15
Abijam nynh Judah A Uk
(2Sh 13.1—14.1)
Nebat ccapaw Jeroboam Siapharan nynh ram a uknaw kum haw lae taryanaw kum khe Abijam nynh Judah ram kha uk takaw zah, Jerusalem kya kum thum a uk. A nung tuh Abishalom ccanung Maakah nynh thua. Aning mawze a paaw nynh a la raepaw seinaw balyn kha a raebua; a minpaaw David thinlung hawte thua leite, Bawipaw a Pachia kya a thinlung a lungzi khyh. Thuasalama David keiccuze Bawipaw a Pachia nynh Jerusalem kya maeekhua ccangkheit a pya, amaw koute a ccapaw kha hangthung zah, Jerusalem khua kha a tynsah;Ref 15.4: 1Si 11.36 pawccecize David nynh Hit ccungccaw Uriah kong laelan, Bawipaw muihnaw kya ahmepaw kha cyih zah, kaw a pyapaw miakaw kha a she lungkhu balyn ccangkheit sanmah maetawkuh khyh.Ref 15.5: 2Sa 11.1-27 A she lungkhu balyn, Rehoboam te Jeroboam tuh rhaw po a tukkuh hae. Tuhlaepaw Abijam nynh rya a lawpaw te a cyipaw balyn tuh Judah Siapharan hae Phungpaw Ccauh kya a zei hae. Abijam tuh a minpaaw hae ryte ih hae zah, David khua kya a uu hae. Te a ccapaw Asa tuh amaw ccelang siapharan lang a tang.
Asa nynh Judah A Uk
(2Sh 15.16—16.6)
Israel Siapharan Jeroboam nynh ram a uknaw kum kuinnaw khe, Asa nynh Judah ram kha a uk takaw; 10 Jerusalem kyate sung pali kum kheit a uk. A minnung tuh Abishalom ccanung Maakah nynh thua. 11 A minpaaw David nynh a la cyi hawte, Asa nynh Bawipaw muihnaw kya ahmepaw kha a cyi. 12 Beikinn kya a ohhuakuhpaw pise hae kha ram kyate dee hae zah a minpaaw hae nynh a la rae hae paw zohtuh hae balyn kha a nue hae. 13 A minnung Maakah kha mah Asherah elang anungsikuhpaw zohtuh a rae keiccuze siapharan a nung thuanaw kyate a haeungsah; a zohtuh kha Asa nynh ropah zah Kidron Vaw pe khe maee te a soi. 14 Hmin hangpaw hae kha a ro khyh hae zemah, a she lungkhu balyn Asa thinlung tuh Bawipaw kya a lungzi. 15 A paaw nynh byakinkute a hlupaw lasung hae te amaw nynh byakinkute a hlupaw sui, ngun te angphe hae kha Bawipaw inn lungkhu langkhe a nung.
Asa te Benhadad A Pankheih hae
16 Judah siapharan Asa te Israel siapharan Baasha tuh mih she lungkhu balyn rhaw po a tukkuh hae. 17 Israel siapharan Baasha nynh Judah ram kha tuk lan ccianua zah, Judah siapharan Asa kalan humhung mah a pou lei nawlan te a tee lei nawlan Ramah khua kha a rae. 18 Bawipaw inn te siapharan inn kya-e sisuakhaan kya umpaw alaepaw sisua hae, sui te ngun balyn kha Asa nynh marya lah zah, a ryalahtu hae kuih kya a pya hae. Damaskas khua umpaw Siria siapharan, Hezion ccapaw Tabrimmon a ccapaw Benhadad kalan khe ccungccaw saw hae zah, 19 “Ka paaw te na paaw nynh a la pankheih hae hawte, kae te nang mah pankheih sih; sui te ngun hynh lasung lang kae ky; Israel siapharan Baasha nynh kae hynh yn kitaw nawlan, aning te na pankheihnaw oh kha roh ccavae,” cite bya a taw. 20 Benhadad nynh Siapharan Asa bya kha ngae zah, Israel khua hae kha tuk khylan a rhawbawi hae kha sawnua hae zah, Ijon, Dan, Abel-beth-maakah, Khinneroth balyn te Naftali ram balyn kha a tae hae. 21 Tuh-e tuh Baasha nynh he a thae te, Ramah khua a raepaw kha haeungtaw zah Tirzah khua kya a um. 22 Te Siapharan Asa nynh Judah ram balyn kha thaesah hae zah, lu kheit san a lue lei lante, Baasha nynh Ramah khua a raenawpaw lung hae te thing hae kha a law hae, tuh-e tuhte Siapharan Asa nynh Mizpah khua te Benjamin ram e Geba khua kha a rae. 23 Tuhlaepaw Asa nynh rya a lawpaw balyn, a huhan balyn, a cyipaw balyn te khua hae a raepaw tuh Judah Siapharan hae Phungpaw Ccauh kya a zei hae. Thuasalama he a taw te, a ccu kya ccinaw a hoi. 24 Te Asa tuh a minpaaw hae ryte ih hae zah, a minpaaw David khua kyakhe a minpaaw hae ryte a uukheih hae; a ccapaw Jehoshafat tuh amaw ccelang siapharan lang a tang.
Nadab nynh Israel A Uk
25 Judah siapharan Asa nynh ram a uknaw kum ningnaw kum khe Jeroboam ccapaw Nadab nynh Israel ram kha a uk takaw; aning nynh Israel ram kha kum ning a uk. 26 Aning nynh Bawipaw muihnaw kya hoyleinaw kha a rae, a paaw laanpi kha zui zah Israel hae seinaw raesahpaw laanpi kha a zui.
27 Issakhar phin, Ahijah ccapaw Baasha nynh Nadad kha aruh lante paccynnuakuh zah, Filistin hae khua athuapaw Gibbethon khua kya a chia; pawccecize Nadad te Israel balyn nynh Gibbethon khua kha a koihlu hae. 28 Tuhcite Judah siapharan Asa nynh ram a uknaw kum kumthumnaw khe Baasha nynh Nadab kha theih zah, amaw ccelang siapharan lang a tang. 29 Siapharan lang he a tang takaw te, Jeroboam ciihan balyn kha a chia hae; Bawipaw nynh a ryalahtu Shiloh khuapaw Ahijah kyate a hopaw bya thyhte, marya a ro mawlaezung Jeroboam ciihan kha a hysuepaw lu kheit san haang khyh,Ref 15.29: 1Si 14.10 30 pawccecize Jeroboam nynh amaw a seipaw seinaw te Israel hae kha seinaw a raesahpaw seinaw khate Bawipaw , Israel Pachia kha a thin a riasah keiccu nynh thua.
31 Tuhlaepaw Nadad nynh rya a lawpaw te a cyipaw balyn tuh Israel Siapharan hae Phungpaw Ccauh kya a zei hae. 32 Asa te Israel Siapharan Baasha tuh mih she lungkhu balyn rhaw a tukkuh hae.
Baasha nynh Israel A Uk
33 Judah siapharan Asa nynh ram a uknaw kum kumthumnaw khe Ahijah ccapaw Baasha nynh Tirzah khua kyate Israel balyn kha kum kuin lae pali a uk. 34 Aning nynh Bawipaw muihnaw kya hoyleinaw kha a rae, Jeroboam laanpi kha zui zah, Israel hae seinaw raesahpaw laanpi kha a zui.