3
Solomon nynh Hawnaw A Ngiaku
(2Sh 1.3-12)
1 Solomon nynh Izip siapharan Faro ryte nawccawkheihnaw kha zudynaw te a rae; aning nynh Faro ccanung kha dykuh zah amaw inn, Bawipaw inn te Jerusalem khualungrua kha a lyn mawlaezung David khua khe a umsah.
2 Bawipaw min hanlan inn kha sak athua loh khyh keiccuze ccungccaw hae nynh ahangnaw hmin khe silawnaw kha a rae hae.
3 Solomon nynh Bawipaw kha sungsah zah, a paaw David phungbya hae kha a zui; thuasalama ahangnaw hmin khe silaw zah mynkhuhpaw kha maee te a u.
4 Siapharan tuh silaw khylan Gibeon lang a cceih, pawccecize tuh-e tuh alepaw hmin hangpaw nynh thua; Solomon nynh tuh-e silawhang vawlan khe maee-ute silawnaw thong kheit kha leih a rae.
5 Gibeon khua kya khuazi a mang kyakhe Bawipaw tuh Solomon kalan yn langkuh zah, Pachia nynh, “Pawmou kae pya cih, yn ngiakuh,” a cipya.
6 Te Solomon nynh, “Na ryalahtupaw ka paaw David tuh namaw malang lungzinaw te, dingnaw te, thinlung hmerarih te a um keiccuze alepaw te atynpaw sungsahnaw kha na langsapyaku vae; amaw hanlan hynh-e alepaw te atynpaw sungsahnaw kha na nungpah zah, atunin a bawitungkhung kya a haung cih paw ccapaw kha na pya vae.
7 Atu tuh, pou Bawipaw ka Pachia, imua taraw ka thua zemah, na ryalahtupaw hynh ka paaw David hmin kya siapharan lang nae nung vae; kae tuh pawtemou pou lan zah pawtemou tee lan cipaw ka nykuh khyh.
8 Te milu riatae leipaw myarya lung hae paw minphuin pi, namaw nynh na popaw ccungccaw hae laku kya nynh na ryalahtupaw tuh ka um.
9 Tukeiccuze na ccungccaw hae hynh uk kho nawlan, ahoypaw te athahpaw phia khonawpaw nythyanaw thinlung kha na ryalahtupaw hynh beih yn pya; pawccecize hynh-e na minphuin pi hynh hum nynh mou a uk kho cih?” a ci.
10 Tuhcite Solomon nynh a ngiapaw bya nynh Bawipaw kha a lungry a thuasah.
11 Pachia nynh amaw kha, “Nang nynh hiinshe saenaw, hoirumnaw te na rhaw hae hiinnaw kha ngiaku leite, namaw hanlan ahmepaw nythya nawlan hawnaw kha nae ngiaku,
12 na bya thyhte ka cyih cih. Hawnaw te nythyanaw thinlung kha kae pya; nang na mawze nang ae lopaw lu kheit san la um boi khyh zah, nang na koute mah nang ae lopaw lu kheit san langkuh vae lan khyh.
13 Te nae ngiaku leipaw hoirumnaw te sawtuanaw kha na hiin lungkhu balyn kae pya; nang te touse lanpaw ccangpaw siapharan humhung mah um lan khyh.
14 Na paaw David nynh a zui hawte, ka laanpi kha na zui zah ka phungbya hae te ka kawbya hae kha na zui zetuh, na hiinshe kae saesah cih,” a cipya.
15 Te Solomon tuh a inaw kyate thaekuh zah, tuh-e tuh a mang nynh thua. Jerusalem lang cceih zah Bawipaw kya-e byakin thingkua malang khe a thadyn. Aning nynh maee-ute silawnaw te ccawkunaw silawnaw kha rae zah, a ryalahtu hae balyn kha loohdangnaw a raepya hae.
Byapianaw kya Solomon Hawnaw
16 Te ohhuanung hae lu ning nynh oun cceih hae zah siapharan malang a thadyn hae.
17 Lu kheit nung nynh, “Ka bawipaw, e nopinung te kae tuh inn kheit kya kae umkheih; inn kya kae umkheih lyakhe ccaaw ka saahku.
18 Ka ccaaw a pui koute nin thumnaw nin khe e nopinung nynh mah ccaaw saahkuh zah, pynkheihlan kae umkheih; tuh-e inn kya kaemaw lu ning kyalya kae um zah, milae humhung mah umbua khyh.
19 E nopinung nynh khuazi khe a ccapaw kha a nethin keiccuze phe a chih.
20 Ziraccyng khe aning nynh tho zah, ka pe e ka ccapaw kha na ryalahtunung ka itheih lyakhe zya lah zah, a by vaw khe a nung, te achihpaw a ccapaw kha ka by vaw khe a nung.
21 Awkhualan awkhua khe ka ccapaw kha matei zusah lan he ka tho tuh, a chihpaw kha ka muih; thuasalama awkhua khe hoyte ka do tuh, ka saahkupaw ccapaw thua khyh cipaw phe aria,” a cipya.
22 Thuasalama ccangpaw nopinung nynh, “Thua khyh, ahiinpaw imua tuh ka ccapaw thua zah, achihpaw imua tuh na ccapaw nynh thua,” a ci. Masaty e nopinung nynh, “Thua khyh, achihpaw imua tuh na ccapaw thua zah, ahiinpaw imua tuh ka ccapaw nynh thua,” a ci. Tuhcite siapharan malang khe a eikuh hae.
23 Te siapharan nynh, “Lu kheit nynh, ‘E a hiinpaw hynh ka ccapaw thua zah, a chihpaw hynh na ccapaw nynh thua,’ na ci oh; te ccangpaw lu kheit nynh, ‘Tuhte thua khyh! Na ccapaw tuh a chih, a hiinpaw hynh ka ccapaw nynh thua,’ na ci oh,” a ci.
24 Tukeiccuze siapharan nynh, “Thaloi yn pya oh,” ci zah thaloi kha a malang a thuakhaepya hae.
25 Siapharan nynh, “Ahiinpaw imuapaw hynh ccangning lang thoh bua oh lah, e nopi hae lu ning hynh anganngankuhte pya oh,” a ci.
26 Thuasalama a hiinpaw imua a nung nynh—a ccapaw kha myarya ngaethya a umsah keiccuze—siapharan kha, “Ka bawipaw, ahiinpaw imua hynh amaw kha pya ccaleih; beih theih nan!” a cipya. Ccangpaw lu kheit nynh, “Ka kya-e mah thua nan sah, na kya-e mah thua nan sah; thoh bua oh,” a ci.
27 Tetuh siapharan nynh khung hae zah, “Ahiinpaw ccaaw kha theih nan oh, masaty e nopinung kha pya oh. Aning tuh imua a nung nynh thua,” a ci.
28 Siapharan nynh bya a piapaw kha Israel hae balyn nynh thae hae zah siapharan tungvaw rawri sawtuanaw a hoi hae, pawccecize byading te byapia kho nawlan Pachia hawnaw tuh a tungvaw a um cipaw a ny hae.