22
Josiah nynh Judah Ram A Uk
(2Sh 34.1-2)
1 Josiah tuh kum tarya acih te, ram kha uk takaw zah Jerusalem kyate sung thum kum kheit a uk. A nung min tuh Jedidah cikuh zah Bozkath khuapaw Adaiah ccanung nynh thua.Ref 22.1: Jer 3.6
2 Bawipaw muihnaw kya ahmepaw kha cyih zah a minpaaw David laanpi balyn kha a zui, voilang ranglang maekuh khyh.
Hilkiah nynh Kawbya Ccauh A Ccung
(2Sh 34.8-28)
3 Siapharan Josiah nynh ram a uknaw kum haw lae taryanaw kum khe, Meshullam ccapaw Azaliah a ccapaw, ryaccinkhan rya a lahpaw Shafan kha siapharan nynh Bawipaw inn lang saw zah,
4 “Ranpibawi lupi Hilkiah kalan la cceihthung lah, thuakaw ngawtu hae nynh ccungccaw hae kya-e ahlu a khoi hae paw phua, Bawipaw inn lungkhu lang a thuakhae hae paw balyn kha aning nynh ria sah;
5 tuh-e phua tuh Bawipaw inn a do-oihpaw ryalahtu hae kuih kalan pya hae sah lah, minmin nynh Bawipaw inn a raethui hae paw ryalahtu hae,
6 lehccama hae, inn saktu hae te pazan thya hae paw kha pya hae sah; te inn raethuinaw lanpaw thing a awkuh vae paw te lung adeihkuh vae paw re nawlan mang hae sah.
7 Mih kuih kya phua pya athua hae paw ccungccaw hae nynh hmerarih lan rya a law hae keiccuze minmin kha phua ccazing khiathui thua vae lan khyh hae,” a cipya.Ref 22.7: 2Si 12.15
8 Ranpibawi lupi Hilkiah nynh ryaccinkhan Shafan kha, “Bawipaw inn kya kawbya ccauh kha ka muih vae,” a cipya. Hilkiah nynh ccauh kha pya zah, aning nynh a ria.
9 Te ryaccinkhan Shafan nynh siapharan kalan cceih zah, “Na ryalahtu hae nynh inn lungkhu umpaw phua kha marya lah hae zah, Bawipaw inn a do-oihpaw ryalahtu hae kuih kya a pya vae hae,” cite a hopya.
10 Ryaccinkhan Shafan nynh siapharan kha, “Ranpibawi Hilkiah nynh ccauh yn pya vae,” a cipya. Shafan nynh siapharan kha accae lante a riapya.
11 Siapharan nynh kawbya ccauh lungkhu e bya hae kha he a thae tuh, a boeining kha a seii.
12 Te siapharan nynh ranpibawi Hilkiah, Shafan ccapaw Ahikam, Mikaiah ccapaw Akhbor, ryaccinkhan Shafan te siapharan ryalahtu Asaiah kha kawpya hae zah,
13 “La cceih oh lah, muih athuapaw hynh-e ccauh lungkhu e bya hae te asekuh lante kamaw hanlan, ccungccaw hae hanlan te Judah hae balyn hanlan Bawipaw kha la khiatua oh; aening elang hynh-e ccauh kya azeikuhpaw bya hae balyn thyhte, ah minpaaw hae nynh la zui khyh hae zah la cyi khyh hae keiccuze aening tungvaw maee lang ruapaw Bawipaw thinrianaw tuh myaryamaw ale,” a cipya hae.
14 Tukeiccuze ranpibawi Hilkiah, Ahikam, Akhbor, Shafan te Asaiah tuh boeining nungnaw a do-oihtu Harhas ccapaw Tikvah a ccapaw Shallum zu profehnung Huldah kalan a cceih hae; tuh-e profehnung tuh Jerusalem khua Zakueh Ccangningnaw kya um zah, tuin kyakhe amaw kha tuanaw a ngia hae.
15 Aning nynh minmin kha, “Bawipaw , Israel Pachia nynh hynhte a ho: Ka kalan nanning ae saw oh paw ccungccapaw kha la hopah oh,
16 Bawipaw nynh hynhte a ho, Judah siapharan nynh a riapaw ccauh lungkhu e bya hae balyn thyhte, e hmin te a lungkhu um hae paw balyn tungvaw kya ronaw kha ka thuasah ccaccing cih.
17 Kae kha yn vua hae zah mih kuih te a raeku hae paw balyn khate ka thinriasah khylan ccangpaw pachia hae kalan khe silawnaw a rae vae hae, tukeiccuze hynh-e hmin elang ka thinrianaw tuh maee lang rua zah chih kho vae lan khyh.
18 Thuasalama Bawipaw kha byakhia khylan nanning ae sawtu oh paw Judah siapharan kha tuh hynhte na la hopah cih oh, Bawipaw , Israel Pachia nynh hynhte a ho: Na thaepaw bya konglang te,
19 e hmin te e kya um hae paw tuh arohpaw lang te thyalawnaw a teing hae paw lang a tang cih hae cite minmin rawsenaw bya ka hopaw kha he na thae te, na thinlung tuh ngaesikuh zah Bawipaw malang zakaw na sangsaku keiccu thuasah, na boeining na seii zah ka malang na raw keiccu thuasah kae nynh mah na bya kha kae thaepya vae, cite Bawipaw nynh a ci.
20 Tukeiccuze nang tuh na minpaaw hae kya kae sueluabua cih zah daebabi lan na shaw lungkhu sueluabua na thua cih; e hmin kya ka thuasah cih paw ronaw balyn kha na mit nynh muih lan khyh, a ci cite la hopah oh,” a cipya hae. Tuh-e bya tuh minmin nynh siapharan kalan a kikhae hae.