17
Elijah nynh Khuaakan lanpaw A Hodae
1 Gilead ram Tishbe khuapaw Tishbe ccungccaw Elijah nynh Ahab kha, “Ka beikpaw Bawipaw , Israel Pachia tuh a hiin thyhte, kae ka bya leite, e kum hae kya dangtui ccah lan khyh zah khuaa mah rah lan khyh,” a cipya.Ref 17.1: Jam 5.17
2 Bawipaw bya tuh Elijah kalan yn thua zah,
3 “E hmin kyate pou lah, nithua langsang la cceih, te Jordan vaw nithua lang umpaw Kherith Vaw pe khe zya la rekuh.
4 Vaw kya-e tui kha na neih cih, tuin kyakhe nang kha looh pya khylan va-aw hae kha kaw ka pya vae hae,” a cipya.
5 Tukeiccuze cceih zah Bawipaw bya thyhte a cyi; aning nynh cceih zah Jordan nithua lang umpaw Kherith Vaw pe khe a um.
6 Va-aw hae nynh awkhua takyh zete takyhte sanlou te saw kha a pya hae; te vaw kya-e tui kha a nia.
7 Sosoh aro koute ram lungkhu kya khuaa araw khyh keiccuze vaw tuh akan vae.
Zarefath Nomaenung
8 Te Bawipaw bya tuh Elijah kalan yn thua zah,
9 “Thokuh lah, Sidon ram e Zarefath khua lang cceih lah, tuin kya la um; nang kha looh dang khylan tuin khua umpaw nomaenung kha kaw ka pya vae,” a cipya.Ref 17.9: Luk 4.25-26
10 Tukeiccuze thokuh zah Zarefath khua lang a cceih. Khua koikua kya he a thua te, nomaenung lu kheit tuh thingpareih kha a la khu cciamang; Elijah nynh nopinung kha ko zah, “Ka nia lanpaw tui beihtaraw kha banang te yn pyatua,” a cipya.
11 Nopinung nynh tui law lan a ccia lyakhe, aning nynh kohui zah, “Na kuih te sanlou beihtaraw nae ccyngpah cih,” a cipya.
12 Nopinung nynh, “Bawipaw na Pachia tuh a hiin thyhte, aruakuh vae paw sanlou phe kheit sankaw ka hoi khyh, ang lungkhu kya vaekhui kuihphe kheit kyalya te chitui-ung lungkhu kya chitui beihtaraw rou nynh ka hoi; inn lang kite tuh-e tuh kae te ka ccapaw elang anghyngnaw lanpaw thingpareih beihtaraw nynh ka la khu cciamang; tuh-e kae ae koute tuh kanmawte kae chi lanpaw nynh um vae,” a cipya.
13 Elijah nynh aning kha, “Na thawsia nan sah; cceih lah, kae hopya hawte la cyih; thuasalama masaty lan kamaw elang sanlou phe kheit yn raepah lah yn pyaty, tukoute namaw te na ccapaw elang ccangkhakheit kha na cyih cih.
14 Pawccecize Bawipaw , Israel Pachia nynh hynhte a ho: Bawipaw nynh laephi vawlan khuaa a rawsah mawlaezung, ang kya vaekhui thang lan khyh zah chitui-ung kya chitui thang lan khyh,” a ci.
15 Te nomaenung nynh cceih zah Elijah nynh a ho thyhte a cyi; te amaw ry, Elijah ryte a innbyn hae nynh khaw cia a ae hae.
16 Bawipaw nynh Elijah kyate a hopaw a bya thyhte, vaekhui ang kya vaekhui thang khyh zah, chitui-ung kya chitui thang khyh.
Elijah nynh Nomaenung Ccapaw A Dansah
17 Tuh-e koute, innzuaanung nopinung ccapaw tuh ccih zah, myaryamaw a cci keiccuze a hy phe thang.
18 Tetuh nomaenung nynh Elijah kha, “Pou Pachia ccungccapaw, pawccemou kae hynh nae rawse? Ka seinaw kha liathuisah lan te ka ccapaw kha chisah khylan tou ka kalan nae thua!” a cipya.
19 Elijah nynh nomaenung kha, “Na ccapaw kha yn pya,” a cipya. Aning nynh nomaenung by vaw e ccapaw kha lah zah, a inaw palung khaan langkhe kaekhae zah a ikhung kyakhe a nung.
20 Elijah nynh Bawipaw kalan sia zah, “Pou Bawipaw ka Pachia, innccong ka thuanaw nomaenung tungvaw kya heize a ccapaw kha chiapyate vawsawnaw na thuakhae tou?” a ci.
21 Te imua kha vae thum bakhungnua zah Bawipaw kalan khe, “Pou Bawipaw ka Pachia, e imua hiinnaw hynh a lungkhu lang bua tee sah,” cite a sia.Ref 17.21: 2Si 4.34-35
22 Bawipaw nynh Elijah roi kha thaepah zah, imuapaw hiinnaw tuh a lungkhu lang bua teethui zah a hiinthui.
23 Elijah nynh imua kha lah zah palung khaan kyate inn lungkhu lang rungkhae bung zah a nung kha a pya; te Elijah nynh, “Dotua, na ccapaw tuh a hiin,” a cipya.
24 Tetuh nopinung nynh Elijah kha, “Atu tuh nang tuh Pachia ccungccaw nynh na thua cipaw te na munglae kya umpaw Bawipaw bya tuh byaccing nynh thua cipaw ka ny vae,” a cipya.