10
Ahab Ciihan hae Chianaw
1 Ahab nynh Samaria khua kya ccapaw hae sung sari a hoi. Tukeiccuze Jehu nynh ccaw zei zah Jezreel khua uktu hae, piccan hae te Ahab ccapaw hae a do-oihtu hae a umnaw hae Samaria khua langkhe ccaw ky hae zah,
2 “Nae bawipaw ccapaw hae tuh nae kya um hae zah, marangle hae, marang hae, koihpaw khua hae te zunghe hae mah nae kya a um hae keiccuze,
3 nae bawipaw ccapaw hae kyaze asung-e huaccepaw kha po oh lah, a paaw bawitungkhung kya haungsah oh lah, nae bawipaw ciihan elang rhawtukpah oh,” a cipya hae.
4 Minmin nynh myarya rih hae zah, “Dotua oh, siapharan hae lu ning tuh amaw malang thadyn kho khyh hae, pawtemou aening nynh ah thadyn kho cih oh?” a ci hae.
5 Tukeiccuze siapharan inn do-oihtu, khua a uktu, piccan hae te imua do-oihtu hae nynh Jehu kha byataw hae zah: “Kaening tuh na ryalahtu hae nynh kae thua; na hopaw miakaw kae cyih cih. Humhung mah siapharan lang kae khangkuh lan khyh; ahoy na ci hawte cyih ccaleih,” a cipya hae.
6 Te Jehu nynh minmin kalan vae ningnaw ccaw zei zah, “Kamaw kalan na pan oh zah, ka bya na ngae oh zetuh, nae bawipaw a ccapaw hae lu kha pae oh lah, awkhualan atu ccyh kya ka kalan Jezreel khua lang oun cceih oh,” a cipya hae.
7 Tuh-e ccaw tuh minmin kya he a thua te, siapharan ccapaw hae kha ko hae zah milu sung sari a chia hae; mih lu hae kha shua kya sang hae zah, Jezreel khua lang Jehu kalan a ky hae.
8 Locceihtu hae tuh oun thua hae zah, “Siapharan ccapaw hae lu kha oun thuakhae vae hae,” cite hopah hae zah, Jehu nynh, “Koikua teenaw kyakhe awkhualan awkhua cia san ning lang pum oh,” a cipya hae.
9 Awkhualan awkhua khe Jehu tuh he a pou te, thadyn zah ccungccaw hae balyn kha, “Nanning tuh seinaw na hoi khyh oh. Ka bawipaw a pheetu te a theihtu tuh kamaw nynh ka thua; thuasalama hynh-e hae balyn hynh hum nynh mou a theih hae?
10 Bawipaw nynh Ahab ciihan te asekuh lante a hopaw Bawipaw bya tuh ccangkheit sanmah laephi kalan ccah lan khyh cipaw nyh oh; pawccecize Bawipaw nynh a ryalahtu Elisha kyate a hopaw kha a cyi vae,” cite a hopya hae.
11 Tukeiccuze Jezreel khua kya a laehypaw Ahab ciihan hae balyn, a kuihkaw e bawi hae, a ruiban hoypaw hae te ranpibawi hae kha lu kheit san hiin leite a chia hae.Ref 10.11: Hos 1.4
12 Te thokuh zah Samaria lang a cceih. Laanpi kya Tuurin hae hmin Beth-eked kya he a thua tuh,
13 Judah siapharan Ahaziah puizia hae ryte tungkuh hae zah, Jehu nynh, “Hum hae mou na thua oh?” cite khia hae zah, minmin nynh, “Ahaziah puizia hae nynh kae thua; siapharan ccapaw hae te siapharannung a ccapaw hae kha tungku khylan nynh kae ccia,” a cipya hae.
14 Jehu nynh, “Minmin hynh ahiinte kyng oh,” a cipya hae. Minmin kha ahiinte kyng hae zah Beth-eked hunghua kyakhe mih balynte sung pali lu ning a chia hae; aning nynh lu kheit sanmah hiin khyh hae.
15 Tuin kyate he a cceih te, Rekhab ccapaw Jehonadab tuh amaw te tungku khylan yn cceih; Jehu nynh byabeih zah, “Ka thinlung tuh na tungvaw ading hawte, nang na thinlung so ka tungvaw ading tou?” cite khia zah, Jehonadab nynh, “Ou, ading,” a cipya. Jehu nynh, “Athua lanze, na kuih kha yn pya,” a cipya. Tukeiccuze a kuih kha pya zah, Jehu nynh amaw kalan marangle lungkhu lang a suebua.
16 Jehu nynh, “Ka kya cceihbua lah, Bawipaw elang ka lungthawsaenaw hynh dobua tua,” a cipya. Tukeiccuze a marangle kya a ccisaku bua.
17 Samaria khua he a thua te, Bawipaw nynh Elijah kya a hopaw a bya thyhte, Samaria khua kya Ahab ccungccaw a hiinhy hae paw miakaw kha mih cii phe mih lan a chia hae.
Baal Beik hae paw Chianaw
18 Te Jehu nynh ccungccaw balyn kha pum hae zah, “Ahab nynh Baal kha beihtaraw kyalya rya a lawpya; thuasalama kae, Jehu nynh rya patae ka lawpah cih.
19 Tukeiccuze Baal profeh hae balyn, a beiktu hae balyn te a ranpibawi hae balyn kha ka kalan oun ko oh; lu kheit sanmah mesei nan oh, pawccecize Baal elang myarya lepaw silawnaw kha ka raepah cih; mesei athuapaw miakaw tuh hiin lan khyh,” a ci. Thuasalama Jehu nynh Baal a beik hae paw kha chiathya nawlan a phee hae paw nynh thua.
20 Jehu nynh, “Baal elang athyaapaw pumkunaw kha rae oh,” cite kaw a tho. Tukeiccuze tuh-e tuh a thaesah hae.
21 Jehu nynh Israel ram pynpi kya byataw hae zah, Baal a beikpaw miakaw tuh khaleih a thua hae, a thua leipaw lu kheit san um khyh. Baal beikinn lungkhu lang tee hae zah, Baal beikinn tuh voikheit lang te voikheit lang cia phe abeih hae.
22 Jehu nynh boeining nungnaw a do-oihtu kha, “Baal a beik hae paw balyn elang boeining hae kha yn thuaa hae,” cipah zah, aning nynh a thuaapya hae.
23 Te Jehu tuh Rekhad ccapaw Jehonadab ryte Baal beikinn lungkhu lang tee hae zah, “Nanning laku kya Bawipaw a beikpaw lu kheit san a um khyh nawlan ccungtua oh, Baal a beikpaw kyalya um hae sah,” a ci.
24 Te silawnaw hae te maee-ute silawnaw hae kha rae khylan a tee hae.
Jehu nynh ccungccaw sung tarya kha atolang khe nung hae zah, “Nae kuih kya kae pya oh paw hynh-e hae lukhakheit a luesahpaw ccungccaw tuh a hiinnaw a shung cih,” a cipya hae.
25 Maee-ute silawnaw kha he a thangsah takaw te, Jehu nynh rhawviatu hae te bawi hae kha, “Tee oh lah, theih oh; lu kheit sanmah luesah nan oh,” a cipya hae. Tukeiccuze minmin nynh thaloi te a bae hae. Rhawviatu hae te bawi hae nynh minmin kha atolang vua hae zah, Baal beikinn alungkhu lang e akhaan kalan a tee hae.
26 Baal beikinn lungkhu umpaw zohtuh hae kha lah hae zah maee te a soi hae.
27 Baal zohtuh te Baal beikinn kha roh hae zah, ia-inn lang atunin cia a mang hae.
28 Tuhcite Jehu nynh Baal kha Israel ram kyate a maemih.
29 Thuasalama Nebat ccapaw Jeroboam nynh Israel hae kha seinaw a raesahnaw hae paw sui vaetuataw hae, Bethel khua te Dan khua a um hae paw kha Jehu nynh vua khyh.Ref 10.29: 1Si 12.28-30
30 Bawipaw nynh Jehu kha, “Ka muihnaw kya ahmepaw kha hoyte na cyih zah, ka thinlung kya a umpaw balyn thyhte Ahab ciihan hae kya na cyi keiccuze na ccapaw hae tuh she pali cia Israel bawitungkhung kya a haung cih hae,” a cipya.
31 Thuasalama Jehu nynh Bawipaw Israel Pachia kawbya kha a thinlung balyn te zui lan raeringkuh khyh; Jeroboam nynh Israel hae a raesah hae paw seinaw kha vua khyh.
Jehu Chinaw
32 Tuin ccyh lyakhe Bawipaw nynh Israel ram abang kha a aw bang. Hazael nynh Israel ram kha:
33 Jordan vaw nithua lang, Gilead ram abalyn, Gad phin hae, Reuben phin hae te Manasseh phin hae ram, Arnon Vaw pe umpaw Aroer khua kyate Gilead ram te Bashan ram kyacia a tae.
34 Tuhlaepaw Jehu nynh rya a lawpaw, a cyipaw balyn te a huhan balyn tuh Israel Siapharan hae Sherianaw Ccauh kya a zei hae.
35 Jehu tuh a minpaaw hae ryte ih hae zah Samaria kya a uu hae. A ccapaw Jehoahaz nynh amaw ccelang siapharan lang a tang.
36 Jehu nynh Samaria khua kyate Israel ram kha kum kuin lae tarya a uk.