinaw hoi leite ka rya na lah cih oh,
75 nae hiin lungkhu balyn
ka malang khe adingpaw te
athyaapaw lang na tang cih oh,’
cite thyalawkute bya a kinku.
76 Imuapaw, nang tuh
Ahang Huaccepaw Pachia profeh
cite ko na thua cih,
pawccecize nang tuh
Bawipaw laanpi kha paccynpya khylan
amaw malang na cceih ty cih,Ref 1.76: Mal 3.1
77 a ccungccaw hae kha,
mih seinaw ngaethyanaw liate
khumnaw kong nynaw
pya khylan hae na cceih ty cih.
78 Ah Pachia kya-e nevyalyapaw
ngaethyaumsahnaw liate
vaawlang e khuaninpaw nynh
aening tungvaw yn thua cih,
79 mohnaw te chinaw mynlyh kya
a haung hae paw kha
awnaw pya khylan,
daenaw laanpi langkhe
aening ccu kha cciakhae khylan
nynh thua,” cite a ho.Ref 1.79: Isa 9.2
80 Imuapaw tuh lethung zah muisaw kya a thawsae, te Israel hae kalan a langku maw tuh ramkaw kya nynh a um.