6
Solomon nynh Beikinn A Sak
Israel hae nynh Izip ram kyate a pounaw hae te kum za pali sung taryanaw kum, Solomon nynh Israel hae a uknaw hae kum palinaw kum, sawpaw sah ningnaw athuapaw Ziv saw kyakhe, Bawipaw inn sak kha a tho. Solomon Siapharan nynh a sakpaw Bawipaw inn tuh asaepaw dong sung taruh, akopaw dong kuin te ahangpaw dong sung thum acih. Beikinn akhaanpi malang umpaw tee takawnaw khaan tuh beikinn akopaw te lokuh zah asaepaw dong kuin, akopaw dong haw acih. Beikinn a aw ccaw cite abypaw thanlan-aw hae kha a rae. Inn akhaanpi atolang pang te alungkhu lang e hminthyaa atolang pang kha po voilu lan akhaan taraw hae kha a rae. Akaw khang tuh dong pangaw ko zah, angaelung khang tuh dong taruh ako, te khang thumnaw tuh dong sari ako; a doupaw thingccaw hae tuh inn pang lungkhu lang a tee khyh nawlan, inn atolang pang kha palung khang tuh alia khang laeze apahhua lante po voilu lan a rae.
Beikinn saknawpaw lung hae kha lung lawnaw hmin kya raety vae paw lung athua keiccuze beikinn a sak lya hae khe alungkhu kya khynlyng roi, hae roi, sivaw zunghe roi pawpaw mah thae lan um khyh.
Angaelung khang teenaw tuh beikinn alia lang khate nynh a um; akuekuhpaw nawkui khate angaelung khang lang thuasah, angaelung khang kyate khang thumnaw kalan thuasah kae athua. Tuhcite beikinn kha sak zah a lyn; te beikinn kha sidar thingccaw te thingphe khate a daw. 10 Beikinn po voilu lan pang kya a sakpaw akhaan taraw hae tuh dong pangaw cci hang zah, sidar thing hae khate inn kya a kyngsaku.
11 Bawipaw bya tuh Solomon kalan yn thua zah, 12 “E na sak cciamangpaw inn te asekuh lante, ka phungbya kha ngaete ka phungzae hae kha na zui zah, ka kawbya balyn kha na zui zetuh, na paaw David kya bya ka kinpyakupaw kha na tungvaw ka tynsah cih. 13 Israel hae kya ka um cih zah, ka ccungccaw Israel hae kha ka vua lan khyh hae,” a ci.
14 Solomon nynh inn kha sak zah a lyn. 15 Beikinn pang kha alungkhu langte suarui kyate siling adawkuhpaw kyacia sidar thingphe a be; suarui kha maeccaw thingphe te a rae. 16 Inn nulang dong kuin kha suarui kyate adawkuhpaw kyacia sidar thingphe te rae zah, e hynh alungkhu lang e hminthyaa lante, hmin thyaa huaccepaw lang a rae.Ref 6.16: Exo 26.33-34 17 Alungkhu lang e hminthyaa malang umpaw inn akhaanpi tuh dong sung pali asae. 18 Inn lungkhu e sidar thing hae tuh tui-ung thae te haetapaw zuh kha a soi hae; abalyn mawte sidar thing nynh thua, lung tuh lang khyh. 19 Bawipaw byakin thingkua nung nawlan, inn alungkhu lang kou khe alungkhu lang e hminthyaa kha a paccyn. 20 Alungkhu lang e hminthyaa alungkhu tuh dong kuin asae, dong kuin ko zah, dong kuin ahang; tuh-e akhaan tuh sui ccipaw te a thei. Silawhang kha mah sidar thing te a rae. 21 Solomon nynh inn alungkhu kha sui ccipaw te thei zah, alungkhu lang e hminthyaa malang khe sui rui kha po raw zah, sui te a thei. 22 Inn pynpi tuh accingpaw athua nawlan, inn kha abalynte sui a thei; alungkhu lang e hminthyaa kya-e silawhang kha heize abalynte sui a thei.Ref 6.22: Exo 30.1-3
Beikinn Ccaannaw
23 Alungkhu lang e hminthyaa lungkhu khe dong haw cci ahangpaw cherubim ccangning kha oliv thing te a rae.Ref 6.23-28: Exo 25.18-20 24 Cherub sake ccangkheit tuh dong pangaw sae zah, cherub sake ccangpaw ccangkheit tuh dong pangaw asae; tukeiccuze a sake voikheit lang dung kyate voikheit lang kyacia dong haw acih. 25 Ccangpaw cherub ccangkheit tuh mah dong haw acihbua; ccangning mawte mih muinsan te adi-ale hae paw phe lokuh hae. 26 Cherub ccangkheit tuh dong haw ahang, ccangpaw cherub mah tuhmaminte ahangbua. 27 Cherubim hae kha inn alungkhu lang kou khe a nung; cherub sake hae tuh daw hae zah, cherub ccangkheit sake nynh pang voikheih lang kha dia zah, ccangpaw cherub ccangkheit sake nynh pang voikheih lang kha adia; ccangpaw mih sake hae tuh inn ngaelung khe ccangkheit te ccangkheit a tungkuh hae. 28 Cherubim kha mah ccangning mawte sui te a thei hae.
29 Inn pang hae kyakhe akhaan alungkhu lang te thuasah, atolang te thuasah po voilu lan cherubim zuh, ungcci ku zuh te haetapaw zuh hae a soi hae. 30 Inn kya-e suarui kha akhaan alungkhu lang te thuasah, atolang te thuasah sui te a thei.
31 Alungkhu lang e hminthyaa kalan teenaw thuakaw hae kha oliv thing te a rae; thuakawccaw te thuakawtung hae tuh apaki ccangpangaw a hoi hae. 32 Oliv thing te raekuhpaw thuakaw ccangning kha cherubim zuh, ungcci ku zuh te haetapaw hae zuh kha soi hae zah sui te a thei hae, te cherubim te ungcci ku hae kha sui te a ccaan hae.
33 Tuhawte inn khaanpi kalan teenaw thuakaw tung hae kha mah oliv thing te, apaki ki pali a um lante a rae hae, 34 maeccaw thing te thuakaw ccangning rae zah, thuakaw voikheit lang elang pahta ccangning cci a rae keiccuze khawthya hungthya a um hae. 35 Thuakaw hae kyakhe cherubim zuh, ungcci ku zuh te haetapaw hae zuh kha karynte soi zah, azuh apyaanaw kyakhe sui te a thei. 36 Alungkhu lang e voidu kha raethuipaw lung thyh thum te sidar thingphe thyh kheit khate a rae.
37 Kum palinaw, Ziv sawpaw kyakhe Bawipaw inn aleihpaw kha a bing hae. 38 Kum haw lae kheitnaw, sawpaw sah taryanaw Bul sawpaw kyakhe inn kha paccyn thyhte akhaan riadawpaw ryalaw balyn kha a lyn hae. Solomon nynh kum sari lungkhu inn kha a sak.