2
Elijah Vaawlang A Kae
Bawipaw nynh Elijah kha khiccung te vaawlang a hangthung dyn khe Elijah te Elisha tuh Gilgal khua kyate a cceih hae. Elijah nynh Elisha kha, “Hein kya la um; pawccecize Bawipaw nynh kae hynh Bethel kyacia ccia lan yn naw,” a cipya. Elisha nynh, “Bawipaw tuh a hiin thyhte, nang mah na hiin thyhte, nang kha kae cciataw lan khyh,” a cipya. Tukeiccuze Bethel lang a cceihbung hae. Bethel khua um hae paw profeh hae phu kheit tuh Elisha kalan oun cceih hae zah, “Bawipaw nynh na bawipaw kha atunin na kyate ccaring a lah cih cipaw na nyh tou?” a cipya hae. Te aning nynh, “Ou, ka nyh; daebabi lan um oh,” a cipya hae.
Elijah nynh, “Elisha, hein kya la um; pawccecize Bawipaw nynh kae hynh Jeriko lang ccia lan yn naw,” a cipya. Thuasalama Elisha nynh, “Bawipaw tuh a hiin thyhte, nang mah na hiin thyhte, nang kha kae cciataw lan khyh,” a cipya. Tukeiccuze minmin tuh Jeriko khua lang a cceih hae. Jeriko khua um hae paw profeh hae phu kheit tuh Elisha kalan oun cceih hae zah, “Bawipaw nynh na bawipaw kha atunin na kyate ccaring a lah cih cipaw na nyh tou?” a ci hae. Elisha nynh, “Ou, ka nyh; daebabi lan um oh,” cite a khung hae.
Tetuh Elijah nynh Elisha kha, “Hein kya la um; pawccecize Bawipaw nynh kae hynh Jordan vaw lang ccia lan yn naw,” a cipya. Thuasalama Elisha nynh, “Bawipaw tuh a hiin thyhte, te nang mah na hiin thyhte, nang kha kae cciataw lan khyh,” a cipya. Tukeiccuze mih lu ning mawte po a cceih hae. Jordan vaw pe parouhte a thadyn lya hae khe, a cceih buapaw profeh hae sung pangaw tuh minmin te hary asawkunaw khe a thadyn hae. Te Elijah nynh a angkiccua kha lawkuh zah a kue koute tui kha a bua; mih lu ning te laerou kalan a zua kou makhia hae, tui tuh voikheit lang voikheit lang thoh aphiakuh.
Vaw he a zua kou hae te, Elijah nynh Elisha kha, “Na kyate law ka thua maw, pawmou kae cyipah cih, yn hopah,” a cipya. Elisha nynh, “Na muisaw kha leit ning beih yn ccousah,” a cipya.Ref 2.9: Deu 21.17 10 Elijah nynh, “Nae ngiapaw tuh myarya aru; tuhzemah na kyate law ka thua lyakhe nae muih lan athua ze, tuh-e tuh na mue cih; nae muih khyh zetuh na mue lan khyh,” a cipya. 11 Ccia lalia te bya a hoku cciamang lya hae khe, maee marangle te maee marang nynh minmin lu ning kha thoh phia hae zah, Elijah tuh khiccung te vaawlang a kae. 12 Elisha nynh tuh-e tuh muih zah, “Apang, apang! Israel marangle hae te marang rhawkaw hae!” cite a sia. Tukoute vae tuh Elijah kha muih vae khyh, te a boeining kha kyng zah ccangning lang a seii.Ref 2.12: 2Si 13.14
Elijah koute Elisha
13 Te Elijah kyate yn ccahpaw angkiccua kha Elisha nynh a khuin, te ki zah Jordan vaw kin khe a thadyn. 14 Elijah kyate yn ccahpaw angkiccua kha lah zah tui kha bua zah, “Elijah Pachia, Bawipaw tuh teimou a um?” a ci. Tui kha he a bua te, tui tuh voikheit lang voikheit lang thoh phiakuh zah, Elisha tuh khuraw lang po a zua.
15 Jeriko khua kya um hae paw profeh hae phu kheit nynh asawnaw langte Elisha kha he a muih hae tuh, “Elijah muisaw tuh Elisha tungvaw kya a um,” a ci hae. Te amaw kha tungku khylan cceih hae zah a malang laekhu kya a bakhung hae. 16 Minmin nynh, “Dotua, na ryalahtu hae kaening kya athawsaepaw ccungccaw sung pangaw a um hae; minmin nynh cceih hae sah lah, na bawipaw kha a ccung nawlan hae kaw beih pya hae; Bawipaw muisaw nynh amaw kha hangthung zah mua ccangkhakheit vawlan tou, tuhkhyhze accya ccangkhakheit kya tou poh a sah kho,” a cipya hae. Elisha nynh, “Thua khyh, minmin kha saw nan oh,” cite a khung hae. 17 Thuasalama minmin nynh a mae phe thah lan cia a soihbia hae tuh, aning nynh, “Saw oh,” a cipya hae. Tukeiccuze ccungccaw sung pangaw kha saw hae zah, nin thum lungkhu amaw kha ccung hae zahmah muih khyh hae. 18 Jeriko khua a um ungpaw Elisha kalan oun ki hae zah, aning nynh minmin kha, “Cceih nan oh cite kae hopah khyh oh tou?” a cipya hae.
Elisha nynh Ngaeangnaw A Rae
19 Jeriko khuaccaaw hae nynh Elisha kha, “Dotua, ka bawipaw nynh na muih vae hawte, hynh-e khua a umnaw hmin tuh ahoy; thuasalama tui hoy khyh zah ram kya loohvoi khyh,” a cipya hae. 20 Elisha nynh, “Athawpaw pakekhupaw kya loi ruin oh lah, yn pya oh,” a cipya hae. Tukeiccuze minmin nynh tuh-e tuh a pya hae. 21 Te tui apounaw tuidy kalan cceih zah loi phing zah, “Bawipaw nynh hynhte a ho, e tui hynh ka thyaasah vae; atu te vae tuh chinaw thuasah, ccaaw ronaw thuasah hynh-e tui kyate pou vae lan khyh, a ci,” cite a ho. 22 Tukeiccuze Elisha nynh a ho thyhte, tuh-e tui tuh atunin cia athyaa.
23 Elisha tuh tuin kyate Bethel lang a cceihthung; a cciathung cciamang lyakhe khua lungkhu te pise imua hae beihtaraw oun toikuh hae zah, “Lu-opaw, la cceih ccavae! Lu-opaw, la cceih ccavae!” cite a sarya hae. 24 Aning nynh maeleihkuh zah he a muih hae te, Bawipaw min te thya a law hae. Te ramkaw langte vong api sa ning oun pou hae zah pise imua hae sung pali lu ning kha a tei hae. 25 Tuin kyate Karmel Mua lang a cceih, tukoute Samaria khua lang a ki.