14
Amaziah nynh Judah A Uk
(2Sh 25.1-24)
1 Joahaz ccapaw Joash nynh Israel siapharan lang a tangnaw kum ningnaw kum khe, Joash ccapaw Amaziah tuh Judah siapharan lang a tang takaw.
2 Ram a uk takaw lya tuh kum kuin lae pangaw acih vae, Jerusalem khua kya kum kuin lae takua a uk. A nung min tuh Jehoaddin cikuh zah Jerusalem khuanung nynh thua.
3 Aning nynh Bawipaw muihnaw kya ahmepaw kha a cyi, tuhzemah a minpaaw David hawte tuh thua khyh; atyn-are kya a paaw Joash nynh a cyi hawte a cyi.
4 Thuasalama ahangpaw hmin hae kha tuh roh khyh; ccungccaw hae nynh ahangpaw hmin hae vawlan khe silawnaw po rae hae zah mynkhuhpaw kha a u mamin hae.
5 Siapharan kawhoinaw kha a kuih kya tynkaring lan he a um takaw te, a paaw, siapharan a la theihtu hae a ryalahtu hae kha a chia hae.
6 Thuasalama Moses phungbya ccauh kyaze, “Ccaaw hae hanlan nungpaaw hae kha chia thua lan khyh hae, nungpaaw hae hanlan ccaaw hae kha chia thua lan khyh hae; mimaw seinaw hanlan rou nynh chia athua cih hae,” cite Bawipaw nynh kaw a pya thyhte, a theihtu hae paw mih ccaaw hae kha tuh theih khyh hae.Ref 14.6: Deu 24.16
7 Amaziah nynh Loi Accya kyakhe Edom hae kha thong haw a chia hae, Sela khua kha lah zah Jokthe-el cite minphu zah atunin cia a min lang a tang.
8 Amaziah nynh Israel siapharan, Jehu ccapaw Jehoahaz a ccapaw Jehoash kalan khe locceihtu hae saw hae zah, “Yn cceih lah, lu kheit te lu kheit hawiliakute doku tua sih,” a cipya.
9 Israel siapharan Jehoash nynh Judah siapharan Amaziah kalan byataw zah, “Lebanon mua e hinpawbu nynh Lebanon mua e sidar thingku kalan byataw zah, ‘Na ccanung kha ka ccapaw zu lang yn pya,’ a cipya; te Lebanon e loramsaw sa kheit nynh po a ccia lyakhe hinpawbu kha a syde.
10 Edom ram kha na tae ccaccing zah, na thinlung na hangsakuh vae. Na phu-enaw khate na lungryachikhaekuh sah lah, innvaw khe zya um; pawccecize namaw te Judah ram tuh khuliaku khylan pawccemou vawsawnaw kha na ccungku?” a cipya.
11 Thuasalama Amaziah nynh ngae ry khyh. Tukeiccuze Israel siapharan Jehoash tuh cceih zah, Judah ram Beth-shemesh kyakhe Judah siapharan Amaziah te hawiliakute rhaw a tukkuh hae.
12 Israel nynh Judah kha tae zah, mih inn raveih lang pong a ccue hae.
13 Israel siapharan Jehoash nynh Judah siapharan Amaziah kha Beth-shemesh kyakhe a kyng; Amaziah tuh Jehoash ccapaw, Jehoash tuh Ahaziah ccapaw nynh thua; te Jerusalem lang cceih zah Jerusalem khualungrua kha Efraim Koikua kyate Apaki Koikua kyacia dong za pali a ro.
14 Bawipaw inn kya a umpaw te siapharan inn e sisuainn kya a umpaw miakaw sui, ngun te angphe balyn kha lah zah, rhaw hae nynh a la kyng hae paw ccungccaw hae ryte Samaria khua lang a ki.
15 Tuhlaepaw Jehoash nynh a cyipaw, a thungnaw te Judah siapharan Amaziah a tuknaw kong kha Israel Siapharan hae Sherianaw Ccauh kya a zei hae.
16 Jehoash tuh a minpaaw hae ryte ih hae zah, Israel siapharan hae ryte Samaria khua kya a uu hae; te a ccapaw Jeroboam nynh amaw ccelang siapharan lang a tang.
17 Judah siapharan Joash ccapaw Amaziah tuh Israel siapharan Jehoahaz ccapaw Jehoash a chih koute kum haw lae pangaw a hiin ung.
18 Tuhlaepaw Amaziah nynh a cyi hae paw kha Judah Siapharan hae Sherianaw Ccauh kya a zei hae.
19 Jerusalem khua kya Amaziah kha phee hae zah Lakhish khua lang a ccue. Lakhish khua lang ccungccaw deehuisah hae zah, tuin kya a chia hae.
20 A rhua kha marang te Jerusalem lang phusah hae zah, a minpaaw hae ryte David khua khe a uukheih hae.
21 Judah ccungccaw hae balyn nynh kum haw lae taruh acih vae paw Amariah kha ko hae zah, a paaw Amaziah ccelang siapharan lang a khang hae.
22 Siapharan Amaziah tuh a minpaaw hae ryte a ih kou hae te, Amariah nynh Elath khua kha raethui zah Judah ram lungkhu lang bua a nung.
Jeroboam II nynh Israel A Uk
23 Joash ccapaw Amaziah tuh Judah siapharan lang a tangnaw kum haw lae pangawnaw kum khe, Joash ccapaw Jeroboam tuh Israel siapharan lang tang zah Samaria khua kyate ram kha a uk takaw; aning nynh sung pali kum kheit a uk.
24 Aning nynh Bawipaw muihnaw kya hoyleinaw kha rae zah, Nebat ccapaw Jeroboam nynh Israel hae a raesah hae paw seinaw balyn kha cciataw khyh.
25 Bawipaw , Israel Pachia nynh a ryalahtu Gath-hefer khuapaw Amattai ccapaw, profeh Jonah kyate a la hopaw bya thyhte, aning nynh Israel ram kha Hamath khua teenaw kyate Arabah Rili kyacia bua a law.Ref 14.25: Jon 1.1
26 Pawccecize Israel hae nynh a teing hae paw riathaenaw tuh myarya accih cipaw kha Bawipaw nynh a muih; kyngpaw ccungccaw thuasah, a luepaw thuasah Israel a bawm lanpaw lu kheit san um vae khyh.
27 Thuasalama Bawipaw nynh Israel min kha vaawlui zakaw te ka thee cih cite ho khyh, tukeiccuze Joash ccapaw Jeroboam kuih khate a khum hae.
28 Tuhlaepaw Jeroboam nynh rya a lawpaw, a cyipaw balyn te a thungnaw, rhaw a tuknaw, Judah kya-e a la thuapaw Damaskas te Hamath khua hae kha Israel elang pawtemou bua a law cipaw kha Israel Siapharan hae Sherianaw Ccauh kya a zei hae.
29 Jeroboam tuh Israel siapharan hae, a minpaaw hae ryte a ih hae; te a ccapaw Zekhariah tuh a paaw ccelang siapharan lang a tang.