11
Athaliah nynh Judah A Uk
(2Sh 22.10—23.15)
1 Ahaziah a nung Athaliah nynh a ccapaw a chipaw kha he a nyh tuh, thokuh zah siapharan innbyn hae balyn kha a chia hae.
2 Thuasalama siapharan Joram ccanung, Ahaziah ccianung nynh Ahaziah ccapaw Joash kha chia athua vae cih hae paw siapharan ccaaw hae kyate zya ruh zah amaw te a do-oihtu kha inaw khaan kya a thuruh hae. Tuhcite amaw kha chia athua khyh nawlan, Athaliah kyate zya a thuruh;
3 Athaliah nynh ram a uk lungkhu balyn, Joash tuh Jehosheba ryte kum taruh lungkhu Bawipaw inn kya a rekuh hae.
Jehoiada nynh Imua Joash Chitui A Thuh
4 Kum sarinaw kum khe ranpibawi Jehoiada nynh Karet ccungccaw hae kya-e rhawbawi hae, rhawviatu hae kya-e rhawbawi hae kha amaw kalan Bawipaw inn lang a kosah hae. Minmin ryte byakinnaw rae zah Bawipaw inn kyakhe bya a kinsaku hae; te siapharan ccapaw kha a muihsah hae.
5 Jehoiada nynh, “Hynhte na cyih cih oh: sabbath nin kya rya na hoi oh paw nanning laku e pum thum pum kheit nynh siapharan inn kha na ngaw cih oh,
6 (ccangpaw pum kheit nynh Sur sakoih kya na ngaw cih oh zah ccangpaw pum thum pum kheit nynh rhawviatu hae nulang umpaw sakoih kyakhe na ngaw cih oh); tuhcite siapharan inn kha na ngaw cih oh;
7 sabbath nin kya rya na hoi lei oh paw phu ning nynh siapharan kha thungkhaw khylan Bawipaw inn kha na ngaw cih oh,
8 zunghe ccarou ccyngkute siapharan kha na koihlu cih oh; te a koihlutu rhawkaw hae kalan yn naekuhpaw miakaw tuh chia athua cih. Siapharan nynh a pou a tee vae ze, tyty na zui cih oh,” a cipya hae.
9 Ranpibawi Jehoiada nynh kaw a pya hae thyhte rhawbawi hae nynh marya a cyi hae; minmin lu kheit cci nynh sabbath nin kya rya a hoi cih lei hae paw mih ccungccaw hae te sabbath nin kya rya a hoi cih hae paw mih ccungccaw hae kha cciakhae hae zah ranpibawi Jehoiada kalan ccarou a thuakhae hae.
10 Bawipaw inn kya umpaw ccoi hae te khawriaphua hae kha ranpibawi nynh rhawbawi hae kalan a pya hae;
11 rhawviatu hae tuh zunghe ccarou ccyngkute siapharan kha voikheit voikheit langte thungkhaw khylan, silawhang te beikinn kha po voilu lan alia te palung cia a thadyn hae.
12 Te ranpibawi nynh siapharan ccapaw kha yn poukhae zah bawilukhung khungsah zah byakinnaw ccauh kha a pya; siapharan lang khang hae zah chitui a thuh hae; mih kuihbia hae zah, “Siapharan tuh a hiinshe sae vae sah!” cite a sia hae.
Athaliah Chinaw
13 Rhawviatu hae roi te ccungccaw hae roi kha Athaliah nynh he a thae tuh, Bawipaw inn lungkhu lang ccungccaw hae kalan a tee;
14 he a do tuh, aphung thyhte siapharan tuh tungpi pe thadyn zah, rhawbawi hae te mungkae tu hae paw tuh siapharan pe um hae zah, ram lungkhu e ccungccaw balyn tuh mih lungpaw zah mungkae a tu hae paw kha a muih. Athaliah nynh a boeining kha seii zah, “Pheekunaw nynh thua! Pheekunaw nynh thua!” cite a sia.Ref 11.14: 2Si 23.3
15 Rhawkaw hae uktu lang khang athua hae paw rhawbawi hae kha Jehoiada nynh, “Aning hynh rhawkaw hae laku kyate poukhae oh, amaw a zuipaw miakaw kha thaloi te theih oh,” a cipya hae. Pawccecize ranpibawi nynh, “Bawipaw inn lungkhu kya amaw kha chia thua nan sah,” a ci.
16 Tukeiccuze minmin nynh a kyng hae; te siapharan inn lang teenaw marang sakoih kyate poukhae hae zah tuin kya a chia hae.
17 Jehoiada nynh minmin tuh Bawipaw ccungccaw athua nawlan hae, Bawipaw te siapharan te ccungccaw zapi hae laku kya byakinnaw kha a rae; siapharan te zapi hae laku kya mah a rae.
18 Te ramccungccaw hae balyn nynh Baal beikinn kha ccianua hae zah a ro hae; a silawhang hae, a zohtuh hae kha palae tui lan koi hae zah Baal ranpibawi Mattan kha silawhang hae malang khe a chia hae. Ranpibawi nynh Bawipaw inn kya rhawviatu hae kha a nung hae.
19 Aning nynh rhawbawi hae, Karet ccungccaw hae, rhawviatu hae te ramccungccaw hae balyn kha a cciakhae hae; te minmin nynh siapharan kha Bawipaw inn kyate siapharan inn langkhe rhawviatu hae sakoih kyate a cciakhae hae. Te siapharan hae kya-e bawitungkhung kyakhe Joash kha a haungsah.
20 Tukeiccuze ramccungccaw hae balyn tuh mih lungpaw; Athaliah kha thaloi te siapharan inn kya a theih kou hae te tuh, khuapi kya daenaw a um vae.
21 Joash tuh kum sari acih te, ram kha a uk takaw.