3
Jehoram nynh Israel A Uk
Judah siapharan Jehoshafat nynh ram a uknaw kum haw lae taryanaw kum khe, Ahab ccapaw Jehoram tuh Samaria khua kya Israel siapharan lang tang zah, kum haw lae ning a uk. Bawipaw muihnaw kya hoyleinaw kha a rae, thuasalama a nung te a paaw hawte tuh thua khyh, pawccecize a paaw nynh a la raepaw Baal zohtuh kha a vua. Thuasalama Israel hae kha seinaw a raesah hae paw Nebat ccapaw Jeroboam seinaw kha kyngkuh zah cciataw khyh.
Moab te Rhawtukkunaw
Moab siapharan Mesha tuh tuu a kuatu thua zah, aning nynh Israel siapharan kha tuutaw cciing kheit te tuutepaw cciing kheit kya-e tuuming kha leih a pya. Thuasalama Ahab he a chih tuh, Moab siapharan nynh Israel siapharan kha a dou. Tukeiccuze tuh ccyh lyakhe Siapharan Jehoram tuh Samaria khua kyate pou zah Israel hae balyn kha a pum hae. Judah siapharan Jehoshafat kalan bya cciasah zah, “Moab siapharan nynh kae hynh yn dou vae; Moab ram kha tuk khylan nae cciakhae cih tou?” a cipya. Aning nynh, “Kae cciakhae cih, kae pankhae cih, ka ccungccaw hae tuh na ccungccaw hae thua hae zah, ka marang hae tuh na marang hae nynh thua hae,” a cipya. Te aning nynh, “Tei laanpi te mou ccia lan?” cite khia zah, Jehoram nynh, “Edom ramkaw laanpi te ccia lan,” cite a khung.
Tukeiccuze Israel siapharan, Judah siapharan te Edom siapharan tuh a cceih hae; minmin nynh avoikuh lante nin sari a cceih hae tuh, rhawkaw hae elang te mih kya umpaw sahiin hae elang tui um vae khyh. 10 Tetuh Israel siapharan nynh, “Ezou! Bawipaw nynh aening siapharan hae lu thum hynh Moab hae kuih kalan pya khylan hynhsa oun la ko,” a ci. 11 Thuasalama Jehoshafat nynh, “Bawipaw kalan byakhiasah lanpaw Bawipaw profeh tuh hein kya um khyh tou?” a ci. Te Israel siapharan a ryalahtupaw lu kheit nynh, “Elijah kuih tui a bupahtupaw Elisha, Shafat ccapaw tuh hein kya a um,” a cipya. 12 Jehoshafat nynh, “Bawipaw bya tuh amaw kya a um,” a ci. Tukeiccuze Israel siapharan, Jehoshafat te Edom siapharan tuh Elisha kalan a cceihbung hae.
13 Elisha nynh Israel siapharan kha, “Nang te kae tuh pawmou ah sekuh? Na paaw profeh hae te na nung profeh hae kalan la cceih,” a cipya. Thuasalama Israel siapharan nynh, “Thua khyh; Moab siapharan kuih kalan pya khylan siapharan hae lu thum oun kotupaw tuh Bawipaw nynh thua,” a cipya. 14 Elisha nynh, “Rya ka lawpyapaw vaaw Bawipaw tuh a hiin thyhte, Judah siapharan Jehoshafat hynh pawlang ka la ria khyh zetuh, nanning hynh do mah kae do ry lan khyh oh, muih mah kae ry lan khyh oh. 15 Thuasalama tintang khuathyapaw kha oun kotua oh,” a cipya hae. Te tintang khuathyapaw nynh a khua lyakhe Bawipaw thungnaw tuh a tungvaw yn thua. 16 Elisha nynh, “Bawipaw nynh hynhte a ho, ‘E accya hynh tuili hae te phe ka biasah cih,’ a ci. 17 Bawipaw nynh hynhte a ho, ‘Nanning nynh khisan te khuaa kha na muih lan khyh oh, thuasalama naemaw, nae sahiin hae te nae sarangpaw hae nynh na nia lan oh paw tui kha hynh-e accya kyahin phe ka biasah cih,’ a ci. 18 E hynh tuh Bawipaw muihnaw kya hosyn leipaw rya nynh thua, Moab hae kha mah nae kuih kya ae pya cih oh. 19 Khualungrua te koihkuhpaw khua miakaw te ahoypaw khua miakaw kha na tae cih oh; thingku hoypaw miakaw kha na nge cih oh zah tuisung balyn kha laephi na thei cih oh zah laephi hoynaw hmin balyn kha lung te na roh cih oh,” a cipya hae. 20 Awkhualan, awkhua silawnaw rae ccyh loukaw khe, tui tuh Edom langte vaekheitmawte yn lua zah ram kha pong avu.
21 Siapharan hae nynh tuk lan oun ccianua thung vae hae cipaw kha Moab hae balyn nynh he a nyh hae tuh, rhawtuk-uccaw a lawkuh khopaw balyn, adih huapaw kyate ale huapaw kyacia ko hae zah ramri lang a cciakhae hae. 22 Awkhua takaw he a tho hae tuh, tui vawlan khe khuanin nynh ak zah minmin te arawsekuh lante tui tuh chiise hawte asepaw kha Moab hae nynh a muih hae. 23 Minmin nynh, “E hynh chiise nynh thua; siapharan hae tuh lu kheit te lu kheit tukkuh hae zah a theihkuh hae hynhsa. Tukeiccuze Moab hae, luade ccavae oh!” a ci hae. 24 Thuasalama Israel hae ryahmin kya he a thua hae tuh, Israel hae nynh thonuakuh hae zah Moab hae kha tuk hae zah mih malang khe a ccue hae; Moab ram a tee hae cia Israel hae nynh po a tuk hae. 25 Khua hae kha roh hae zah laephi ahoynaw hmin miakaw kha lung vuathin hae zah a bongsah hae. Tuisung miakaw kha laephi thei hae zah, thingku hoypaw miakaw kha a nge hae. Kir-hareseth khua kyalya kha khualungrua um zah, tuh-e khua tuh lung te azaethya hae paw nynh koihlu hae zah a zae hae. 26 Moab siapharan nynh ka tukru kho vae lan khyh hae cipaw he a nyh tuh, thaloi kyngpaw ccungccaw za sari kha ko hae zah Edom siapharan kha ro lan a rawse zemah roh kho khyh. 27 Tetuh amaw ccelang siapharan lang a tang cih paw a ccatawccaw kha lah zah, rhawlungrua vawlan khe maee-ute silawnaw kha a raenaw. Tukeiccuze Israel hae tuh myarya mih thinria zah amaw kyate mih ram lang a ki vae hae.