7
Solomon Inn te Ccangpaw Inn hae
Solomon nynh amaw inn kha kum haw lae thum lungkhu sak zah, a inn kha abalyn mawte a lyn.
Lebanon Tuhpi Inn a ci hae paw kha sak zah, asaepaw dong za kheit, akopaw dong sung pangaw, ahangpaw dong sung thum acih; tuh-e inn tuh tang pali lang bingpaw sidar thingtung hae te tuh-e tung hae kya huepaw sidar thingccaw hae khate a sak. Tang kheit kyaze tung haw lae pangaw cci um zah, tung sung pali tung pangaw vawlan umpaw dawnawpaw accaw hae vawlan khe sidar thing te a daw hae. Tang thum kyakhe thanlan-aw accaw hae um hae zah, ccangkheit te ccangkheit tuh tang thum kyakhe a hawiliakuh hae. Thuakaw hae te thanlan-aw hae balyn tuh apaki ki pali umpaw thua hae zah, tang thum kyakhe ccangkheit te ccangkheit a hawiliakuh hae.
Tungpi Khaan a ci hae paw kha rae zah, tuh-e tuh dong sung pangaw sae zah dong sung thum ako. Tung hae malang khe zekaw taraw um zah, tuh-e hae malang khe zokhawboei a um.
Bawitungkhung Khaan a ci hae paw kha a rae, byapianaw lanpaw thua zah Byading Khaan cite mah acikuh, suarui ccangkheit kyate ccangkheit kyacia sidar thing te a daw hae.
Solomon a umnaw lanpaw inn, Byading Khaan anulang a umpaw kha mah tuhmaminte a sak hae. Zu lang a dykupaw Faro ccanung elang inn kha mah tuh-e Byading Khaan hawte a sakpya.Ref 7.8: 1Si 3.1
E inn hae balyn tuh atolang te voidu lepaw kyacia, aleihpaw kyate adung kyacia amee rupaw lung te a sak hae; lung hae tuh tounawpaw te tou thyhte awpaw, nulang malang thing-aw te awpaw nynh thua hae. 10 Inn aleihpaw e lung tuh dong tarya te dong haw sae zah, amee rupaw lung lepaw nynh thua hae. 11 A vawlan khe amee rupaw lung, tounawpaw te tou thyhte raepaw lung te sidar thing a um hae. 12 Voidu lepaw tuh cyithuipaw lung thyh thum, sidar thingccaw thyh kheit te po voilu lan koihpaw nynh thua; Bawipaw inn alungkhu lang e voidu te tuh-e inn tee takawnaw khaan kha tuhmaminte a rae hae.
Hiram A Ryalaw
13 Solomon Siapharan nynh Tair khua umpaw Hiram kha byataw zah a ko. 14 Aning tuh Naftali phin nomaenung ccapaw thua zah, a paaw tuh Tair khuapaw a kuihhae hoypaw nynh thua; aning tuh sohin raenaw kya a puakuhpaw, hawnaw te nythyanaw a hoipaw nynh thua. Solomon kalan cceih zah a rya miakaw kha a lawpya.
15 Hiram nynh sohin tung tungning kha sohin te a laee. Tung tungkheit tuh dong haw lae tarya hang zah, dong haw lae ning asaepaw arui te a voi; tung ningnaw tuh mah tuhmaminte a cyi. 16 Tung dung kya nung lanpaw tunglukhung ccangning kha sohin te a rae; tuh-e ccangkheit tuh dong pangaw hang zah, ccangpaw ccangkheit mah dong pangaw ahang. 17 Tung dung hae kya umpaw tunglukhung hae elang miabu hawte akhelekuhpaw sohinrui hae kha a rae; tunglukhung ccangkheit cci hanlan tuh-e akhelekuhpaw ccangsari cci kha a rae. 18 Tung vawlan umpaw lukhung a vawlan khe, tuh-e lukhung ccangkheit elang sohin ccalee thae atang tang ning kha a rae; ccangpaw lukhung elang mah tuhmaminte a rae. 19 Tee takawnaw khaan kya-e tung hae dung a bongpaw lukhung hae tuh lili haetapaw te lokuh zah dong pali ahang. 20 Tuh-e lukhung hae tuh atung tung ning vawlan te miabu hawte akhelekuhpaw pe umpaw athualaepaw vawlan khe a um hae; tung dung ccangkheit kyaze ccalee thae za ning ccite atang po voilu lante a um hae. 21 Tung hae tuh beikinn tee takawnaw khaan kyakhe a bing hae; alia langsang khe tung kha bing zah Jakhin cite min a phu; thahlang sang khe mah tung kha bing zah Boaz cite min a phu. 22 Tung dung hae vawlan khe lili haetapaw alo lante a rae; tuhcite tung ryalaw kha a lyn.
23 Te sohin tuikua kha apyng lante rae zah, voikheih lang arae te voikheih lang arae tuh dong haw sawkuh zah, dong pangaw ahang. Po voilu lan tou lanze dong sung thum acih. 24 Tuikua arae zakaw khe po voilu lante dong kheit ze tui-ung ccanghaw ccite tui-ung atang tang ning kha tuikua po voilu lan sohin te a laee. 25 Tuh-e tuikua tuh tangnuapaw sa haw lae ning vawlan khe a um, tangnuapaw hae sa thum tuh thahlang, sa thum tuh niccaw lang, sa thum tuh alia lang, sa thum tuh nithua lang a hawi hae. Tuikua tuh mih tungvaw khe um zah, atolang khe pong a hawi hae. 26 Tuikua tuh zapae thaw zah, arae tuh banang rae hawte thua zah, lili haetapaw te alokuh; tuikua tuh tui kha bath thong ning accawng.
27 Te Hiram nynh sohin le ccanghaw a rae; le ccangkheit tuh dong pali asae, dong pali ko zah dong thum ahang. 28 E hynh tuh-e le pungsan raenaw nynh thua: le hae tuh po voilu lante atang hoi hae zah, tuh-e atang hae tuh tung hae laku kya nynh a um hae; 29 tuh-e tung hae laku umpaw atang hae kyakhe chindeih hae, tangnuapaw hae te cherubim zuh kha a rae hae. A tung kyakhe mah chindeih hae te tangnuapaw hae zuh mih vawlan te mih zakaw khe haetapawsi zuh a um. 30 Le ccangkheit cci nynh sohin leccu ccangpali ccite sohin leccaw a hoi hae; pakepi khang nawlan apaki ki pali kyakhe a doutu um hae zah, tuh-e hae tuh haetapawsi hae ryte mih umnaw raveih khe a ccaande hae. 31 Zalung pake arae tuh dong kheit ko; aleihpaw hawte pyng zah dong kheit lae angankuh acih. Arae kyakhe deihthuite ccaanpaw a um hae; atang hae tuh apaki ki pali um zah pyng khyh. 32 Leccu ccupali tuh atang hae zakaw um hae zah, leccaw hae tuh le kaw khe a um hae; leccu tuh dong kheit lae angankuh ahang. 33 Leccu tuh marangle ccu hawte rae athua; leccaw hae, leccu khu arae hae, accu kya bingpaw ccungngue hae te accu kya bingpaw ccungngue a khawtu hae balyn kha sohin te a laee hae. 34 Le apaki ki pali kyakhe dounawpaw ccangpali cci um hae zah, le te po kyngkuh hae. 35 Le adung khe khaw kheit acihpaw sohin pyngkalynpaw a um; le dounawpaw te atang hae tuh le te po kyngkuh hae. 36 Dounawpaw hae te atang hae tuh cherubim, chindeih te ungcci ku zuh te a ccaan hae; accawnghannaw miakaw kyakhe haetapaw zuh kha a soi hae. 37 Tuhcite le ccanghaw kha a rae; mih balyn mawte a muinsan te adi-ale pong lokuh lante a laee hae.
38 Hiram nynh pakepi ccanghaw kha sohin te a rae; tuh-e zalung ccangkheit cci tuh dong pali ko zah, bath sung pali cci accawng. Le ccanghaw hae tuh ccangkheit cci kya pakepi ccangkheit cci kha a um.Ref 7.38: Exo 30.17-21 39 Beikinn alia langkhe le ccangpangaw nung zah, thahlang khe le ccangpangaw a nung; tuikua kha inn nithua-alia lang apaki khe a nung.
40 Hiram nynh ang hae, buhhawlua hae te pakepi hae kha a rae hae. Tuhcite Hiram nynh Solomon Siapharan elang Bawipaw inn kyakhe rya balyn kha a lyn. 41 Tuh-e hae tuh: tung tungning, tung dung kya umpaw tunglukhung ccangning, tung dung hae kya umpaw tunglukhung hae bong lanpaw miabu hawte akhelekuhpaw hae, 42 tung vawlan umpaw tunglukhung ccangning kha a bong lanpaw miabu ccangning elang ccalee thae za pali, tuh-e miabu ccangkheit cci elang ccalee thae atang tang ning, 43 le ccanghaw, le vawlan umpaw pakepi ccanghaw, 44 tuikua ccangkheit te tuikua kaw umpaw tangnuapaw ahaw lae ning nynh thua.
45 Ang hae, buhhawlua hae, pakepi hae, e hae balyn hynh Hiram nynh Bawipaw inn hanlan Solomon Siapharan elang awrarihpaw sohin te a raepya. 46 Jordan accya, Sukkoth te Zarethan laku umpaw anglae laephi kyakhe siapharan nynh e hae hynh a laee hae. 47 Tuh-e angphe hae balyn tuh eih alung keiccuze Solomon nynh aripaw tou leite a nung hae; tuh-e sohin nynh aripaw tuh ny kho um khyh.
48 Tuhcite Solomon nynh Bawipaw inn kya umpaw uccaw hae balyn kha a rae: sui silawhang, Nungpyapaw sanlou nung nawlan sui ccaboi,Ref 7.48: Exo 25.23-30, 30.1-3 49 alungkhu lang e hminthyaa malang umpaw sui ccite raepaw maeekhuatung haeā€”alia lang ccangpangaw, thahlang ccangpangaw; sui haetapaw hae, sui maeekhua hae, sui tetakia hae;Ref 7.49: Exo 25.31-40 50 sui ccite raepaw banang hae, tetakia hae, pakepi hae, mynkhuhpaw hanlan pake hae, maee-e nungnawpaw pake hae; beikinn alungkhu lang kou, hmin thyaa huaccepaw kya-e thuakaw hae elang te beikinn inn khaanpi kya-e thuakaw hae elang sui pahta hae kha a rae.
51 Tuhcite Solomon Siapharan nynh Bawipaw inn elang rya a lawpaw balyn tuh a thangsah. A paaw David nynh a hlupaw uccaw hae: sui, ngun te angphe hae kha teekhae zah, Bawipaw inn lungkhu e sisuainn kyakhe a ccy.Ref 7.51: 2Sa 8.11; 1Sh 18.11