7
1 Te Elisha nynh, “Bawipaw bya hynh ngaetua: Bawipaw nynh hynhte a ho, Awkhualan atu ccyh loukaw kya Samaria khua koikua kyakhe chanvuih khui kha tounawpaw te kaw kheit ze shekel ccangkheit, barli kha tounawpaw te kaw ning ze shekel ccangkheit lang a zua cih hae, a ci,” cite a ho.
2 Siapharan nynh a ngeikunawpaw rhawbawipaw nynh Pachia ccungccapaw kha, “Bawipaw nynh vaawlui kya thanlan-aw a la rae ze heize, tuhcihawpaw tuh thua kho vema?” a ci. Elisha nynh, “Na mit ccaccei te tuh-e tuh na muih cih, thuasalama nang tuh na ae lan khyh,” a cipya.
Siria hae A Ccue hae
3 Koikua atolang khe vaethyakae hae paw lu pali um hae zah minmin nynh, “Ah chi mawlaezung oh hein kyahin pawccemou ah haung cih oh?
4 ‘Khua lungkhu lang tee oh sih,’ ci lanze, khua lungkhu ccakanccih zah ah chih cih oh; hein kya ah haung oh zemah chi mamin lan. Tukeiccuze Siria hae ryahmin kalan cceih oh sih; minmin nynh ah hiinnaw oun haang hae ze hiin lan zah, oun chia hae ze chi lan,” cite a hoku hae.
5 Tukeiccuze zetepakaw khe Siria hae ryahmin lang ccia lan a thokuh hae; thuasalama Siria hae ryahmin kin a thua hae tuh, lu kheit san la um vae khyh hae.
6 Pawccecize Bawipaw nynh Siria rhawkaw hae kha marangle siho, marang hae siho te rhawkaw patae siho kha a thaesah hae, tukeiccuze minmin nynh, “Israel siapharan nynh aening kha tuk khylan Hit siapharan hae te Izip siapharan hae kha a hohku vae hae,” cite lu kheit te lu kheit a hoku hae.
7 Tukeiccuze minmin tuh zetepakaw khe ccue hae zah mih bu hae, mih marang hae te mih lann hae kha a vuasya hae, mih ryahmin kha ccuetaw hae zah, mih hiinnaw lue khylan a ccue hae.
8 E vaethyakae hae paw nynh ryahmin kin he a thua hae te, bu lungkhu lang tee hae zah a ae a neih kou hae te, sui, ngun te boeining kha a lawku hae, te cciakhae hae zah a thuruh hae. Tukoute ki hae zah ccangpaw bu lungkhu lang a tee hae, te tuin kya-e uccaw hae kha lawkute cceih hae zah a thuruh hae.
9 Te minmin nynh, “Ah cyisei vae oh. Atunin hynh thongpang hoypaw nin nynh thua; daebabi lan ah um oh zah khua yn dae lanpaw kha ah ngaw oh zetuh, detahnaw nynh oun thuanua cih; tukeiccuze cceih oh sih lah, siapharan innbyn hae kha hopah oh sih,” cite a hoku hae.
10 Tukeiccuze cceih hae zah khua koikua ngawtu hae kha ko hae zah, “Siria hae ryahmin kalan kae cceih zah, lu kheit sanmah kae muih khyh, roi mah kae thae khyh, a khii hae paw marang hae te lann hae, te bu hae tuh a um mintute a um hae,” cite a hopya hae.
11 Te koikua ngawtu hae nynh sia hae zah siapharan innbyn hae kha a hopya hae.
12 Siapharan tuh khuazi khe tho zah a ryalahtu hae kha, “Siria hae nynh aening oun paccynnuaku hae paw hynh kae hopah cih oh. Aening ah ccakan accipaw hynh a ny hae; tukeiccuze ramkaw kya reku khylan mih ryahmin kyate pou hae zah, minmin nynh, ‘Khua kyate he oun pou hae te, mih hiin pite kyng lan hae zah khua lungkhu lang tee lan,’ cite a tuaku hae,” cite a hopya hae.
13 A ryalahtupaw lu kheit nynh, “A laehypaw marang hae sa pangaw hynhte ccungccaw beihtaraw kha saw oh sih lah, dotua oh sih, pawccecize a chih vae hae paw Israel zapi hae balyn hawkhate hein kya a laehy hae paw hynh mah a teing mamin cih hae,” a ci.
14 Tukeiccuze marangle ccikuh hae paw lu ning kha ko hae zah, “La cceih oh lah, la dotua oh,” cite siapharan nynh hopah hae zah, Siria rhawkaw hae nulang deehui khylan a saw hae.
15 Tukeiccuze minmin nynh Jordan vaw kyacia a deehui hae; Siria hae nynh a rangsakunaw hae ze a vuasya hae paw boeining hae te zunghe hae tuh laanpi kya azung-anaw phe abeih. Locceihtu hae nynh oun ki hae zah siapharan kha a hopya hae.
16 Tetuh khuaccaaw hae nynh pou hae zah Siria hae ryahmin kha a thiing hae. Tukeiccuze Bawipaw bya thyhte, chanvuih khui kha tounawpaw te kaw kheit ze shekel ccangkheit, barli kha tounawpaw te kaw kheit ze shekel ccangkheit lang a zua hae.
17 Siapharan nynh a ngeikunawpaw rhawbawipaw kha koikua ngawtu lang a nung; siapharan nynh amaw kalan a ccia lyaze Pachia ccungccapaw nynh a ho hawte, ccungccaw hae nynh tuh-e rhawbawipaw kha koikua kya phe chih lan a syde hae.
18 Pawccecize Pachia ccungccapaw nynh siapharan kha, “Awkhualan atu ccyh loukaw kya Samaria koikua kyakhe barli kha tounawpaw te kaw kheit ze shekel ccangkheit, chanvuih khui kha tounawpaw te kaw kheit ze shekel ccangkheit lang a zua cih hae,” cite a hopya lyaze,
19 tuh-e rhawbawipaw nynh Pachia ccungccapaw kha, “Bawipaw nynh vaawlui kya thanlan-aw a la rae ze heize, tuhcihawpaw tuh thua kho vema?” cite a khung. Te aning nynh, “Na mit ccaccei te tuh-e tuh na muih cih, thuasalama nang tuh na ae lan khyh,” a cipya.
20 A tungvaw kya tuhcite acyihkuh ccaccing; koikua kyakhe ccungccaw hae nynh amaw kha phe chih lan a syde hae.