13
Jehoahaz nynh Israel A Uk
Ahaziah ccapaw Joash nynh Judah siapharan lang a tangnaw kum kuin lae thumnaw kum khe, Jehu ccapaw Jehoahaz nynh Israel ram kha Samaria khua kyate a uk takaw; aning nynh kum haw lae sari a uk. Bawipaw muihnaw kya hoyleinaw kha a rae, Nebat ccapaw Jeroboam nynh Israel hae a raesah hae paw seinaw hae kha cciataw leite a zui. Bawipaw thinrianaw tuh Israel tungvaw maee lang rua zah, Siria siapharan Hazael te Hazael ccapaw Benhadad kuih kalan Israel hae kha atu te atu a pya hae. Te Jehoahaz nynh Bawipaw kha ngia zah, Bawipaw nynh a thaepya; pawccecize Siria siapharan nynh Israel hae kha tuaasah hae zah, tuaasahkunaw a teingnaw hae kha aning nynh a muih. Tukeiccuze Siria hae kuih kyate a lue nawlan hae, Bawipaw nynh Israel kha khumtu a pya; Israel ccungccaw hae tuh langmawlya hawte mimaw inn kya khua a sah hae. Thuasalama Jeroboam nynh Israel a raesahpaw Jeroboam ciihan seinaw kha cciataw leite a zui hae; Asherah zohtuh kha mah Samaria khua kya a um ung. Tukeiccuze Jehoahaz a rhawkaw hae tuh marang rhawkaw sung pangaw, marangle ccanghaw te ccu rhawkaw thong haw laeze alung lan um vae khyh hae; pawccecize Siria siapharan nynh minmin kha roh hae zah huimin kya-e vuiping hawte a syde hae. Tuhlaepaw Jehoahaz nynh rya a lawpaw, a cyipaw balyn te a thungnaw tuh Israel Siapharan hae Sherianaw Ccauh kya a zei hae. Jehoahaz tuh a minpaaw hae ryte ih hae zah, Samaria khua kya a uu hae; a ccapaw Joash nynh amaw ccelang siapharan lang a tang.
Jehoash nynh Israel A Uk
10 Judah siapharan Joash nynh Judah ram a uknaw sung thum kum sarinaw kum khe, Jehoahaz nynh Israel ram kha Samaria khua kyate a uk takaw; aning nynh kum haw lae taruh a uk. 11 Aning nynh zemah Bawipaw muihnaw kya hoyleinaw kha a rae; Nebat ccapaw Jeroboam nynh Israel hae a raesah hae paw seinaw balyn kha cciataw leite a zui hae. 12 Tuhlaepaw Joash nynh rya a lawpaw te a cyipaw balyn, Judah siapharan Amaziah a dou lya-e a thungnaw tuh Israel Siapharan hae Sherianaw Ccauh kya a zei hae. 13 Joash tuh a minpaaw hae ryte ih hae zah, a bawitungkhung kya Jeroboam nynh a haung; Joash tuh Israel siapharan hae ryte Samaria khua kya a uu hae.
Elisha Chinaw
14 Elisha tuh a chisah cih paw ccinaw te he a ccih tuh, Israel siapharan Joash nynh ccianua zah a malang khe rah zah, “Apang, apang! Israel marangle hae te a marang rhawkaw hae!” cite a sia.Ref 13.14: 2Si 2.12 15 Elisha nynh amaw kha, “The te li yn lah,” cipah zah, aning nynh the te li kha a law. 16 Te Elisha nynh Israel siapharan kha, “Li kha sue,” cipah zah, aning nynh li kha a sue. Elisha nynh a kuih kha siapharan kuih vawlan a khang. 17 Te Elisha nynh, “Nithua lang e thanlan-aw kha hung,” cipah zah, aning nynh a hung. Elisha nynh, “Kaw” cipah zah a kaw. Te aning nynh, “Bawipaw kya-e taenaw the, Siria taenawpaw the! Pawccecize Afek khua e Siria hae kha phe thang lan na tuk cih hae,” a cipya. 18 Te Elisha nynh po ho zah, “The hae kha lah hae,” cipah zah aning nynh a law. Israel siapharan kha, “Khah-e hae khate laephi kha bua,” cipah zah, aning nynh vae thum a bua koute a umtaw. 19 Tetuh Pachia ccungccapaw tuh aning tungvaw a thinria zah, “Vae pangaw, vae taruh cia na bua lanpaw khaw athua; tuhcite na bua zetuh Siria hae kha phe thang lan na tae cih hae, thuasalama atu tuh Siria hae kha vae thum cia kyalya na tae cih hae,” a cipya.
20 Elisha tuh chih zah a uu hae. Moab ccungccaw aphu hae nynh Israel ram kha hawnin ccyh lyakhe leih a thiing hae. 21 Ccungccapaw lu kheit a uu lya hae khe, ccungccaw hoylei hae paw phu kheit kha muih hae zah, tuh-e michi rhua tuh Elisha shaw lungkhu lang a vua hae; tuh-e paw nynh Elisha ru kha he a ty miakaw te, hiinthui zah a thadyn.
Israel nynh Khua hae A Lawthui
22 Siria siapharan Hazael nynh Jehoahaz she lungkhu balyn tuh Israel kha a tuaa a sah. 23 Thuasalama Bawipaw nynh minmin kha thawccih hae zah ngaethya a umsah hae; Abraham, Isak te Jakob kya a la raepaw a byakinnaw keiccuze minmin kalan khe maekuh zah minmin kha roh khyh hae, amaw malang te atu cia dee khyh hae.
24 Siria siapharan Hazael he a chih te, a ccapaw Benhadad nynh amaw ccelang siapharan lang a tang. 25 Hazael nynh tuk zah Jehoash a paaw Jehoahaz kuih kyate a la lawpaw khua hae kha Jehoahaz ccapaw Jehoash nynh Hazael ccapaw Henhadad kuih kyate bua a law. Joash nynh Benhadad kha vae thum cia tae zah Israel khua hae kha bua a law.