15
Azariah nynh Judah A Uk
(2Sh 26.1-23)
1 Jeroboam nynh Israel siapharan lang a tangnaw kum kuin lae sarinaw kum khe, Amaziah ccapaw Azariah tuh Judah siapharan lang a tang takaw.
2 Aning nynh kum haw lae taruh a ci lyate ram kha uk takaw zah, Jerusalem kyate sung pangaw kum ning a uk. A nung min tuh Jekoliah cikuh zah Jerusalem khuanung nynh thua.
3 A paaw Amaziah nynh a cyi hawte Bawipaw muihnaw kya ahmepaw kha a cyi.
4 Thuasalama ahangpaw hmin hae kha roh khyh hae; ccungccaw hae nynh ahangpaw hmin hae vawlan khe silawnaw po rae hae zah mynkhuhpaw kha a u mamin hae.
5 Bawipaw nynh siapharan kha de a tah keiccuze a chih cia vaethya ccinaw kae zah taekhiate inn ccangpaw kya a um. Siapharan ccapaw Jotham nynh siapharan inn kha do-oih zah ram kya-e ccungccaw hae kha a uk hae.
6 Tuhlaepaw Azariah nynh rya a lawpaw te a cyipaw balyn kha Judah Siapharan hae Sherianaw Ccauh kya a zei hae.
7 Azariah tuh a minpaaw hae ryte ih hae zah, a minpaaw hae ryte David khua kya a uu hae; a ccapaw Jotham nynh amaw ccelang siapharan lang a tang.Ref 15.7: Isa 6.1
Zekhariah nynh Israel kha A Uk
8 Siapharan Azariah nynh Judah ram a uknaw sung thum kum taryanaw kum khe, Jeroboam ccapaw Zekhariah nynh Israel ram kha Samaria khua kyate sawpaw sah taruh a uk.
9 A minpaaw hae nynh a cyi hae hawte Bawipaw muihnaw kya hoyleinaw kha a rae. Nebat ccapaw Jeroboam nynh Israel hae a raesah hae paw seinaw hae kha cciataw khyh.
10 Jabesh ccapaw Shallum nynh phee zah ccungccaw zapi hae malang khe phe chih lan bua zah, tuh-e paw ccelang ram kha a uk.
11 Tuhlaepaw Zekhariah nynh a cyipaw kha Israel Siapharan hae Sherianaw Ccauh kya a zei hae.
12 E hynh Bawipaw nynh Jehu kya, “Na ccapaw hae nynh Israel bawitungkhung vawlan she pali cia a haung cih hae,” cite bya a kinpyaku thyhte acyihkuhpaw nynh thua.Ref 15.12: 2Si 10.30
Shallum nynh Israel A Uk
13 Judah siapharan Uzziah nynh ram a uknaw sung thum kum takuanaw kum khe, Jabesh ccapaw Shallum nynh Israel ram kha a uk takaw; aning nynh Samaria khua kyate sawpaw sah kheit a uk.
14 Te Gadi ccapaw Menahem tuh Tirzah khua kyate cceihthung zah Samaria khua a thua; aning nynh Jabesh ccapaw Shallum kha Samaria khua kya bua zah a theih koute tuh-e paw ccelang ram kha a uk.
15 Tuhlaepaw Shallum nynh a cyipaw te ccungccaw a pheenaw kha Israel Siapharan hae Sherianaw Ccauh kya a zei hae.
16 Tuh ccyh lyakhe Menahem nynh Tappuah khua te a lungkhu um hae paw balyn, Tirzah khua kyate tho zah Tappuah khua pepan um hae paw kha a ro hae; koikua a hungpya khyh hae keiccuze khua kha a ro. Ccaawpoipaw nopi hae balyn kha mih vue a pawsah hae.
Menahem nynh Israel A Uk
17 Judah siapharan Azariah nynh ram a uknaw sung thum kum takuanaw kum khe, Gadi ccapaw Menahem nynh Israel ram kha a uk takaw; aning nynh Samaria khua kya kum haw a uk.
18 Aning nynh Bawipaw muihnaw kya hoyleinaw kha a rae; Nebat ccapaw Jeroboam nynh Israel hae a raesah hae paw seinaw miakaw kha a she lungkhu balyn cciataw khyh.
19 Assiria siapharan Pul nynh Israel ram kha a dou; Menahem nynh a siapharan thungnaw a kyngpaw kha atyn kho nawlan, Pul kha ngun talent thong kheit a pya.
20 Assiria siapharan pya lanpaw phua tuh Menahem nynh Israel hae, mihoi hae balyn kha lu kheit ze ngun shekel sung pangaw ccite nangsete a ngia hae. Tukeiccuze Assiria siapharan tuh ki zah, tuin ram kya um khyh.
21 Tuhlaepaw Menahem nynh rya a lawpaw te a cyipaw balyn tuh Israel Siapharan hae Sherianaw Ccauh kya a zei hae.
22 Menahem tuh a minpaaw hae ryte ih hae zah, a ccapaw Pekahiah nynh amaw ccelang siapharan lang a tang.
Pekahiah nynh Israel A Uk
23 Judah siapharan Azariah nynh ram a uknaw kum sung pangawnaw kum khe Menahem ccapaw Pekahiah nynh Israel ram kha Samaria khua kyate uk takaw zah kum ning lungkhu a uk.
24 Aning nynh Bawipaw muihnaw kya hoyleinaw kha a rae; Nebat ccapaw Jeroboam nynh Israel hae a raesah hae paw seinaw hae kha cciataw khyh.
25 A rhawbawipaw Pekah, Remaliah ccapaw nynh Argob te Arieh ryte Gilead ccungccaw hae sung pangaw ryte Pekahiah kha phee hae zah, Samaria khua kya siapharan inn rhawlungrua koihkuhpaw lungkhu khe theih hae zah, Pekah nynh tuh-e paw ccelang ram kha a uk.
26 Tuhlaepaw Pekahiah nynh rya a lawpaw te a cyipaw balyn tuh Israel Siapharan hae Sherianaw Ccauh kya a zei hae.
Pekah nynh Israel A Uk
27 Judah siapharan Azariah nynh ram a uknaw sung pangaw kum ningnaw kum khe, Remaliah ccapaw Pekah nynh Israel ram kha Samaria khua kyate uk takaw zah, kum kuin lungkhu a uk.
28 Aning nynh Bawipaw muihnaw kya hoyleinaw kha a rae; Nebat ccapaw Jeroboam nynh Israel hae a raesah hae paw seinaw hae kha cciataw khyh.
29 Israel siapharan Pekah ccyh lyakhe Assiria siapharan Tiglath-pileser tuh yn thua zah Ijon, Abel-besh maakah, Janoah, Kedesh, Hazor, Gilead te Galilee, Naftali ram balyn kha a law; ccungccaw hae kha kyngte Assiria ram lang a cciakhae hae.
30 Uzziah ccapaw Jotham nynh Judah siapharan lang a tangnaw kum kuinnaw kum khe, Elah ccapaw Hoshea nynh Pekah kha phee zah a theih koute ram kha amaw nynh a uk.
31 Tuhlaepaw Pekah nynh rya a lawpaw te a cyipaw balyn tuh Israel Siapharan hae Sherianaw Ccauh kya a zei hae.
Jotham nynh Judah A Uk
(2Sh 27.1-9)
32 Remaliah ccapaw Pekah nynh Israel siapharan lang a tangnaw kum ningnaw kum khe, Judah siapharan Uzziah ccapaw Jotham nynh ram kha a uk takaw.
33 Aning tuh kum kuin lae pangaw acih te, ram kha uk takaw zah Jerusalem khua kya kum haw lae taruh a uk. A nung min tuh Jerusha cikuh zah Zadok ccanung nynh thua.
34 A paaw Uzziah nynh a cyi hawte Bawipaw muihnaw kya ahmepaw kha a cyi.
35 Tuhzemah ahangpaw hmin hae kha roh khyh hae; ccungccaw hae nynh ahangpaw hmin hae vawlan khe silawnaw po rae hae zah mynkhuhpaw kha a u mamin hae. Aning nynh Bawipaw inn thahlang sakoih kha a rae.
36 Tuhlaepaw Jotham nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.
37 Tuh ccyh lyakhe Bawipaw nynh Siria siapharan Rezin te Remaliah ccapaw Pekah kha Judah ram dou khylan a saw takaw hae.
38 Jotham tuh a minpaaw hae ryte ih hae zah, a minpaaw David khua kyakhe a minpaaw hae ryte a uukheih hae; a ccapaw Ahaz nynh amaw ccelang siapharan lang a tang.