24
Rhaw hae nynh Judah Taenaw
1 Jehoiakim she lyakhe Babilon siapharan Nebukhadnezzar tuh yn cceihthung zah, Jehoiakim tuh kum thum lungkhu a ryalahtu lang a tang; tukoute rawse zah a dou.Ref 24.1: Jer 25.1-38; Dan 1.1-2
2 Bawipaw nynh a ryalahtu profeh hae kyate a la hopaw bya thyhte, Judah ram kha ro khylan Babilon hae, Siria hae, Moab hae te Ammon hae kha Judah kalan a sawnua hae.
3-4 Manasseh nynh a la seipaw a seinaw balyn keiccu te seinaw a hoi lei hae paw chiise a la luasahpaw seinaw keiccuze a ccungccaw hae kha a muihnaw kyate dee khylan Bawipaw kawpyanaw te hynh-e uccaw hynh Judah tungvaw yn thua; pawccecize Jerusalem khua kha seinaw a hoi leipaw chiise khate biasah zah Bawipaw nynh a seinaw kha ngaethya ry khyh.
5 Tuhlaepaw Jehoiakim nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.
6 Tuhcite Jehoiakim tuh a minpaaw hae ryte ih hae zah, a ccapaw Jehoiakim nynh amaw ccelang siapharan lang a tang.
7 Izip siapharan tuh a ram kyate pou vae khyh, pawccecize Izip Vaw kyate Zufrates Vawpi kyacia Izip siapharan kya-e ram balyn kha Babilon siapharan nynh a law vae.
Jehoiakhin Kyngnaw
(2Sh 36.9-10)
8 Jehoiakhin tuh kum haw lae tarya acih te, ram kha uk takaw zah, Jerusalem kyate sawpaw sah thum a uk. A nung min tuh Nehushta cikuh zah Jerusalem khuapaw Elnathan ccanung nynh thua.
9 A paaw nynh a la rae hawte Bawipaw muihnaw kya hoyleinaw kha a rae.
10 Tuh ccyh lyakhe Babilon siapharan Nebukhadnezzar a ryalahtu hae nynh Jerusalem kha oun ccianua thung hae zah a koihlu hae.
11 A ryalahtu hae nynh khua a koihlu lya hae khe, Babilon siapharan Nebukhadnezzar tuh Jerusalem khua lang a thua;
12 Judah siapharan Jehoiakhin nynh amaw, a nung, a ryalahtu hae, a kuihkaw e bawi hae te a siapharan inn e bawi hae ryte Babilon siapharan kalan a apku. Babilon siapharan nynh ram a uknaw kum taryanaw kum khe Jehoiakhin kha thong a saw.Ref 24.12: Jer 22.24-30, 24.1-10, 29.1-2
Jerusalem Lawnaw
13 Bawipaw inn kya-e sisua balyn te siapharan inn kya-e sisua balyn kha Nebukhadnezzar nynh Babilon lang a phu; Israel siapharan Solomon nynh a raepaw, Bawipaw inn kya umpaw sui angphe hae balyn kha zoihtatyh lan a koi, e balyn hynh Bawipaw nynh a la hoty vae hawte nynh thua.
14 Jerusalem khuaccaaw hae balyn, bawi hae balyn, a rawthung hae paw balyn, kyngpaw ccungccaw abalyn thong haw, kuihhae hoy hae paw balyn te sosuhthya hae paw balyn kha marya a cciakhae hae; ram lungkhu e a ryachi huaccepaw ccungccaw hae laelan, lu kheit sanmah laehy khyh hae.
15 Jehoiakhin kha Babilon lang a cciakhae; siapharan a nung, siapharan zu hae, a kuihkaw e bawi hae te ram lungkhu e ccungkiahua hae paw kha kyngte Jerusalem kyate Babilon lang a cciakhae hae.Ref 24.15: Eze 17.12
16 Arawthungpaw ccungccaw thong sari, kuihhae hoy hae paw te sosuhthya hae paw thong kheit, a thawsae zah rhaw a tuk kho cih hae paw kha mih balynte Babilon siapharan nynh kyng hae zah Babilon lang a cciakhae hae.
17 Babilon siapharan nynh Jehoiakhin a paaw neitawpaw Mattaniah kha Jehoiakhin ccelang siapharan lang khang zah, a min kha Zedekiah cite a paleih.Ref 24.17: Jer 37.1; Eze 17.13
Zedekiah nynh Judah A Uk
(2Sh 36.11-12; Jer 52.1-3a)
18 Zedekiah tuh kum kuin lae kheit acih te, ram kha uk takaw zah, Jerusalem kya kum haw lae kheit a uk. A nung min tuh Hamutal cikuh zah Libnah khuapaw Jeremiah ccanung nynh thua.Ref 24.18: Jer 27.1-22, 28.1-17
19 Jehoiakim nynh a la rae hawte, Zedekiah nynh Bawipaw muihnaw kya hoyleinaw kha a rae.
20 Jerusalem te Judah nynh Bawipaw kha myaryamaw a thinriasah hae zah, aning nynh minmin kha a muihnaw kyate ccaring a dee hae.Ref 24.20: Eze 17.15
Judah Shungnaw te Kyngnaw
Zedekiah nynh Babilon siapharan kha a dou.